រុស្ស៊ី

បាតុកម្ម​ដ៏ធំគ្រោង​ធ្វើ​ដោយពួក​ប្រឆាំង​នៅចំ​ទិវា​បុណ្យជាតិ​រុស្ស៊ី​ថ្ងៃ១២​មិថុនា​

ក្រុម​បាតុករ​រាប់ម៉ឺននាក់​​ប្រឆាំង​នឹង​នយោបាយ​របស់​លោក​  Poutine នៅទីក្រុង​ Moscou​​ នៅថ្ងៃទី១២​មិថុនា​ឆ្នាំ២០១២
ក្រុម​បាតុករ​រាប់ម៉ឺននាក់​​ប្រឆាំង​នឹង​នយោបាយ​របស់​លោក​ Poutine នៅទីក្រុង​ Moscou​​ នៅថ្ងៃទី១២​មិថុនា​ឆ្នាំ២០១២ REUTERS/Denis Sinyakov

បាតុកម្ម​នេះ​ដែលមាន​ឈ្មោះថា ​“ក្បួនយាត្រា​លាននាក់” ​ជាបាតុកម្ម​ស្របច្បាប់​ដោយបាន​ទទួល​សេចក្តី​អនុញ្ញាតរបស់​សាលាក្រុង​ម៉ូស្គូ ​ហើយត្រូវ​ចូលរួម​ដោយ​ពលរដ្ឋ​កុំឲ្យ​លើសពី​៥ម៉ឺននាក់។​ ប៉ុន្តែ​ តាំងពី​ម្សិលមិញ​ម៉្លេះ​អាជ្ញាធរ​បាន​វាត​ប្រតិបត្តិការ​ឆែកឆេរ​នៅតាម​លំនៅ ​ចំនួន​ជាង​១០កន្លែង​របស់​ពួកមេ​ចាត់ចែង​ក្បួន​យាត្រា​នេះ​ ក្រោម​លេស​ស្វែងរក​តឹកតាង​ពាក់ព័ន្ធ​នឹង​អំពើ​ហិង្សា​ប្រព្រឹត្ត​ដោយ​បាតុករខ្លះ​ក្នុង​មីទ្ទិញ​ថ្ងៃ៦​ ឧសភា​ ទៅ​លើពួក​ប៉ូលីស​ដែល​ជា​តំណាង​នៃ​អង្គការ​រដ្ឋអំណាច​រុស្ស៊ី។​ ហើយថ្ងៃ​នេះ​ ពួកមេៗ​ទាំងនោះ​ ត្រូវ​ចូលខ្លួន​ទៅ​ឆ្លើយ​នឹង​សំនួរ​ក្រុម​ស៊ើប​អង្កេត​គឺនៅ​ម៉ោង១១ព្រឹក​ ចំណែក​បាតុកម្ម​ត្រូវចាប់​ផ្តើម​គឺនៅ​ម៉ោង​១២ទៅ​ហើយ។​ ទោះ​យ៉ាងណា​ក៏ដោយ​ក៏ពួក​ប្រឆាំង​នៅតែ​ប្តេជ្ញា​ធ្ចើបាតុកម្ម​ថ្ងៃនេះ។​ ចំណុច​សម្គាល់​ក្បួនយាត្រា​លើកនេះ​របស់​ពួក​ប្រឆាំង​ គឺប្រព្រឹត្ត​ទៅ ​ក្រោម​ធរមាន​នៃ​ច្បាប់ថ្មី​ដែល​រឹត​បន្តឹង​ទណ្ឌកម្ម​ ចំពោះ​ការ​រំលោភ​បំពាន​លើ​របៀប​របប​ធ្វើមីទ្ទិញ។​ ទាំងច្បាប់​ថ្មីនេះ​ ទាំងការ​ឆែកឆេរ​ម្សិលមិញ​បានញ៉ាំង​ឲ្យមាន​ប្រតិកម្ម​ទៅហើយ​ពីខាង​បស្ចិមលោក។