កម្ពុជា-វៀតណាម

បង្គោល​ព្រំដែន​លេខ ៣១៤​ត្រូវ​បាន​សម្ពោធ​ដោយ​ប្រមុខ​ដឹកនាំ​កម្ពុជា​វៀតណាម

នាយករដ្ឋមន្រ្តី​កម្ពុជា និង​វៀតណាម​សម្ពោធ​បង្គោល​ព្រំដែន​លេខ ៣១៤ ដែល​ខណ្ឌ​ចែក​ខេត្តកំពត​របស់​កម្ពុជា​ជាមួយ​ខេត្ត​កៀង​យ៉ាង​របស់​វៀតណាម​
នាយករដ្ឋមន្រ្តី​កម្ពុជា និង​វៀតណាម​សម្ពោធ​បង្គោល​ព្រំដែន​លេខ ៣១៤ ដែល​ខណ្ឌ​ចែក​ខេត្តកំពត​របស់​កម្ពុជា​ជាមួយ​ខេត្ត​កៀង​យ៉ាង​របស់​វៀតណាម​ ©Reuters

ដូច​ការគ្រោងទុក បង្គោល​ព្រំដែន​លេខ ៣១៤ ដែល​ខណ្ឌ​ចែក​ខេត្តកំពត​របស់​កម្ពុជា​ជាមួយ​ខេត្ត​កៀងយ៉ាង​របស់​វៀតណាម​ត្រូវបាន​បើកសម្ពោធ​រួចហើយនៅ​ព្រឹក​ថ្ងៃអាទិត្យ​ទី ២៤ មិថុនា ដោយ​នាយករដ្ឋមន្ត្រី​នៃ​ប្រទេស​ទាំងពីរ។ លោកនាយក​រដ្ឋមន្ត្រី ហ៊ុន សែន​បាន​ថ្លែង​ការពារ​ការបោះ​បង្គោលព្រំ​ដែន​ជាមួយ​វៀតណាម​ថាបានធ្វើ​ឡើង​ដោយ​ឈរលើ​មូលដ្ឋាន​ច្បាប់​ជាតិ និង​ច្បាប់​អន្តរជាតិ។ ដោយឡែក​មេដឹកនាំ​ស្ថាប័ន​កំពូល​ផ្សេងទៀត​ដូចជា ប្រធាន​រដ្ឋសភា ប្រធាន​ព្រឹទ្ធសភា រហូតដល់​ព្រះមហាក្សត្រ ក៏បាន​ផ្ញើសារ​អបអរ​ខួប​ទី ៤៥ ឆ្នាំ​នៃ​ចំណង​ការទូត​កម្ពុជានិង​វៀតណាម ដោយ​សម្តែង​ការដឹងគុណ​ចំពោះ​ប្រទេសជិតខាង​មួយ​នេះ។ 

ផ្សាយពាណិជ្ជកម្ម

 

ក្នុងឱកាស​បើកសម្ពោធ​បង្គោល​ព្រំដែន​លេខ ៣១៤ រវាង​ខេត្តកំពត និង​ខេត្ត​កៀង​យ៉ាង នៅ​ព្រឹក​ថ្ងៃអាទិត្យ​នេះ លោកនាយក​រដ្ឋមន្ត្រី ហ៊ុន សែន បាន​ថ្លែង​កោតសរសើរ​ក្រុមការងារ​ចម្រុះ​ព្រំដែន​ប្រទេស​ទាំងពីរ​ដែល​បានសម្រេច​លទ្ធផល​យ៉ាង​ល្អ​ក្នុង​ការកំណត់​ខណ្ឌសីមា​ព្រំដែន​គោក​ជាមួយគ្នា។ សម្រាប់​លោកនាយក​រដ្ឋមន្ត្រី ការងារ​នេះ​មិនមែន​មានន័យ​ត្រឹមតែ​ជាការ​កំណត់​ខ្សែបន្ទាត់​ព្រំដែន​រវាង​ប្រទេស​ទាំងពីរ​ឲ្យ​បានច្បាស់លាស់​ប៉ុណ្ណោះ​ទេ ប៉ុន្តែ វា​ក៏បាន ជំរុញ​កំណើនសេដ្ឋកិច្ច និង​ការអភិវឌ្ឍន៍​ជីវភាព​របស់​ប្រជាជន​នៅតាម​ព្រំដែន​ផងដែរ។
 
នៅ​ចំពោះមុខ​នាយករដ្ឋមន្ត្រី​វៀតណាម លោក ង្វៀន តឹនយុង ប្រមុខ​រដ្ឋាភិបាល​កម្ពុជា​បាន​គូស​បញ្ជាក់​ថា កម្ពុជានិង​វៀតណាម​ក៏​គ្រោង​នឹង​ចាប់ផ្តើម​កំណត់​ខណ្ឌសីមា​ព្រំដែនទឹក​ជាមួយគ្នា​ផងដែរបន្ទាប់ពី​ការបោះបង្គោល​ព្រំដែន​ដីគោក​ដែល​នឹង​បញ្ចប់​នៅ​ចុង​ឆ្នាំ​២០១២នេះ។ ថ្លែង​ការពារ​ការបោះ​បង្គោលព្រំ​ដែន​ជាមួយ​វៀតណាម​ដែល​រង​ការចោទប្រកាន់​ថាបានធ្វើ​ឲ្យ​បាត់បង់​ទឹកដី​ខ្មែរ​នោះ ប្រមុខ​ដឹកនាំ​កម្ពុជា​បាន​បញ្ជាក់ថា ការងារ​នេះ​បានធ្វើ​ឡើង​ដោយ​ឈរលើ​មូលដ្ឋាន​ច្បាប់​ជាតិ និង​អន្តរជាតិ​យ៉ាង​ត្រឹមត្រូវពោលគឺ​ការវាស់វែង​ព្រំដែន​បាន​គោរព​ទាំងស្រុង​ទៅតាម​ផែនទី​តាំងពី​សម័យ​បារាំង។
 
ការសម្ពោធ​បង្គោល​ព្រំដែន​នៅថ្ងៃនេះ​បានធ្វើ​ឡើង​ចំ​ថ្ងៃ​ប្រារព្ធ​ខួប​ទី៤៥ឆ្នាំ​នៃ​ចំណង​ការទូត​រវាង​កម្ពុជានិង​វៀតណាម។ នេះ​ជា​ឱកាស​ដែល​មេដឹកនាំ​ស្ថាប័ន​កំពូលៗ​របស់​កម្ពុជា​ផ្សេងទៀត​ដូចជា ប្រធាន​រដ្ឋសភា ព្រឹទ្ធសភា និង​ព្រះមហាក្សត្រ ផ្ញើសារ​អបអរសាទរ​ដល់​សមភាគី​វៀតណាម​ផងដែរ។ ក្នុង​ព្រះរាជសារ​ជូន​លោក ង្វៀន ភូចុង អគ្គលេខាធិការ​បក្ស​កុម្មុយនិស្ត​វៀតណាម ព្រះមហាក្សត្រ សម្តេចព្រះ​បរមនាថ នរោត្តម សីហមុនី បាន​រម្លឹក​អំពី​ការចងចាំនិង​ការដឹងគុណ​របស់​ប្រជាជន​កម្ពុជា​ដែល​ត្រូវបាន​រំដោះ​ឲ្យ​រួច​ផុតពី​សោកនាដកម្ម​នៃ​របប​ប្រល័យពូជសាសន៍​ខ្មែរក្រហម​ដោយមាន​ជំនួយ​ពី​ប្រទេស​វៀតណាម។ ព្រះអង្គ​ក៏បាន​កោតសរសើរ​ដល់​ការគាំទ្រ​របស់​វៀតណាម​ចំពោះ​ការអភិវឌ្ឍន៍​សេដ្ឋកិច្ច និង​សង្គម​កម្ពុជា​ផងដែរ។
 
សូមបញ្ជាក់ថា នេះ​ជា​លើក​ទី២ហើយ​ដែល​កម្ពុជានិង​វៀតណាម​បាន​សម្ពោធ​បង្គោល​ព្រំដែន​រួមគ្នា​បន្ទាប់ពី​ការសម្ពោធ​បង្គោល​ព្រំដែន​លេខ ១៧១ បាវិត-ម៉ុកបាយកាលពី​ប៉ុន្មាន​ឆ្នាំមុន។ ប្រទេស​កម្ពុជានិង​វៀតណាម​ដែលមាន​ព្រំដែន​រួមគ្នា​ប្រវែង​ជាង ១២០០ គ.ម កំពុង​បង្ហាញ​ការប្តេជ្ញាចិត្ត​យ៉ាង​មុតមាំ​ក្នុងការ​បោះបង្គោល​ព្រំដែន(ទាំង​ដែនគោកនិង​ដែនទឹក)ឲ្យ​បាន​ចប់​សព្វគ្រប់​ក្នុង​ពេលឆាប់ៗនេះបើទោះបីជា​មានការ​ចោទប្រកាន់​ថាធ្វើ​ឲ្យ​បាត់​ទឹកដី​កម្ពុជា​ក៏ដោយ៕


 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI