អានតួអត្ថបទ
កម្ពុជា

កូនប្រុស​​លោក​​ឈុត​​ វុទ្ធី​​ ផ្តើម​​ស្នង​​តំណែង​​ឪពុក​​នៅ​​ខែ​​ក្រោយ​​

យុវជន​នានា​មក​​ប្រារព្ធ​ខួប​​នៃ​ការ​ស្លាប់​របស់​លោក ឈុត​ វុទ្ធី​ នៅ​ទីសក្ការៈ​ព្រះអង្គ​ដងកើ។
យុវជន​នានា​មក​​ប្រារព្ធ​ខួប​​នៃ​ការ​ស្លាប់​របស់​លោក ឈុត​ វុទ្ធី​ នៅ​ទីសក្ការៈ​ព្រះអង្គ​ដងកើ។ RFI/Siv Channa
ដោយ៖ លាង ដឺលុច
១៤ នាទី

ថ្ងៃ​ទី​២៦​មេសា​នេះ គឺ​ខួប​មួយ​ឆ្នាំ​​នៃ​មរណភាព​របស់​លោក​ឈុត វុទ្ធី សកម្ម​ជន​ការ​ពារ​ព្រៃឈើ​ដែល​ត្រូវបាន​បាញ់​សម្លាប់​ នៅ​ក្នុង​ជម្លោះ​មួយ។ ក្រុម​គ្រួសារ​លោក​ឈុត វុទ្ធី ​បាន​ទៅ​ធ្វើ​បុណ្យ​ឧទ្ទិសកុសល​នៅទី​កន្លែង​ដែល​លោក​ឈុត វុទ្ធី​ ត្រូវ​បាន​បាញ់​សម្លាប់​ក្នុងព្រៃ ​ខេត្តកោះកុង ខណៈ​សកម្មជន​សិទ្ធិមនុស្ស​មួយ​ចំនួន​បាន​រៀបចំ​ពិធី​សាសនា​ នៅ​ទីសក្ការៈ​ព្រះអង្គ​ដងកើ។ នៅ​ថ្ងៃ​នេះ​ដែរ កូនប្រុស​លោកឈុត វុទ្ធី​ ឈ្មោះ ឆឺយ ឧត្តម​រស្មី​ បាន​ប្រកាស​បន្ត​ធ្វើការងារ​របស់ឪពុក​ ជា​អ្នក​ការពារ​ព្រៃឈើ។

ផ្សាយពាណិជ្ជកម្ម

ឆឺយ ឧត្តម​រស្មី​ កូន​ប្រុស​អាយុ​២០​ឆ្នាំ​របស់​លោក​ឈុត វុទ្ធី​ ដែល​ជា​សកម្មជន​ការពារ​ព្រៃឈើ​នោះ បាន​ប្រកាស​​ថា​ ខ្លួន​នឹងផ្តើម​ធ្វើ​ការងារ​បន្ត​វេនពី​​ឪពុក​ នៅ​ខែ​ក្រោយ​នេះ​ហើយ។ កូនប្រុស​របស់​លោក​ឈុត វុទ្ធី​ ប្រកាស​យ៉ាងនេះ នៅ​ចំ​ថ្ងៃ​ដែល​ក្រុម​គ្រួសារ​បាន​រៀបចំ​រម្លឹក​ខួប​មរណភាព​មួយ​ឆ្នាំ​របស់​លោក​ឈុត វុទ្ធី​ នៅ​ថ្ងៃទី​២៦​មេសា​នេះ។

លោក​ ឈុត វុទ្ធី គឺ​ជាអតីត​ប្រធាន​អង្គការ​ការពារ​ធនធាន​ធម្មជាតិ ហើយ​ត្រូវបាន​ខ្មាន់​កាំភ្លើង​បាញ់​សម្លាប់​ នៅ​ក្នុង​ជម្លោះ​មួយ​ជាមួយ​សន្តិសុខ​ក្រុមហ៊ុន​ឯកជន និង​មន្ត្រី​កងរាជអាវុធ​ហត្ថ ​នៅ​ក្នុង​ស្រុក​មណ្ឌលសីមា ខេត្ត​កោះកុង កាល​ពី​ឆ្នាំ​មុន ខណៈ​លោក​កំពុង​នាំ​ស្ត្រី​អ្នកកាសែត​របស់​ Cambodia Daily ២​នាក់​​យក​ព័ត៌មាន​អំពី​ការ​កាប់​ព្រៃឈើ​ខុស​ច្បាប់។

នៅ​ពេល​ដែល​កូនប្រុស​របស់​ឈុត វុទ្ធី ប្រកាស​បន្ត​តំណែង​ធ្វើ​ការងារ​របស់​ឪពុកក្នុង​ពេលនេះ ចិត្ត​ស្រឡាញ់​ធម្មជាតិ និង​ព្រៃឈើ​មិន​មែនជា​មូលហេតុ​តែ​មួយ​របស់​យុវជន​អាយុ​២០​ឆ្នាំ​នេះ​ឡើយ។ ប៉ុន្តែ​គឺ​អនុស្សាវរីយ៍​ដែល​ខ្លួន​មាន​ជាមួយ​ឪពុក និង​ការ​គាំទ្រ​ពី​សហគមន៍ គឺ​ជា​មូលហេតុ​សំខាន់​បន្ថែម។

យុវជន​ឧត្តមរស្មី ​បាន​និយាយ​ប្រាប់​​វិទ្យុ​បារាំង​អន្តរជាតិនៅ​ថ្ងៃ​នេះ ​ពីខេត្ត​កោះកុង​មក​ថា ខ្លួន​ពិត​​ជាមាន​អនុស្សាវរីយ៍ជាមួយ​ឪពុក​ ដោយសារតែ​ខ្លួនធ្លាប់​បាន​ចុះ​ធ្វើការងារ​ជាមួយ​ឪពុក​ កាល​ពី​អតីតកាល។ ហើយ​ម្យ៉ាងវិញ​ទៀត យុវជន​រស្មី​ បន្តថា ប្រជាសហគមន៍​ក៏​បាន​គាំទ្រ​រូបគេ​អោយ​បន្ត​ធ្វើការងារ​នៅ​ក្នុង​អង្គការ​ការពារ​ធម្មជាតិ​របស់​ឪពុក​គេ​ផង​ដែរ។

នៅ​ថ្ងៃ​នេះ ពិធី​បុណ្យ​តាម​បែប​សាសនា​ដើម្បី​រម្លឹក​វិញ្ញាណក្ខន្ធ​សកម្មជន​ការពារ​ព្រៃឈើ​ ​ឈុត វុទ្ធី ត្រូវបាន​រៀបចំ​ធ្វើ ​នៅ​២​កន្លែង​ផ្សេងគ្នា។ អង្គការ​ក្រៅ​រដ្ឋាភិបាល​មួយ​ចំនួន​បាន​រៀបចំ​ពិធី​នៅ​ទីសក្ការៈ​ព្រះអង្គ​ដងកើ​ នៅ​មុខ​ព្រះបរម​រាជវាំង ខណៈ​ដែល​ក្រុម​គ្រួសារ​របស់​លោក​ឈុត វុទ្ធី ​បាន​នាំ​គ្នា​ទៅធ្វើ​ពិធី​បង្សុកូល​ជាមួយ​ព្រះសង្ឃ​ពីរ​អង្គ ​នៅ​កន្លែង​ដែល​លោ​ក ​ឈុត វុទ្ធី​​ ត្រូវបាន​បាញ់​សម្លាប់​នៃ​ភូមិ​វាល៣ ស្រុក​មណ្ឌល​សីមា ​ខេត្ត​កោះកុង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ