លោកស្រី ហ៊ីលឡារី គ្លីនតុនជំរុញភូមាឲ្យបន្តធ្វើកំណែទម្រង់ឆ្ពោះទៅកាន់លទ្ធិប្រជាធិបតេយ្យពិតប្រាកដ
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃព្រហស្បតិ៍ ទី១ ធ្នូ ឆ្នំា ២០១១ ជាថ្ងៃទី២នៃដំណើរទស្សនកិច្ចរយៈពេល៣ថ្ងៃរបស់លោកស្រីប្រមុខការទូតអាមេរិក ហ៊ីលឡារី គ្លីនតុននៅក្នុងប្រទេសភូមា។ ទស្សនកិច្ចក្នុងគោលដៅស្ទាបស្ទង់ឆន្ទៈរបស់រដ្ឋាភិបាលថ្មីភូមាដែលទើបបានអនុវត្តនយោបាយបើកចំហ និងដើម្បីជំរុញភូមាឲ្យបន្តនយោបាយកំណែទម្រង់ឆ្ពោះទៅកាន់លទ្ធិប្រជាធិបតេយ្យពិតប្រាកដ។ ថ្ងៃនេះ ជំនួបដោយបិទទ្វាររវាងលោកស្រី គ្លីនតុន និងលោកប្រធានាធិបតីភូមា ថេន សេនត្រូវបានរៀបចំឡើងនៅក្នុងវិមានប្រធានាធិបតីក្នុងទីក្រុងណៃពិដោរ។
ជំនួបរវាងលោកស្រី ហ៊ីលឡារី គ្លីនតុន និងលោកប្រធានាធិបតីភូមា ថេន សេនមិនត្រូវបានធ្វើឡើងជាចំហទេ ប៉ុន្តែនេះពិតជាព្រឹត្តិការណ៍មួយដែលគ្មាននរណាម្នាក់នឹកស្មានដល់ទាល់តែសោះឡើយ កាលពីប៉ុន្មានឆ្នំា ឬប៉ុន្មានខែមុននេះ។ លោកស្រីប្រមុខការទូតអាមេរិក ហ៊ីលឡារី គ្លីនតុនបានចាប់ដៃ និងអង្គុយជជែកជាមួយលោកប្រធានាធិបតីភូមា ថេន សេន ។ លោក ថេន សេនដែលក្នុងអតីតកាលជាឧត្តមសេនីយ ព្រមទំាងធ្លាប់កាន់តំណែងជានាយករដ្ឋមន្រ្តីក្នុងសម័យរបបសឹក និងដែលទីក្រុងវ៉ាស៊ីនតោនធ្លាប់បានចាត់ទុកជាអ្នកកាន់អំណាចផ្តាច់ការ។ ក៏ប៉ុន្តែ អ្វីៗបានផ្លាស់ប្តូរយ៉ាងឆាប់រហ័ស តំាងពីក្រោយការបោះឆ្នោតនាចុងឆ្នំា ២០១០ និងបន្ទាប់ពីភូមាបានបង្កើតរដ្ឋាភិបាលស៊ីវិលក្នុងខែមីនាកន្លងទៅថ្មីៗនេះ។ ជាមួយនឹងរដ្ឋាភិបាលថ្មី ភូមាបានផ្តើមធ្វើកំណែទម្រង់ប្រទេសជាតិ តាមរយៈការអនុវត្តន៍នយោបាយបើកចំហ ទំាងជាមួយគណបក្សប្រឆំាង និងសហគមន៍អន្តរជាតិ។ គឺក្នុងន័យនេះហើយ ដែលបានជំរុញឲ្យមានដំណើរទស្សនកិច្ចរបស់ថ្នាក់ដឹកនំាជាន់ខ្ពស់អាមេរិកម្នាក់នៅក្នុងប្រទេសភូមា។
« ខ្ញុំកំពុងស្ថិតនៅទីនេះ ក៏ដោយសារតែលោកប្រធានាធិបតី អូបាម៉ា និងរូបខ្ញុំផ្ទាល់បានសម្លឹងឃើញនូវវិធានការកែទម្រង់ល្អមួយចំនួនដែលរូបលោក និងរដ្ឋាភិបាលរបស់លោកបានអនុវត្តនាពេលកន្លងមក » នេះជាការថ្លែងរបស់លោកស្រី គ្លីនតុន ទៅកាន់លោក ថេន សេន។ ជាចម្លើយតបវិញ លោក ថេន សេនបានចាត់ទុកដំណើរទស្សនកិច្ចរបស់លោកស្រីប្រមុខការទូតអាមេរិកពេលនេះថា មានលក្ខណៈជាប្រវត្តិសាស្រ្ត និងជាការបើកទំព័រថ្មីនៅក្នុងទំនាក់ទំនងរវាងទីក្រុងវ៉ាស៊ីនតោន និងទីក្រុងណៃពីដោរ។ សូមជម្រាបជូនថា ទស្សនកិច្ចរបស់ប្រមុខការទូតអាមេរិកក្នុងប្រទេសភូមាពេលនេះ គឺជាលើកទី ១ក្នុងរយៈពេលជាង ៥០ឆ្នំាកន្លងទៅ។
គេពិតជាមិនអាចដឹងអំពីខ្លឹមសារលម្អិតនៃជំនួបរវាងលោកស្រី គ្លីនតុន និងលោក ថេន សេនបានទេ។ ទន្ទឹមគ្នានេះ គេក៏មិនត្រូវរង់ចំានូវការប្រកាសអ្វីជាធំដុំពីលោកស្រី គ្លីនតុនដែរ ពិសេស ពីការលើកចេញវិញនូវទ័ណ្ឌកម្មសេដ្ឋកិច្ចដែលអាមេរិកបានដាក់លើភូមាតំាងពីឆ្នំា ១៩៩០ មកនោះ។ អ្វីដែលគេដឹង ទស្សនកិច្ចរបស់លោកស្រី គ្លីនតុន គឺគ្រាន់តែដើម្បីស្ទាបស្ទង់មើលពីឆន្ទៈពិតប្រាកដរបស់រដ្ឋាភិបាលថ្មីភូមា និងជំរុញភូមាឲ្យធ្វើកំណែទម្រង់នយោបាយរបស់ខ្លួនជាបន្តទៀត។ ក្រៅពីបញ្ហាផ្ទៃក្នុងរបស់ភូមា លោកស្រីគ្លីនតុនក៏ចង់ស្វែងយល់ពីសំណុំរឿងរសើបទាក់ទងនឹងកិច្ចសហប្រតិបត្តិការយោធារវាងភូមា និងកូរ៉េខាងជើង។ ទីក្រុងវ៉ាស៊ីនតោនកំពុងសង្ស័យពីវត្តមានកម្មវិធីនុយក្លេអ៊ែរយោធារវាងទីក្រុងណៃពិដោរ និងទីក្រុងព្យុងយ៉ាង។ ជាមួយគ្នានេះ នៅមានអាទិភាពមួយទៀតដែលលោកស្រី គ្លីនតុនមិនអាចធ្វើព្រងើយបាននោះ គឺវាស់ស្ទង់ពីឥទ្ធិពលរបស់ចិននៅក្នុងប្រទេសភូមា ទំាងនៅលើវិស័យនយោបាយ និងសេដ្ឋកិច្ច ពីព្រោះភូមាបានក្លាយជាសម្ព័ន្ធមិត្តចាក់ទឹកមិនលិចរបស់ចិនក្នុងរយៈពេល ២០ឆ្នំាចុងក្រោយនេះ។
នៅថ្ងៃសុក្រ ទី២ ធ្នូស្អែកដែលជាថ្ងៃទស្សនកិច្ចចុងក្រោយ លោកស្រី គ្លីនតុននឹងបន្តដំណើរទៅកាន់ទីក្រុងរ៉ង់ហ្គូន។ នៅទីនោះ លោកស្រីគ្លីនតុននឹងចូលជួបលោកស្រីប្រធានគណបក្សប្រឆំាងភូមា អ៊ុង សានស៊ូជី។ លោកស្រី ស៊ូជីដែលនឹងស្នើលោកស្រី គ្លីនតុនឲ្យជួយជម្រុញរដ្ឋាភិបាលភូមាឲ្យបន្តអនុវត្តនយោបាយបើកចំហឆ្ពោះទៅកាន់លទ្ធិប្រជាធិបតេយ្យពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ