កម្ពុជា

សត្វមូសអង្កាម​កំពុងរំខាន​ជីវិតប្រជាជន​នៅទីក្រុង​ភ្នំពេញ​

មូស​ហើរ​​ទាំង​ហ្វូង​ៗ​​ចេញ​មក​​រំខាន​​អ្នក​ទីក្រុង​​ភ្នំពេញ​​ទាំង​ថ្ងៃ​​ទាំង​យប់​
មូស​ហើរ​​ទាំង​ហ្វូង​ៗ​​ចេញ​មក​​រំខាន​​អ្នក​ទីក្រុង​​ភ្នំពេញ​​ទាំង​ថ្ងៃ​​ទាំង​យប់​ © សុវណ្ណរ៉ា

ប្រជាជន​នៅ​ទីក្រុង​ភ្នំពេញ​កំពុង​សម្ដែង​ការ​ព្រួយបារម្ភ​ពី​ការ​កើន​ឡើង​ នៃ​ចំនួន​សត្វ​មូស។ ​អ្នកខ្លះ​ខឹង​សត្វ​មូស​ខាំ​ដៃ​ខាំ​ជើង ​អ្នកខ្លះ​ទៀត ខឹង​មូស​ចូល​ភ្នែក​និង​អ្នកខ្លះ​ទៀត​បារម្ភ​ខ្លាច​មូស​ទាំងនេះ​ខាំ​ទៅ​ បណ្ដាល​អោយ​មាន​ជំងឺ​គ្រុន​ឈាម។​ ឆ្លើយតប​ទៅ​នឹង​ក្តី​បារម្ភ​ចុង​ក្រោយ​នេះ លោក រដ្ឋ​មន្ត្រី​ក្រសួង​សុខាភិបាល​បាន​បញ្ជាក់​នៅ​ថ្ងៃ​អាទិត្យ​នេះ​ថា មូស​អង្កាម​នេះ​មិន​បង្ក​ជំងឺ​គ្រុន​ឈាម​ទេ។

ផ្សាយពាណិជ្ជកម្ម

សេចក្តី​រាយការណ៍​របស់ គី សុខលីម ពីទីក្រុង​ភ្នំពេញ

ប្រជាជន​នៅ​ទីក្រុង​ភ្នំពេញ​បាន​រអ៊ូរទាំ​ប្រាប់​ថា ​ហ្វូង​មូស​បាន​និង​កំពុង​រំខាន​ជីវិត​របស់​ពួកគេ​យ៉ាង​ខ្លាំង​នៅពេល​នេះ​ជា​ពិសេស​នៅពេល​រាត្រី។ ​ក្នុង​រយៈពេល​​មួយ​ខែ​ចុង​ក្រោយ​នេះ ​បរិមាណ​មូស​រាប់​មិន​អស់​ហើរ​ទាំង​ហ្វូង​ៗ​ចេញ​មក​រំខាន​អ្នក​ទីក្រុង​ភ្នំពេញ​ទាំង​ថ្ងៃ​ទាំង​យប់។ អ្នក​ផ្តល់​បទសម្ភាសន៍​នៅ​ទីក្រុង​ភ្នំពេញ​ភាគច្រើន​បាន​និយាយ​ថា បរិមាណ​មូស​ដ៏​ច្រើន​របៀប​នេះ​មិនធ្លាប់​មាន​ទេ​នៅ​ក្នុងរយៈ​ពេល​១០​ឆ្នាំ​ចុង​ក្រោយ​នេះ។

 
អ្នក​ភ្នំពេញ​ភាគច្រើន​បាន​សួរ​គ្នា​ទៅវិញ​ទៅមក​ថា តើ​ហេតុ​អ្វី​បាន​ជា​មាន​មូស​ច្រើន​ម្ល៉េះ​នៅ​ខែ​នេះ?​ហើយ​រដូវ​នេះ​ជា​រដូវ​ប្រាំង​សោះ។ ​កញ្ញា វិន ចាន់ ដែរលីស រស់​នៅក្នុង​ខណ្ឌ​ឫស្សី​កែវ​ម្តុំ​កាំ​ខូ​ស៊ីធី​បាន​បញ្ជាក់​ប្រាប់​ថា នាង​បាន​ប្រើប្រាស់​គ្រប់​មធ្យោបាយ​ដើម្បី​សម្លាប់​សត្វ​មូស​ប៉ុន្តែ​ផ្ទះ​នាង​នៅតែ​មាន​មូស​ច្រើន​ដដែល។ នាង​បាន​បន្ត​ទៀត​ថា នាង​បាញ់​សម្លាប់​យ៉ាងណា​ក៏​ដោយ​ក៏​មូស​នៅតែ​តាម​រំខាន​នាង។

លោក គួច ចន្ធា រស់នៅ​ម្តុំ​ពេទ្យ​រុស្សី​នៅ​ទីក្រុង​ភ្នំពេញ​បាន​បន្ត​ទៀត​ថា មូស​រំខាន​គាត់​ទាំង​ពេល​ពិសា​អាហារ​ពេលល្ងាច​ទាំង​ពេល​សម្រាន្ត។ ​កញ្ញា វី រ៉ានី រស់​នៅ​ម្តុំ​សាលា​បារាំង​អាលីយ៉ង់​នៅ​​ទីក្រុង​ភ្នំពេញ​បាន​រអ៊ូ​បន្ថែម​ទៀត​ថា យប់​ខ្លះ​មូស​ខាំ​នាង​ពេញ​ខ្លួន​តែ​ម្តង។ ឥឡូវ​នេះ​នាង​សម្រេច​ចិត្ត​សម្រាន្ត​ដោយ​ចង​មុង​ដើម្បី​ចៀសវាង​ការ​រំខាន​ពី​សត្វ​មូស។

នៅ​ម្តុំ​បឹង​សាលា​បឹង​ត្របែក​និង​នៅ​ម្តុំ​ផ្សារ​អូរឫស្សី ប្រជាជន​រអ៊ូ​រទាំ​ដូចតែ​គ្នា​អំពី​បរិមាណ​មូស​ច្រើន​ពេក។ លោក រដ្ឋា រស់​នៅ​ម្តុំ​ផ្សារ​អូរឫស្សី​បាន​បញ្ជាក់​ប្រាប់​ថា ពេល​ចុះ​ពី​លើ​ផ្ទះ​តាម​កាំ​ជណ្ដើរ​ម្តង​ៗ លោក​ដើរ​បុក​សត្វ​មូស​ពេញ​តែ​មុខ។ លោក រដ្ឋា មិនអាច​ដើរ​ចៀស​សត្វ​មូស​បាន​ទេ​ពីព្រោះ​មូស​មាន​ចំនួន​ច្រើន​ពេក។

អ្នក​ផ្តល់​បទ​សម្ភាសន៍​ភាគច្រើន​មិនបាន​ដឹង​ពី​មូលហេតុ​ដែល​នាំ​អោយ​មាន​មូស​ច្រើន​របៀប​នេះ​ទេ។ ប៉ុន្តែ​លោក រដ្ឋា បាន​ពន្យល់​ថា ចំនួន​សត្វ​មូស​ច្រើន​នេះ​គឺ​បណ្ដាល​មក​ពី​មូលហេតុ​ពីរ​យ៉ាង​ធំ​ៗ។ ទីមួយ៖ទឹកលូ​មិន​ហូរ​នៅ​ខែ​ប្រាំង​អាច​អនុញ្ញាត​អោយ​មូស​បង្ក​កំណើត​បាន​យ៉ាង​ស្រួល​និង​ទីពីរ៖​គឺ​ដោយសារ​អាជ្ញាធរ​ខកខាន​មិន​បាន​ដើរ​បាញ់​សម្លាប់​មូស​ដូច​អ្វី​ដែល​ធ្លាប់​បាន​ធ្វើ​នា​ពេល​កន្លងមក។

ក្រៅ​ពី​ការ​ខាំ​រំខាន អ្នក​ទីក្រុង​ភ្នំពេញ​សម្ដែង​ក្តី​បារម្ភ​អំពី​ការ​កើត​ជំងឺ​គ្រុន​ឈាម​ដោយ​សារ​មូស​ខ្លា​ខាំ។ ឆ្លើយ​តប​ទៅ​នឹង​ក្តី​បារម្ភ​ចុង​ក្រោយ​នេះ​លោក ម៉ម ប៊ុនហេង រដ្ឋមន្ត្រី​ក្រសួង​សុខា​ភិបាល​​បាន​បញ្ជាក់​នៅ​ថ្ងៃ​អាទិត្យ​នេះ​ថា មូស​ដែល​កំពុង​រំខាន​ប្រជាជន​នេះ​គឺ​សុទ្ធ​តែ​ជា​មូស​អង្កាម​ទេ។ មូស​អង្កាម​ខាំ​មិន​បង្ក​អោយ​មាន​ជំងឺ​គ្រុន​ឈាម​ឡើយ។ ឆ្លើយតប​ទៅ​នឹង​សំណួរ​ដែល​សួរ​ថា តើ​ក្រសួង​នឹង​ចាត់​វិធានការ​កំចាត់​មូស​អង្កាម​នេះ​ដែរ​ឬ​ទេ?​ លោក រដ្ឋ​មន្ត្រី​ក្រសួង​សុខាភិបាល​បាន​បញ្ជាក់​ថា អាជ្ញាធរ​កំពុង​តាម​ដាន​រឿង​នេះ​ប៉ុន្តែ​នៅ​មិន​ទាន់​មាន​វិធាន​ការ​ណា​មួយ​នៅ​ឡើយ​ទេ។

វិធាន​ការ​មិនទាន់​មាន​មែន​ប៉ុន្តែ​លោក​រដ្ឋ​មន្ត្រី​អំពាវនាវ​អោយ​ប្រជាជន​សម្អាត​ផ្ទះ​សម្បែង​និង​កំចាត់​ថ្លុក​ទឹក​ដែល​អាច​បង្ក​អោយ​មាន​ជីវិត​សត្វ​មូស៕

 
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI