ភូមា

ប្រធានាធិបតី ​ថេន សេន ​ប្រកាសថា​នឹងមាន​ “កំណែ​ទម្រង់​វគ្គទីពីរ”​

លោក​ប្រធានាធិបតី​ភូមា​ ថេន​ សេន​ ​ប្រកាស​ប្រាប់​ថា​​នឹងមាន​​ “កំណែ​​ទម្រង់​​វគ្គទីពីរ”​​
លោក​ប្រធានាធិបតី​ភូមា​ ថេន​ សេន​ ​ប្រកាស​ប្រាប់​ថា​​នឹងមាន​​ “កំណែ​​ទម្រង់​​វគ្គទីពីរ”​​ REUTERS/Tomohiro Ohsumi/Pool

លោក​ប្រធានាធិបតី​ភូមា​ ថេន​ សេន​ បាន​ប្រកាស​ប្រាប់​នៅថ្ងៃ​អង្គារ​ទី១៩​មិថុនា​ឆ្នាំ២០១២​នេះថា​ ​ នឹងមាន​ “កំណែ​ទម្រង់​វគ្គទីពីរ”​ ដែល​សង្កត់​ជាពិសេស​ទៅលើ​វិស័យ​អភិវឌ្ឍន៍​សេដ្ឋកិច្ច​ ​ ក្រោយពី​មាន​ “កំណែ​ទម្រង់​នយោបាយ​និង​ការ​ផ្សះផ្សារ​ជាតិ”។

ផ្សាយពាណិជ្ជកម្ម

លោក​ប្រមុខរដ្ឋ​ភូមា​ ថេន​ សេន​ បាន​ឡើងមក​កាន់អំណាច​នៅ​ខែមីនា​ឆ្នាំ២០១១​ ​ នៅក្នុង​ក្របខណ្ឌ​នៃ​ការ​សាងផ្ទេរ​រដ្ឋ​អំណាច​ពី​ក្រុម​យោធា​ឲ្យ​មក​របប​គ្រប់គ្រង​ស៊ីវិល​វិញ។

 
កំណែ​ទម្រង់​នយោបាយ​នេះ​បាន​នាំឲ្យ​មាន​ការ​ដោះលែង​លោកស្រី​អ៊ុង​សាន​ស៊ូជី​ ប្រមុខ​បក្ស​ប្រឆាំង​ភូមា​ ​ ហើយ​ដែល​បន្ទាប់​មក​ លោកស្រី​បាន​ឈ្នះឆ្នោត​ក្លាយខ្លួន​ជា​សមាជិកា​នៃ​សភា​ភូមា​នៅ​ខែមេសា​កន្លង​ទៅ ​ ​ ក្រោយពី​បាន​ជាប់​ឃុំឃាំង​អស់រយៈ​ពេល​ជាច្រើនឆ្នាំ។

“នារយៈកាល​ឆ្នាំដំបូង​នៃ​ការឡើង​មក​កាន់កាប់​អំណាច​ ​ រដ្ឋាភិបាល​ភូមា​បាន​ខិតខំ​ធ្វើការ​កែទម្រង់​ក្នុង​វិស័យ​នយោបាយ​និង​ធ្វើការ​ផ្សះផ្សារជាតិ”​ ​ នេះ​ជា​សេចក្តី​ប្រកាស​របស់​ លោក​ប្រធានាធិបតី​ភូមា​ ថេន​ សេន​ តាមរយៈ​ទូរទស្សន៍​ នាឱកាស​ថ្លែង​បង្ហាញ​ពី​ “ផែនការ​ប្រាំឆ្នាំ”។

“ចាប់ពី​ឆ្នាំនេះទៅ​ រដ្ឋាភិបាល​ភូមា​នឹង​ខិតខំ​ធ្វើការ​កែទម្រង់​វគ្គទីពីរ​ដោយ​សង្កត់​ធ្ងន់ទៅលើ​វិស័យ​អភិវឌ្ឍន៍​សេដ្ឋកិច្ច​និង​អភិវឌ្ឍន៍​ប្រទេសជាតិ”​ ​ នេះជាការ​ប្រកាស​បញ្ជាក់​របស់​លោក​ប្រមុខរដ្ឋ​ភូមា​ ថេន សេន​ ​ ដោយ​ឆ្លៀត​បង្ហាញ​ឲ្យ​ដឹងពី​គោល​បំណង​របស់​រដ្ឋាភិបាល​ដែល​ចង់​ឲ្យ​ផលិតផល​សរុប​ក្នុង​ប្រទេស​គុណ​មួយ​ជាបី​ ​ ចាប់ពីនេះ​ទៅទល់​ឆ្នាំ២០១៥-២០១៦។

ហើយលោក​ថេន​ សេន​ ក៏​បាន​ប្រកាស​ប្រាប់​ផងទៀត​ពីការ​ខិតខំ​បង្រួប​បង្រួម​ផ្សះផ្សារ​ជាតិ​ ​ ដើម្បី​សន្តិភាព​ ស្ថិរភាព​ និតិរដ្ឋ​ និង​សន្តិសុខ​ ​ ហើយ​លោក​ប្រមុខរដ្ឋ​ភូមា​ក៏ពុំ​ភ្លេច​ថ្លែង​ប្រាប់​ផងដែរថា​ ​ វិស័យ​ទូរគមនាគមន៍​ អគ្គិសនី​ ថាមពល​ ការគ្រប់គ្រង​និង​ពាណិជ្ជកម្ម​ព្រៃឈើ​ ​ សិក្សាធិការ​ សុខាភិបាល​ និង​ហិរញ្ញវត្ថុ​ត្រូវឋិត​នៅ​ក្រោមការ​គ្រប់គ្រង​របស់​រដ្ឋភូមា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI