អានតួអត្ថបទ
កម្ពុជា

កម្ពុជា​ស្ថិត​នៅ​លេខរៀង​ ១៤៣​ ក្នុង​ចំណោម​ ១៧៩​ ប្រទេស ផ្នែក​សេរីភាព​សារព័ត៌មាន​

អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធ បាន​ចាត់​ទុក​ការ​ចាត់ថ្នាក់​សេរីភាព​សារព័ត៌មាន​របស់​អង្គការ​អ្នក​កាសែត​គ្មាន​ព្រំដែន មក​លើ​ប្រទេស​កម្ពុជា​ថា ជា​ការ​មិនយល់​ពី​ស្ថានភាព​ពិត​របស់​អ្នក​កាសែត​កម្ពុជា
អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធ បាន​ចាត់​ទុក​ការ​ចាត់ថ្នាក់​សេរីភាព​សារព័ត៌មាន​របស់​អង្គការ​អ្នក​កាសែត​គ្មាន​ព្រំដែន មក​លើ​ប្រទេស​កម្ពុជា​ថា ជា​ការ​មិនយល់​ពី​ស្ថានភាព​ពិត​របស់​អ្នក​កាសែត​កម្ពុជា RFI
ដោយ៖ លី ម៉េងហួរ
១៩ នាទី

របាយកាណ៍​ប្រចាំ​ឆ្នាំ​២០១៣ ស្តីពី​​សេរីភាព​សារព័ត៌មាន របស់​អង្គការ​អ្នក​កាសែត​គ្មាន​ព្រំដែន Reporters Without Border ដែល​មាន​មូលដ្ឋាន​នៅ​ទីក្រុង​ប៉ារីស បាន​ចាត់​ថ្នាក់​ប្រទេស​កម្ពុជា នៅ​លេខ​រៀង​ទី​ ១៤៣ ក្នុង​ចំណោម​ ១៧៩ ប្រទេស។ ចំណាត់​ថ្នាក់​នេះ​បង្ហាញ​ថា សេរីភាព​សារព័ត៌មាន​របស់​ប្រទេស​កម្ពុជា បាន​ធ្លាក់​ចុះ​២៦​លេខ បើ​ធៀប​នឹង​ឆ្នាំ​២០១២ ដែល​កម្ពុជា ឈរ​​នៅ​លេខ​រៀង​ទី​១១៧។​

ផ្សាយពាណិជ្ជកម្ម

របាយការណ៍​ប្រចាំ​ឆ្នាំ​២០១៣ របស់​អង្គការ​អ្នក​កាសែត​គ្មាន​ព្រំដែន បង្ហាញ​ថា​កម្ពុជា​ស្ថិត​នៅ​លំដាប់​លេខ​រៀង​ទី​១៤៣ ក្នុង​ចំណោម​១៧៩​ប្រទេស ផ្នែក​ខាង​សេរីភាព​សារព័ត៌មាន។ កម្ពុជា​ បាន​កើន​លេខ​រៀង​២៦ ដោយ​​កាលពី​​ឆ្នាំ​២០១២ អង្គការ​អ្នក​កាសែត​គ្មាន​ព្រំដែន បាន​វាយតម្លៃ​ថា​កម្ពុជា​ស្ថិត​នៅ​លេខ ១១៧។​

ការ​វាយ​តម្លៃ​របស់​អង្គការ​អ្នក​កាសែត​គ្មាន​ព្រំដែន បាន​ដាក់​ពិន្ទុ​ចាប់​ពី​លេខ​សូន្យ ដល់ ១០០។ មាន​​ន័យ​​ថា បើ​ប្រទេស​ណា​ទទួល​បាន​លេខ​តិច គឺ​ជា​ប្រទេស​ដែល​មាន​សេរីភាព​សារ​ព័ត៌មាន​ល្អ​ប្រសើរ។​

យ៉ាងណា​ក៏​ដោយ ក្នុង​ចំណាត់ថ្នាក់​របស់​អ្នក​កាសែត​គ្មាន​ព្រំដែន បើ​ប្រៀប​ធៀប​នឹង​បណ្តា​ប្រទេស​​​ក្នុង​តំបន់ កម្ពុជា​មាន​ចំណាត់ថ្នាក់​ខាង​សេរីភាព​សារ​ព័ត៌មាន នៅ​ឆ្នាំ​២០១៣ ដែល​ស្ថិត​នៅ​លេខ​រៀង ១៤៣ គឺ​នៅ​ក្រោម​ អន់​ជាង​ប្រទេស​ថៃ​ដែល​​ស្ថិត​នៅ​លេខ​រៀង ១៣៥ និង​ឥណ្ឌូនេស៊ី ដែល​ស្ថិត​នៅ​លេខ ១៣៩។ ក៏​ប៉ុន្តែ​កម្ពុជា មាន​ចំណាត់ថ្នាក់​សេរីភាព​​សារ​ព័ត៌មាន ល្អ​ជាង​​ប្រទេស​ម៉ាឡេស៊ី ដែល​ស្ថិត​នៅ​លេខ​រៀង ១៤៥, ហ្វីលីពីន ១៤៧, សឹង្ហ​បុរី ១៤៩, ភូមា ១៥១, វៀតណាម ១៧២, និង​ប្រទេស​ចិន នៅ​លេខ​រៀង ១៧៣។​

ដោយឡែក ក្នុង​ចំណោម​១៧៩ ប្រទេស ដែល​អង្គការ​អ្នក​កាសែត​គ្មាន​ព្រំដែន​បាន​វាយ​តម្លៃ​លើ​​សេរីភាព​សារព័ត៌មាន នៅ​ឆ្នាំ​២០១៣ ដែល​ល្អ​ប្រសើរ​បំផុត នៅ​តែ​បាន​ទៅ​លើ​ប្រទេស​នៅ​សហភាព​អឺរ៉ុប ដូច​ឆ្នាំ​មុន។ នោះ​គឺ​ហ្វាំង​ឡ​ង់ លំដាប់​លេខ​១ ប្រទេស​ហូឡង់ នៅ​លេខ​២ និង​លេខ​៣ បាន​ទៅ​លើ​ប្រទេស ន័រវេស។ រី​ឯ​ប្រទេស ដែល​ស្ថិត​នៅ​លំដាប់​លេខ​រៀង​ចុង​ក្រោយ​គេ ក្នុង​តារាង​របស់​អ្នក​កាសែត​គ្មាន​ព្រំដែន គឺ​ប្រទេស Eritrea នៅ​លេខ​១៧៩ ប្រទេស កូរ៉េខាងជើង ១៧៨ និង​ប្រទេស Turkmenistan នៅ​លេខ​រៀង ១៧៧។​

លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន និង​ជា​អ្នក​នាំពាក្យ​រដ្ឋាភិបាល បាន​ចាត់​ទុក​ការ​ចាត់ថ្នាក់​សេរីភាព​សារព័ត៌មាន​របស់​អង្គការ​អ្នក​កាសែត​គ្មាន​ព្រំដែន មក​លើ​ប្រទេស​កម្ពុជា​ថា ជា​ការ​មិនយល់​ពី​ស្ថានភាព​ពិត​របស់​អ្នក​កាសែត​កម្ពុជា។ នោះ​គឺ​អ្នក​ខ្លះ​មិនមែន​ជា​អ្នក​កាសែត​ទេ តែ​ត្រូវ​តុលាការ​ចាប់​កាត់ទោស​ដូច​ករណី លោក ម៉ម សូណង់ដូ នាយក​វិទ្យុ​សំបុកឃ្មុំ ដែល​លោក​រដ្ឋមន្ត្រី ខៀវ កាញារីទ្ធ លើក​ឡើង​ថា លោក ម៉ម សូណង់ដូ ត្រូវ​តុលាការ​កាត់ទោស ​ក្នុង​រឿង​បង្កើត​តំបន់​អបគមន៍ មិនមែន​ក្នុង​នាម​លោក​ជា​អ្នក​កាសែត​ទេ។

យ៉ាងណា​ក៏​ដោយ លោក ខៀវ កាញារីទ្ធ មាន​មោទនភាព​ថា សេរីភាព​សារព័ត៌មាន​នៅ​កម្ពុជា គ្រាន់បើ​ជាង​គេ នៅ​ក្នុង​បណ្តា​ប្រទេស​អាស៊ាន។ សេរីភាព​សារព័ត៌មាន​នៅ​ឆ្នាំ​២០១២ ក៏​ត្រូវ​បាន​ក្លឹប​អ្នក​កាសែត​កម្ពុជា​របស់​លោក ប៉ែន សមិទ្ធិ បាន​វាយ​តម្លៃ​ថា មាន​ទាំង​ប្រការ​គួរ​ព្រួយ​បារម្ភ និង​ទាំង​ប្រការ​គួរ​លើក​ទឹកចិត្ត​។ ព្រួយ​បារម្ភ ដោយសារ​តែ​មាន​ការ​បាញ់​សម្លាប់​អ្នក​កាសែត ការ​សម្លាប់​សកម្មជន​ព្រៃឈើ​លោក ឈុត វុទ្ធី និង​ការ​ចាប់​ខ្លួន លោក ម៉ម សូណង់ដូ ជា​ដើម។

ក៏​ប៉ុន្តែ​របាយការណ៍​របស់​ក្លឹប​អ្នក​កាសែត​កម្ពុជា បង្ហាញថា​ពាក្យបណ្តឹង​ ការ​ចាប់​ខ្លួន ការ​គំរាម​កំហែង ព្រម​ទាំង​ឃាតកម្ម​លើ​អ្នក​កាសែត​កម្ពុជា​ក្នុង​ឆ្នាំ​២០១២ បាន​ថយ​ចុះ​បើ​ធៀប​នឹង​ឆ្នាំ​២០១១៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ