កម្ពុជា

តុលាការ​កំពូល​ដោះលែង​បុរសជាប់​ចោទ​ក្នុងសំណុំរឿង​សម្លាប់​មេដឹកនាំ​សហជីព​

តុលាការកំពូល​នៅ​ទីក្រុង​ភ្នំពេញ
តុលាការកំពូល​នៅ​ទីក្រុង​ភ្នំពេញ ©​ លី​ ម៉េងហួរ

នៅ​ព្រឹក​ថ្ងៃ​ពុធ​នេះ លោក​ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំ​ជម្រះ​តុលាការ​កំពូល​បាន​សម្រេច​ដោះលែង​បុរស​ ជាប់ចោទ​ម្នាក់ ឈ្មោះ ថាច់ សា​វ៉េត​ ហៅ ចាន់ សុភ័ក្ត្រ ក្នុង​សំណុំរឿង​សម្លាប់​មេដឹកនាំ​សហជីព​កម្មករ​កាលពី​ឆ្នាំ​២០០៤។​ ក្នុង​ពេល​ប្រកាស​សាល​ដីកា​នៅ​ព្រឹក​មិញ​លោក​ចៅក្រម​ក៏បាន​សម្រេច​បង្វិល​ សំណុំរឿង​ទៅកាន់​តុលាការ​សាលាឧទ្ធរណ៍​ដើម្បី​បើក​ការ​ស៊ើប​អង្កេត​លើ​ សំណុំរឿង​ឃាតកម្ម​ដ៏​រសើប​នេះ​ឡើង​វិញ​ផង​ដែរ។

ផ្សាយពាណិជ្ជកម្ម

សេចក្តីរាយការណ៍របស់​លី ម៉េងហួរ

បន្ទាប់ពី​សវនាការ​កាលពីដើម​ខែ​កុម្ភៈ ចៅក្រម​តុលាការ​កំពូល បាន​សម្រេច​ដោះលែង​បុរស​ជាប់ចោទ​ ថាច់ សា​វ៉េត ​ឲ្យនៅ​ក្រៅ​ឃុំ​ ជាប​ណ្តោះ​អាសន្ន។ ​លោក​ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំ​ជម្រះ ដែល​មាន​ចៅក្រម ៥ រូប របស់​តុលាការ​កំពូល​ក៏បាន​សម្រេច បង្វិល​សំណុំរឿង​ឃាតកម្ម​លើ​មេដឹកនាំ​សហជីព​កាលពី​ឆ្នាំ​២០០៤ ​ទៅឲ្យ​តុលាការ​សាលាឧទ្ធរណ៍​បើក​ការ​ស៊ើប​អង្កេត​ឡើងវិញ។

 
យុវជន​ថាច់ សា​វ៉េ​ត ហៅ ចាន់ សុភ័ក្ត្រ អាយុ ២៨ ឆ្នាំ ត្រូវ​បាន​ចោទ​ប្រកាន់​ថា ជា​ឃាតករ​បាញ់​សម្លាប់​លោក​ រស់ សុ​វណ្ណារ៉េត ប្រធាន​សហជីព​សេរី​កម្មករ ​ប្រចាំ​រោងចក្រ ​ទ្រីណុងហ្គា ​កុមារា​ កាលពី​ថ្ងៃ​ទី​៤​ឧសភា​ ឆ្នាំ​២០០៤ នៅ​ម្តុំ​តោ​ពីរ ជិត​ពេទ្យ​លោកសង្ឃ​ក្រុងភ្នំពេញ។

ក្រោយ​អំពើ​ឃាតកម្ម​ អាជ្ញាធរ​ប៉ូលីស​បាន​ចាប់ខ្លួន​លោក ថាច់ សា​វ៉េត កាលពី​ថ្ងៃ​ទី​២៧​ឧសភា ឆ្នាំ​២០០៤។ ​តុលាការ​ក្រុង​ភ្នំពេញ និង​តុលាការ​សាលាឧទ្ធរណ៍ បាន​កាត់ទោស​ឲ្យ​យុវជន ថាច់ សា​វ៉េត ជាប់​ពន្ធនាគារ​រយៈពេល ១៥ ឆ្នាំ និង​ពិន័យ​ជា​ប្រាក់ ២០០០ ដុល្លារ។

យ៉ាងណា​ក៏ដោយ​ ជន​ជាប់ចោទ​ ថាច់ សា​វ៉េ​ត បាន​បដិសេធ​ចំពោះ​ការចោទ​ប្រកាន់​ ដោយ​ថា នៅ​ពេល​កើតមាន​អំពើ​ឃាតកម្ម​លើ​មេដឹកនាំ​សហជីព ​ខ្លួន​មិន​មាន​វត្តមាន ​នៅ​ក្រុង​ភ្នំពេញ​ឡើយ។

​សំណុំរឿង​ឃាតកម្ម​នេះ​​ត្រូវបាន​ក្រុម​អ្នកតាម​ដាន​សិទ្ធិមនុស្ស លើក​ឡើងថា ​មាន​ទម្រង់​ប្រហាក់​ប្រហែល​នឹង​សំណុំរឿង​ឃាតកម្ម​លើ​លោក ជា​វិជ្ជា អតីត​មេដឹកនាំ​សហជីព​សេរី​កម្មករ​ដ៏​ល្បីល្បាញ ​កាលពី​ខែ​មករា ឆ្នាំ​២០០៤។​ នោះ​គឺ​បុរស​ជាប់ចោទ ជា​ឃាតករ​សិប្បនិម្មិត ហើយ​ត្រូវ​តុលាការ​ថ្នាក់ក្រោម​កាត់ទោស​ដាក់​ពន្ធនាគារ។​ រីឯ​ឃាតករ​ពិតប្រាកដ ​រក​មិនឃើញ​ឡើយ រហូត​​មកដល់​សព្វថ្ងៃ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI