អានតួអត្ថបទ
ជប៉ុន

ជញ្ជីង​ពាណិជ្ជកម្ម​​ជប៉ុន ជួប​ឱនភាព​មិន​ធ្លាប់​មាន

ពាណិជ្ជករ​អង្គុយ​នៅ​ក្បែរ​កំពង់​ផែ​ក្រុង​តូក្យូ
ពាណិជ្ជករ​អង្គុយ​នៅ​ក្បែរ​កំពង់​ផែ​ក្រុង​តូក្យូ © Reuters
ដោយ៖ អៀង សុខម៉ិញ
១៦ នាទី

នៅ​ខែ​កក្កដា​កន្លង​ទៅនេះ ជញ្ជីង​ពាណិជ្ជកម្ម​ជប៉ុន​បាន​ស្គាល់​ឱនភាព​យ៉ាង​ធ្ងន់ធ្ងរ​មិន​ធ្លាប់​មាន​ក្នុង​ប្រវត្តិពាណិជ្ជកម្ម​ជប៉ុន​។ ឱនភាព ក្នុង​ទំហំ​ទឹក​ប្រាក់ ប្រមាណ​៥២០០​លាន​អឺរ៉ូ ក្នុង​ពេល​តែ​មួយ​ខែ​កក្កដា ​ដែល​បណ្តាល​មក​ពី​ការ​នាំ​ចេញ​ទៅ​ចិន និង​អឺរ៉ុប​បន្ថយ​ល្បឿន ជា​តួលេខ​ដ៏​អាក្រក់​បំផុត​សម្រាប់​​មហាអំណាច​សេដ្ឋកិច្ច​ទីបីលើ​ពិភពលោក​។ អាក្រក់​ជាង​ការ​ប៉ាន់​ប្រមាណ​ទុក​​ដល់​ទៅ​ពីរ​ដង។

ផ្សាយពាណិជ្ជកម្ម

កាលពី​ខែ​កក្កដា​ឆ្នាំ​២០១១ បួន​ខែ​ក្រោយ​គ្រោះ​មហន្តរាយ​នុយក្លេអ៊ែរ និង​ទោះ​បី​ជា​ឧស្សាហកម្មត្រូវ​​គាំ​ងស្តូក​ស្តឹង​អស់​ជា​ច្រើន​សប្តាហ៍​មែន តែ​​ជញ្ជីង​ពាណិជ្ជកម្ម​ជប៉ុន​នៅ​ពេល​នោះគ្មាន​ឱនភាព​ទេ។ ប៉ុន្តែ​នៅ​ខែ​កក្កដា​ឆ្នាំ​២០១២ ការ​នាំ​ចេញ​បាន​ធ្លាក់​ចុះ​ដល់​ទៅ​៨,១% មក​នៅ​ត្រឹម​តែ ​៥៣១៣,៣ពាន់​លាន​យ៉េន ក្នុង​មួយ​ឆ្នាំ​។ ការ​នាំ​ចេញ​ធ្លាក់​ចុះ​លើ​គ្រប់​វិស័យ​ ៖ ឧបករណ៍​ឧស្សហកម្ម​ធុន​ធ្ងន់​ អគ្គិសនី ម៉ាស៊ីន​ផលិត​ក្រណាត់​ វត្ថុធាតុ​ដើម​បំផ្លែង​ (​ដែក គីមី ក្រដាស) និង​ផលិតផល​អេឡិចត្រូនិក (ម៉ាស៊ីនថត ម៉ាស៊ីន​ចាក់​វីដេអូ) ។ល។ និង​។ល។ លើក​លែង​តែ​ឧស្សាហកម្ម​រថយន្ត​មួយ​ចេញ។

 
ប្រាក់​ចំណូល​ដែល​បាន​មក​ធ្វើ​ការ​លក់​ផលិត​ផល​នៅ​បរទេស​​មាន​តិច​តួច ក៏​ព្រោះ​តែ​ប្រាក់​យ៉េន​ឡើង​ថ្លៃ​ខ្លាំង​ ជាពិសេស​នៅ​ចំពោះ​មុខ​ប្រាក់​អឺរ៉ូ មួយ​ឆ្នាំ​ចុង​ក្រោយ​នេះ។ ប្រាក់​យ៉េន​ខ្ពស់ បាន​ធ្វើ​ឱ្យ​អ្នក​វិនិយោគជប៉ុន​នៅតំបន់​អឺរ៉ូ​ទទួល​បាន​ប្រាក់​ចំណេញ​តិច​ពេលប្តូរ​យក​រូបិយប័ណ្ណ​ជាតិ។ ប្រឈម​នឹង​​​​វិបត្តិ​ប្រាក់​បំណុល​ និង​ដំណើរ​សេដ្ឋកិច្ច​ដើរ​ថយ​ក្រោយ​ សហភាព​អឺរ៉ុប តំបន់​​ចាយ​ប្រាក់​អឺរ៉ូ បានត្បិតត្បៀត​ចំណាយ ដែល​នៅ​ទីបំផុត​​ ការ​នាំ​ចេញ​របស់​ជប៉ុន​ មក​អឺរ៉ុប​ធ្លាក់​ចុះ​អស់​មួយភាគបួន។

ធ្ងន់ធ្ងរ​ជាង​នេះ​ទៅទៀត ជប៉ុន​ក៏​កំពុង​ឥទ្ធិពល​នៃ​កំណើន​សេដ្ឋកិច្ច​បន្ថយ​ល្បឿន​របស់​ចិន។ ការ​នាំ​ចេញ​ទៅ​កាន់​​ប្រទេស​ដៃគូ​ពាណិជ្ជកម្ម​ទី​មួយ​នេះ បាន​ធ្លាក់​ចុះ​អស់​១១,៩% និងជាង​​១៤%​នៅ​កាន់​ប្រទេស​កូរ៉េខាង​ត្បូង តៃវ៉ាន់ ហុងកុង និង​សិង្ហបុរី។ មាន​តែ​ការ​លក់​ ​រថយន្ត​ទៅ​អាមេរិក​មួយ​ប៉ុណ្ណោះ​ ដែល​ស្គាល់​ការ​កើន​ឡើង​ប្រមាណ​ជាង​៤,៧%។

ការ​នាំ​ចេញ​ថយ​ចុះ ឯ​ការ​នាំ​ចូល​កើន​ឡើង គ្មាន​ឈប់​ឈរ​ក្នុង​រយៈ​ពេល​ពីរ​ឆ្នាំ​កន្លះ​​ចុង​ក្រោយ​នេះ​ ៖ ការ​នាំ​ចូល​ទូរស័ព្ទ ឧស្ម័ន​ធម្មជាតិ ដើម្បី​បង្កើន​ការ​ផលិត​អគ្គិសនី​ ព្រោះ​មជ្ឈមណ្ឌល​អគ្គិសនី​នុយក្លេអ៊ែរ​ ទាំង​៥០​ ត្រូវ​បានបិទ​ជា​បន្ត​បន្ទាប់​ស្ទើរ​តែ​ទាំង​អស់​ ក្នុង​ហេតុ​ផល​សុវត្ថិភាព (ពីរ​ទើប​បើក​ឱ្យ​ដំណើរ​ការវិញ​កាលពី​ខែកក្កដា)។

ជា​សរុប​ ជញ្ជីង​ពាណិជ្ជកម្ម​ជប៉ុន​ជួប​ឱនភាព​ ហើយ​បើ​ស្ថានភាព​នេះ​កាន់​តែ​ដុនដាប​បន្ត​ទៀត​ នោះ​វា​នឹង​អាច​ធ្វើ​ឱ្យ​ប៉ះពាល់​ដល់​កំណើន​សេដ្ឋកិច្ចជប៉ុន​ ដែល​បាន​គឿង​នៅ​ត្រី​មាន​ទី​ពីរ​ ព្រោះ​​ចំណាយ​ក្នុង​ស្រុកគ្មានកើន​បន្តិច​សោះ​។ អ្នកជំនាញ​សេដ្ឋកិច្ច​ព្យាករ​ថា​សកម្មភាព​សេដ្ឋកិច្ច​នឹង​អាច​កំរើក​វិញ​ពី​ពេល​នេះ​ដល់​ដំណាច់​ឆ្នាំ​២០១២៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ