ឥទ្ធិពល​នៃ «ដាវ​អាជ្ញា​សឹក» របស់​នាយក​រដ្ឋមន្ត្រី !

សំឡេង ០៣:៤៧
​បឹង​ទន្លេ​សាប​​កម្ពុជា
​បឹង​ទន្លេ​សាប​​កម្ពុជា © សុវណ្ណារ៉ា

កាលពី​ថ្ងៃ​ពុធ​ លោក​លឹម ​គានហោ ​រដ្ឋមន្ត្រី​ធនធាន​ទឹក​ និង​ជា​ប្រធាន​អាជ្ញាធរ​បឹង​ទន្លេសាប​បាន​ប្រកាស​ប្រើ​«ដាវ​អាជ្ញា​សឹក»​របស់​លោក​នាយក​រដ្ឋមន្ត្រី ​ហ៊ុន​ សែន​ ដើម្បី​ប្រយុទ្ធ​ប្រឆាំង​នឹង​ភាព​អនាធិបតេយ្យ​នៅ​ក្នុង​វិស័យ​នេសាទ​នៅ​ក្នុង​តំបន់​បឹង​ទន្លេសាប។ ​«ដាវអាជ្ញាសឹក»​ ដែល​ប្រមុខ​ដឹកនាំ​រដ្ឋាភិបាល​ខ្មែរ​បាន​ប្រគល់​ឲ្យ​សេនាធិការ​របស់​ខ្លួន​ដើម្បី​កម្ចាត់​ក្រុម​ល្មើស​ច្បាប់​នៅ​ពេល​នេះ​គឺ​សំដៅ​លើ​បទល្មើស​នេសាទ​ដែល​ជា​បញ្ហា​រ៉ាំរ៉ៃ​មួយ​មិន​ដែល​មាន​អ្នកណា​កម្ចាត់​បាន។ ​តើ​«ដាវ​អាជ្ញា​សឹក»​របស់​បុរស​ខ្លាំង​កម្ពុជា​មាន​ឥទ្ធិពល​ប៉ុណ្ណា​សម្រាប់​កម្ចាត់​ជន​ល្មើស​នៅ​កម្ពុជា?

ផ្សាយពាណិជ្ជកម្ម

មនុស្ស​ជាច្រើន​បាន​អបអរ​សាទរ​ចំពោះ​ការ​បញ្ចេញ​«ដាវ​អាជ្ញា​សឹក»​របស់​លោក​នាយក​រដ្ឋមន្ត្រី​សម្រាប់​កម្ចាត់​ជនល្មើស​ដែល​កំពុងតែ​បំផ្លិច​បំផ្លាញ​ជាតិ។ ​បទល្មើស​ទាំង​នោះ​មិន​មែន​ជា​រឿង​ថ្មី​ថ្មោង​ឡើយ ​តែ​វា​ជា​ជំងឺ​រ៉ាំរ៉ៃ​ដែល​មិន​ធ្លាប់​ព្យាបាល​ជា​ ដោយ​សារតែ​ថ្នាំ​ខ្វះ​ប្រសិទ្ធិភាព​ ឬ​ក៏​ថា​គ្រូពេទ្យ​ព្យាបាល​គ្មាន​សមត្ថភាព។ ​នេះ​ជា​មូល​ហេតុ​សំខាន់​ពីរ​ដែល​ត្រូវ​ពិចារណា។

ឥឡូវ​នេះ​ ប្រមុខ​ដឹកនាំ​រដ្ឋាភិបាល​កម្ពុជា​បាន​សម្រេច​បញ្ចេញ​«ដាវ​អាជ្ញា​សឹក»​ ដើម្បី​កម្ចាត់​មេរោគ​សង្គម​ដ៏​រ៉ាំរ៉ៃ​មួយ​ទៀត​ក្នុង​បឹង​ទន្លេសាប។ ​អ្វី​ដែល​គួរ​ឲ្យ​កត់សម្គាល់​នោះ​គឺ«ដាវ​អាជ្ញា​សឹក»​របស់​លោក​នាយក​រដ្ឋមន្ត្រី​សម្រាប់​កម្ចាត់​បទល្មើស​នេសាទ​មិនត្រូវ​បាន​ប្រគល់​ទៅ​ឲ្យ​រដ្ឋបាល​ជលផល​ទេ​ តែ​ដាវ​នេះ​បែរ​ជា​ធ្លាក់​ទៅ​លើ​ក្រសួង​ធនធាន​ទឹក​ និង​អាជ្ញាធរ​បឹង​ទន្លេ​សាប​ទៅ​វិញ។ ​ចំណុច​នេះ​ត្រូវ​គេ​មើល​ឃើញ​ថា ​បើ​មិន​មែន​ជា​ការ​មិន​ទុកចិត្ត​ទៅ​លើ​ប្រសិទ្ធិភាព​នៃ​រដ្ឋបាល​ជលផល​ទេ ក៏ជា​ការ​សាកល្បង​សមត្ថភាព​របស់​ស្ថាប័ន​ថ្មី​មួយ​ដែល​ទើប​តែ​បង្កើត​ឡើង។

ជា​ការ​ពិត​ណាស់ ​នេះ​មិន​មែន​ជា​លើក​ទី១​ទេ​ ដែល​លោក​នាយក​រដ្ឋមន្ត្រី​ ហ៊ុន សែន ​បាន​ចេញ​បញ្ជា​ឲ្យ​ប្រើ​វិធានការ​ក្តៅ​ប្រឆាំង​នឹង​បទល្មើស​រ៉ាំរ៉ៃ​ដែល​ពិបាក​បង្រ្កាប។ ​ដោយ​គ្រាន់តែ​រាប់​ត្រួសៗ​ ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ​គេ​ប្រាកដ​ជា​នៅ​ចាំ​បាន ​វិធានការ​កណ្តាប់​ដៃ​ដែក​ប្រឆាំង​មន្ត្រី​តុលាការ​ពុករលួយ​ បទបញ្ជា​ក្តៅ​គគុក​ប្រឆាំង​នឹង​កុងត្រូល​ជជុះ ​និង​ក្រុម​បងធំ​ វិធានការ​បង្ក្រាប​ទ្រង់ទ្រាយ​ធំ​ប្រឆាំង​បទល្មើស​ព្រៃឈើ​នៅ​ទូទាំង​ប្រទេស ​និង​ឥឡូវ​នេះ ​គឺ​ការ​បញ្ចេញ​«ដាវ​អាជ្ញា​សឹក»​ប្រឆាំង​នឹង​បទល្មើស​ក្នុង​ដែន​នេសាទ​បឹង​ទន្លេសាប។​ នេះ​បាន​បង្ហាញ​ពី​ការ​អស់​ភាព​អត់ធ្មត់​របស់​ប្រមុខ​ដឹកនាំ​រដ្ឋាភិបាល​ចំពោះ​ភាព​អសកម្ម​របស់​អាជ្ញាធរ​ថ្នាក់​ក្រោម​ដែល​ទាមទារ​ឲ្យ​នាយក​រដ្ឋមន្ត្រី​ត្រូវ​ចេញ​វិធានការ​គ្រប់​បែប​យ៉ាង​ដោយ​ខ្លួន​ឯង។

បទ​បញ្ជា​របស់​នាយក​រដ្ឋមន្ត្រី ​ទោះជា​ធ្វើ​ឡើង​ក្រោម​រូបភាព​ណា​ក៏ដោយ​ចុះ ​សុទ្ធតែ​មាន​ប្រសិទ្ធិភាព​ដូច​ផ្លេកបន្ទោរ​ ពោល​គឺ​ក្រោយ​បទ​បញ្ជា​ចេញ​តែ​ប៉ុន្មាន​ម៉ោង​ប៉ុណ្ណោះ ​ការ​អនុវត្តន៍​ក៏​ចាប់​ផ្តើម​ភា្លមៗ​នៅ​ទូទាំង​ប្រទេស។ ​បទល្មើស​ក៏​បាន​ស្ងប់ស្ងាត់​មួយ​រយៈ ​ប៉ុន្តែ ​មិន​យូរ​ប៉ុន្មាន ជំងឺ​ចាស់​ក៏​លាប់​ឡើង​វិញ​ អាជ្ញាធរ​ថ្នាក់​ក្រោម​ក៏​ហាក់​ទម្លាក់​ដៃ​ចុះ​ដែល​អនុញ្ញាត​ឲ្យ​ជនល្មើស​ផ្តើម​សកម្មភាព​ឡើង​វិញ​ដែរ។​ ជាក់ស្តែង ​ទោះជា​មាន​វិធានការ​ជា​បន្ត​បន្ទាប់ ក៏​មន្ត្រី​តុលាការ​មួយ​ចំនួន​នៅ​តែ​រង​ការ​រិះគន់​ពី​អំពើ​ពុក​រលួយ កុងត្រូល​ជជុះ​នៅតែ​មាន​តាម​ដងផ្លូវ​ ក្មេង​ទំនើង​នៅតែ​បង្ក​ការ​អុកឡុក​ជាហូរហែ ​រីឯ​បទល្មើស​ព្រៃឈើ​ក៏​នៅតែ​កើត​មាន​ជា​រៀងរាល់​ថ្ងៃ។ ​តើ​ហេតុអ្វី​បានជា​ដូច្នេះ?

ដើម្បី​ឆ្លើយ​សំណួរ​នេះ ​ជាបឋម ​គេ​គួរ​យល់​កត្តា​សត្យានុម័ត​មួយ​ នោះ​គឺ​គ្មាន​សង្គម​ណា​មួយ​ដែល​គ្មាន​បទល្មើស​សោះ​នោះ​ឡើយ​​ ទោះ​ជា​អ្នក​ដឹកនាំ​នោះ​ខ្លាំង​ពូកែ​យ៉ាងណា​ក្តី ​មានន័យ​ថា បទល្មើស​ «បើ​មិន​នេះ​ក៏​នោះ​ដែរ»​តែង​កើត​ឡើង​ជា​រឿង​ធម្មតា។ ​ប៉ុន្តែ ​បញ្ហា​របស់​កម្ពុជា​សព្វថ្ងៃ​គឺ​បទល្មើស​ជាច្រើន​មាន​ជាប់​ពាក់ព័ន្ធ​នឹង​ការ​ឃុបឃិត​របស់​អាជ្ញាធរ​មាន​សមត្ថកិច្ច។ នេះ​ជា​រឿង​សាមញ្ញ​តែ​វា​ជា​រឿង​គួរ​ឲ្យ​តក់ស្លុត។​ ដើម​ហេតុ​របស់​វា​ គឺ​បញ្ហា​ផលប្រយោជន៍​នេះ​ឯង។ ផលប្រយោជន៍​ដែល​ធ្វើ​ឲ្យ «ដាវ​អាជ្ញា​សឹក» របស់​នាយក​រដ្ឋមន្ត្រី​ចុះ​ខ្សោយ​ឥទ្ធិពល។

សរុប​មក​វិញ ​បទបញ្ជា​ទាំងឡាយ​របស់​ប្រមុខ​ដឹកនាំ​ប្រទេស​បាន​ឆ្លុះ​ឲ្យ​ឃើញ​ពី​ការ​យកចិត្ត​ទុក​ដាក់​លុប​បំបាត់​បាតុភាព​អសកម្ម​នៅ​ក្នុង​សង្គម​ ពីព្រោះ​ថា ​នៅ​លើ​លោក​នេះ​ប្រហែល​ជា​គ្មាន​មេដឹកនាំ​ប្រទេស​ណាមួយ​ដែល​មិន​ប្រាថ្នា​ចង់​ឃើញ​វឌ្ឍនភាព​ប្រកប​ដោយ​ភាព​សុខដុម​រមនា​ក្នុង​សង្គម​នៅ​ក្រោម​ការ​ដឹកនាំ​របស់​ខ្លួន​នោះ​ឡើយ។ ​ប៉ុន្តែ ​នាយក​រដ្ឋមន្ត្រី​ម្នាក់​ឯង​មិន​អាច​ចេញ​បញ្ជា​គ្រប់​បញ្ហា​បាន​ទេ។ ​ប្រសិទ្ធិភាព​ពិតប្រាកដ​ក្នុង​ការ​បំបាត់​បទល្មើស​ទាំងឡាយ​គឺ​ស្ថិត​នៅ​លើ​សមត្ថភាព ​និង​មនសិការ​ជាតិ​របស់​អាជ្ញាធរ​មាន​សមត្ថកិច្ច​គ្រប់​ជាន់​ថ្នាក់​ដែល​ជា​សេនាធិការ​របស់​រដ្ឋាភិបាល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI