អានតួអត្ថបទ
កម្ពុជា

គណៈ​​កម្មការ​​ជំនាញ​រដ្ឋសភា​​ច្រានចោល​ការស្នើ​បង្កើត​ច្បាប់​កំណត់​ប្រាក់ខែ​កម្មករ​កាត់ដេរ​ និង​មន្ត្រី​រាជការ​ស៊ីវិល​​

រដ្ឋសភា​កម្ពុជា
រដ្ឋសភា​កម្ពុជា ©បូណា
ដោយ៖ លី ម៉េងហួរ
២៨ នាទី

តាមរយៈ​កិច្ចប្រជុំ​នៅ​ព្រឹក​ថ្ងៃ​ពុធ​នេះ គណៈកម្មការ​ជំនាញ​រដ្ឋសភា បានសម្រេច​ច្រានចោល​សេចក្តីស្នើច្បាប់​របស់​តំណាងរាស្ត្រ​គណបក្ស​សមរង្ស៊ី និង​គណបក្ស​សិទ្ធិមនុស្ស លើ​ការបង្កើត​ច្បាប់​កំណត់​ពី​ប្រាក់ខែ​ទាប​បំផុត សម្រាប់​កម្មករ​កាត់ដេ​រ ១៥០ ដុល្លារ និង​ប្រាក់ខែ​មន្ត្រីរាជការ ១​លាន​រៀល ស្មើនឹង ២៥០ ដុល្លារ។ គណៈកម្មការ​ជំនាញ​រដ្ឋសភា បាន​ចាត់ទុកថា សំណើ​​របស់​គណបក្ស​ប្រឆាំង ផ្ទុយ​ពី​សេដ្ឋកិច្ច​ទីផ្សារសេរី និង​មាន​លក្ខណៈ​ជា​នយោបាយ​ប្រជាភិថុត ដែល​ជា​ការ​បញ្ជោរ ឬ​ការ​បញ្ចើច​លើកជើង​ប្រជារាស្ត្រ ហើយ​មិន​អាច​យកទៅ​អនុវត្ត​បាន​ទេ។

ផ្សាយពាណិជ្ជកម្ម

គណៈកម្មការ​ជំនាញ​រដ្ឋសភា បាន​ផ្តល់​ហេតុផល ៧ ចំណុច លើ​ការបដិសេធ​មិន​ទទួលយក​សេចក្តីស្នើច្បាប់​ស្តីពី​ប្រាក់បៀវត្ស និង​ប្រាក់​កម្រៃ​អប្បបរមា សម្រាប់​មន្ត្រីរាជការ និង​កម្មករ​កាត់ដេរ របស់​អ្នកតំណាងរាស្ត្រ​គណបក្ស​សមរង្ស៊ី និង​គណបក្ស​សិទ្ធិមនុស្ស។

ហេតុផល​ទាំងនោះ​រួមមាន ការលើកឡើង​ថា បើ​បង្កើត​ច្បាប់​កំណត់​ប្រាក់ខែ​ ដូច្នេះ​វា​ជា​ការកំណត់​បែប​សេដ្ឋកិច្ច​ទីផ្សារ​ផែនការ ផ្ទុយ​ពី​សេដ្ឋកិច្ច​ទីផ្សារសេរី ដែល​កម្ពុជា​អនុវត្ត​សព្វថ្ងៃ។ ម្យ៉ាងទៀត សេចក្តីស្នើច្បាប់​របស់​គ​ណ​បក្សប្រឆាំង​នោះ ក៏​មាន​លក្ខណៈ​ជា​នយោបាយ​ប្រជាភិថុត (ការ​បញ្ជោរ ឬ​ការ​បញ្ចើច​លើកជើង​ប្រជារាស្ត្រ) ដែល​មិន​អាច​យកទៅ​អនុវត្ត​បាន​ទេ។​

សេចក្តី​បដិសេធ​ដូច្នេះ ត្រូវបាន​ធ្វើឡើង ក្នុង​កិច្ចប្រជុំ​ដោយ​បិទទ្វារ​រវាង​គណៈកម្មការ​ជំនាញ​របស់​រដ្ឋសភា​ទាំង​៩ និង​តំណាង​ក្រសួង​ជំនាញ ៣ ទៀត របស់រាជ​រដ្ឋាភិបាល ដឹកនាំ​ដោយ​លោក ជាម យៀប ជាមួយ​ក្រុម​អ្នកតំណាងរាស្ត្រ​គណបក្ស​សមរង្ស៊ី និង​គណបក្ស​សិទ្ធិមនុស្ស នៅ​រដ្ឋសភា កាលពី​ព្រឹក​ថ្ងៃទី​៣ ខែ​មេសា ឆ្នាំ​២០១៣​។ កិច្ច​ប្រជុំនេះ​ ​មិនបាន​​ឲ្យ​អ្នកកាសែត ចូល​ស្តាប់​ឡើយ។

តំណាងរាស្ត្រ​គណបក្សប្រឆាំង​ទាំងពីរ បាន​ចុះហត្ថលេខា លើ​សេចក្តីស្នើច្បាប់ ស្តីពី ប្រាក់បៀវត្ស និង​ប្រាក់​កម្រៃ​អប្បបរមា សម្រាប់​មន្ត្រីរាជការ ១ លាន​រៀល ស្មើនឹង ២៥០ ដុល្លារ និង​ប្រាក់ខែ​កម្មករ​កាត់ដេរ ១៥០ ដុល្លារ។

បន្ទាប់ពី​កិច្ចប្រជុំ លោក​តំណាងរាស្ត្រ ស្មាន ទៀត អនុប្រធាន​គណៈកម្មកា​រ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម​របស់​រដ្ឋសភា បាន​ប្រាប់​ក្រុមអ្នកកាសែត​ថា ការ​តម្លើង​ប្រាក់ខែ​កម្មករ​កាត់ដេរ គឺ​អាស្រ័យ​លើ​ការពិភាក្សា​រវាង​ថៅកែ និង​កម្មករ ដោយរាជ​រដ្ឋាភិបាល​មិន​លូកដៃ​ទេ។ រីឯ​ការ​តម្លើង​ប្រាក់ខែ​មន្ត្រីរាជការ​វិញ គឺ​ផ្អែក​លើ​ឋានុ​ក្រម និង​កាំ​ប្រាក់​របស់​មន្ត្រីរាជការ​និមួយៗ​។ ក្នុងនោះ រាជរដ្ឋាភិបាល​ក៏​បាន​សម្រេច​តម្លើង ២០% ក្នុង​មួយ​ឆ្នាំ ហើយ​នឹង​តម្លើង​ប្រាក់ខែ​មន្ត្រីរាជការ​នៅ​ឆ្នាំ​ខាង​មុខៗ​ទៀត ផ្អែក​តាម​សេដ្ឋកិច្ច​រីកចម្រើន​ជាក់ស្តែង ដូច​អ្វី​ដែល​លោកនាយក​រដ្ឋមន្ត្រី បាន​លើក​ឡើង​ថ្មីៗ​នេះ។​

លោក​តំណាងរាស្ត្រ ស្មាន ទៀត ដែល​មកពី​គណបក្ស​ប្រជាជន​កម្ពុជា កំពុង​កាន់​អំណាច បាន​បញ្ជាក់​ថា "គណៈកម្មការ​ទាំង​ពីរ​របស់​រដ្ឋសភា សម្រេច​ទាត់ចោល មិន​ទទួលយក​សេចក្តីស្នើច្បាប់​នោះ​ទេ ដោយ​ផ្អែក​ថា សេចក្តីស្នើច្បាប់​ទាំងពីរ​នេះ មិន​សមស្រប​ទៅនឹង​ស្ថានភាព​ជាក់ស្តែង​​នៅ​​ប្រទេស​កម្ពុជា ដែល​ប្រកាន់​សេដ្ឋកិច្ច​ទីផ្សារសេរី។ បើ​សេដ្ឋកិច្ច​ទីផ្សារ​ផែនការ ទើប​អាច​កំណត់​ប្រាក់ខែ​ទាប​សម្រាប់​កម្មករ និង​មន្ត្រីរាជការ​បាន"​។

ក៏​ប៉ុន្តែ​ក្នុង​សន្និសីទ​កាសែត បន្ទាប់ពី​កិច្ចប្រជុំ លោក សុន ឆ័យ ប្រធាន​ក្រុម​អ្នកតំណាងរាស្ត្រ​គណបក្ស​សមរង្ស៊ី បាន​លើកឡើង​ថា បើសិនជា​លុបបំបាត់​ករណី​ដែល​ក្រុមហ៊ុន​កាត់ដេរ បង់លុយ​ក្រៅផ្លូវការ​ លើ​ការដឹកជញ្ជូន មន្ត្រី​ពន្ធដារ និង​ផ្នែក​សន្តិសុខ ជា​ដើម​នោះ គឺ​គេ​អាច​តម្លើង​ប្រាក់ខែ​ដល់​កម្មករ​កាត់ដេរ បាន​រហូត​ដល់​ទៅ ២០០ ដុល្លារ​អាមេរិក ក្នុង​មួយ​ខែ។ រីឯ​ប្រាក់ខែ​មន្ត្រីរាជការ​ស៊ីវិល​វិញ ក៏​អាច​តម្លើង​បាន ២៥០ ដុល្លារ លើស​ពី​ប្រាក់ខែ​សព្វថ្ងៃ ដែល​ទទួល​បាន​ក្រោម ១០០ ដុល្លារ តាមរយៈ​ការលុបបំបាត់​ការ​បំប៉ោង​ចំនួន​មន្ត្រីរាជការ​ស៊ីវិល និង​កងកម្លាំងប្រដាប់អាវុធ រួម​ទាំង​លុបបំបាត់​ការបាត់បង់​ចំណូល​ពន្ធគយ និង​ពន្ធ​ពី​កាស៊ីណូ ជាដើម។​

លោក សុន ឆ័យ បានបញ្ជាក់​ថា "​រាល់​ការទាត់ចោល​សំណើ​​របស់​យើងខ្ញុំ​ជា​តំណាងរាស្ត្រ​នេះ សុទ្ធតែ​មាន​ការរើសអើង​ដោយ​គណបក្សកាន់អំណាច​។ ចេះតែ​ចោទប្រកាន់​ថា ជា​ការស្នើ ដើម្បី​ចំណេញ​នយោបាយ​បែបនេះ បែប​នោះ។ តែ​ជា​គោលការណ៍​យើង​បាន​ពន្យល់​ហេតុផល​នៃ​ការស្នើសុំ​របស់​យើង គឺ​ដើម្បី​តែ​ប្រយោជន៍​កម្មករ និង​មន្ត្រីរាជការ​ប៉ុណ្ណោះ។
ដើម្បី​តម្លើង​ប្រាក់ខែ​មន្ត្រីរាជការ​ស៊ីវិល ឲ្យបាន ១ លាន​រៀល ក្នុង​ម្នាក់ នៅ​ក្នុង​មួយ​ខែ គឺ​រាជរដ្ឋាភិបាល ត្រូវ​ការចំណាយ​បន្ថែម​ត្រឹមតែ ៣៦០ លាន​ដុល្លារ​អាមេរិក​ប៉ុណ្ណោះ”។​

ទោះជា​យ៉ាងណា​ក៏ដោយ កាលពី​ព្រឹក​ថ្ងៃទី​២ ខែ​មេសា ឆ្នាំ​២០១៣ លោក​នាយករដ្ឋមន្ត្រី ហ៊ុន សែន បាន​ប្រកាស​ថា គណបក្ស​ប្រជាជន​កម្ពុជា​ដែល​ដឹកនាំ​រាជរដ្ឋាភិបាល បាន​កំណត់​ថា ចាប់ពី​ឆ្នាំ​ក្រោយ​ទៅ ប្រាក់បៀវត្ស​សម្រាប់​មន្ត្រីរាជការ​ស៊ីវិល​និង​កងកម្លាំងប្រដាប់អាវុធ នឹង​ត្រូវ​តម្លើង ដោយ​គិត​តាម​កំណើនសេដ្ឋកិច្ច ដោយ​មិន​ត្រូវ​តម្លើង​ត្រឹមតែ ២០% ដូច​រៀងរាល់​ឆ្នាំ​ឡើយ។ រីឯ​ប្រាក់ខែ​កម្មករ​កាត់ដេរ ត្រូវ​តម្លើង​រៀងរាល់ឆ្នាំ តាម​យន្តការ​ប្រជុំ​ចរចា​ត្រីភាគី រវាង​សហជីព​កម្មករ ថៅកែ​រោងចក្រ​កាត់ដេរ និង​តំណាង​រាជរដ្ឋាភិបាល។​

ការ​តម្លើង​ប្រាក់ខែ​មន្ត្រីរាជការ​ស៊ីវិល និង​ប្រាក់ខែ​កម្មករ គឺជា​ប្រធានបទ​ដ៏​ក្តៅគគុក​មួយ​របស់​គណបក្ស​ប្រឆាំង សម្រាប់​យុទ្ធនាការ​ឃោសនា​បោះឆ្នោត​ជាតិ នា​ខែ​កក្កដា ឆ្នាំ​២០១៣៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ