កម្ពុជា​

អង្គការ​សង្គម​ស៊ីវិល សំដែង​ការ​ព្រួយ​បារម្ភ ចំពោះ​ការវិវឌ្ឍន៍​ថ្មីៗ នៅ​សាលាក្តី​ខ្មែ​រ​ក្រហម

ចៅក្រម​នៃ​តុលាការ​ខ្មែរក្រហម
ចៅក្រម​នៃ​តុលាការ​ខ្មែរក្រហម ©វណ្ណារ៉ា/RFI

ក្រុម​អង្គការ​សង្គម​ស៊ីវិល​ក្នុង​ប្រទេស​កម្ពុជា ចំនួន ៣២ ស្ថាប័ន បាន​សម្តែង​ការព្រួយបារម្ភ​យ៉ាង​ខ្លាំង ចំពោះ​ការវិវឌ្ឍន៍​ថ្មីៗ នៅ​សាលាក្តី​ចម្រុះ​កាត់ទោស​មេ​ខ្មែរក្រហម ពាក់ព័ន្ធ​នឹង​ដំណើរការ​ស៊ើប​អង្កេត និង​ការ​ចោទ​ប្រកាន់​លើ​សំណុំ​រឿង ០០៣ និង ០០៤។ សង្គម​ស៊ីវិល មាន​ការបារម្ភ​ថា អាណត្តិ​ការងារ​របស់​សាលាក្តី​ចម្រុះ ដែល​ត្រូវ​នាំខ្លួន​មេដឹកនាំ​ជាន់ខ្ពស់ និង​អ្នក​ទទួល​ខុស​ត្រូវ​ខ្ពស់​បំផុត ចំពោះ​ឧក្រិដ្ឋកម្ម​កើត​ឡើង​នៅ​ក្នុង​របប​ខ្មែរក្រហម នៅ​ពេល​នេះ កំពុង​ស្ថិត​នៅ​លើ​ហានិភ័យ​មួយ ក្នុង​ការបំពេញ​អាណត្តិ​ការងារ​របស់​ខ្លួន ឲ្យ​ចប់​ចុង​ចប់​ដើម។​

ផ្សាយពាណិជ្ជកម្ម

​តាមរយៈ​សេចក្តី​ថ្លែងការណ៍​រួម នៅ​ថ្ងៃ​ព្រហស្បតិ៍​នេះ ក្រុម​អង្គការ​សង្គម​ស៊ីវិល ក្នុងប្រទេស​កម្ពុជា ចំនួន ៣២ ស្ថាប័ន បាន​ទទូច​សុំ​ដល់​អ្នកពាក់ព័ន្ធ​ទាំងអស់ រួមមាន ​៖ ជន​រងគ្រោះ ម្ចាស់​ជំនួយ រដ្ឋាភិបាល​កម្ពុជា និង​អង្គការ​សហប្រជាជាតិ មេត្តា​ធ្វើ​យ៉ាងណា ដើម្បី​ធានា​ថា យុត្តិធម៌​ត្រូវ​បាន​ផ្តល់​ឲ្យ ហើយ​យុត្តិធម៌​ត្រូវ​បាន​គេ​មើល​ឃើញ​ថា កំពុង​ត្រូវបាន​បំពេញ​ដោយ​សាលាក្តី​ចម្រុះ​ផង​ដែរ។

​ក្រុម​អង្គការ​សង្គម​ស៊ីវិល បាន​លើក​ឡើង​ថា ការធានា​នូវ​យុត្តិធម៌​សម្រាប់​ការកាត់ទោស​មេ​ខ្មែរក្រហម ដើម្បី​ជា​កេរ​ដំណែល​រួម​របស់​សាលាក្តី​ចម្រុះ ដែល​បង្កើត​ឡើង​ដោយ​រដ្ឋាភិបាល​កម្ពុជា និង​អង្គការ​សហប្រជាជាតិ នឹងត្រូវ​ប្រើប្រាស់​ជា​គំរូ​សម្រាប់​ការកែ​ទំរង់ និង​ការអភិវឌ្ឍន៍​នីតិរដ្ឋ​នៅ​ប្រទេស​កម្ពុជា។

សេចក្តីថ្លែងការណ៍ បាន​កត់សម្គាល់​ថា ចៅក្រម​ទាំងអស់ ទោះបី​ចៅក្រម​ជាតិ​ក្តី ឬ​ចៅក្រម​អន្តរជាតិ​ក្តី តម្រូវ​ឲ្យ​ជា​បុគ្គល ដែល​មាន​ចរិត​លក្ខណៈ​ល្អ​ខ្ពង់ខ្ពស់ មិន​លំអៀង មាន​សុចរិត​ភាព និង​ឯករាជ្យ​ពេញលេញ ក្នុង​ការបំពេញ​មុខងារ​របស់​ខ្លួន។ ចៅក្រម​ទាំងអស់ ត្រូវ​ហាម​ទទួល​យក ឬ​ស្វែង​រក​ការណែនាំ​ណា​មួយ​ពី​រដ្ឋាភិបាល ឬ​ពី​ប្រភព​ណា​មួយ។ ចំពោះ​សហព្រះរាជ​អាជ្ញា​របស់​សាលាក្តី​ខ្មែរក្រហម ក៏​ត្រូវតែ​គោរព​ទៅ​តាម​លក្ខខណ្ឌ ស្តង់ដារ​ដូចគ្នា​ដែរ។

តាម​ក្រុម​អង្គការ​សង្គម​ស៊ីវិល ភាព​រីកចម្រើន​ថ្មីៗ ជុំវិញ​សំណុំ​រឿង​០០៣ និង ០០៤ បាន​ធ្វើ​ឲ្យ​យើង​មាន​ការព្រួយបារម្ភ​យ៉ាងខ្លាំង​អំពី​បញ្ហា​អព្យាក្រឹតភាព សេចក្តី​សុចរិត និង​ឯករាជភាព​របស់​ចៅក្រម ដែល​កំពុង​តែ​រង​នូវ​ភាព​មន្ទិល​សង្ស័យ។

ក្នុង​សេចក្តី​ថ្លែងការណ៍​រួម ក្រុម​អង្គការ​សង្គម​ស៊ីវិល បាន​អំពាវនាវ​ដល់​គ្រប់​ភាគី​ទាំងអស់ ឲ្យ​ចាត់​វិធានការ​សមរម្យ​ចាំបាច់​នានា ដើម្បី​ធានា​ថា ការស៊ើប​អង្កេត​លើ​សំណុំ​រឿង​០០៣ និង​០០៤ បាន​ពេញលេញ​ពិត​ប្រាកដ ដើម្បី​ជា​កំណត់​ត្រា​ប្រវត្តិសាស្ត្រ​នៃ​រឿងរ៉ាវ​ខ្មែរក្រហម ក្នុង​តុលាការ​ចម្រុះ។

​ការលើកឡើង​របស់​សង្គម​ស៊ីវិល​ខាងលើ បាន​ធ្វើ​ឡើង​ ក្រោយ​ពី​សហ​ចៅក្រម​ស៊ើប​អង្កេត និង​សហព្រះរាជ​អាជ្ញា​ជាតិ​-​អន្តរជាតិ បាន​ខ្វែង​គំនិត​គ្នា​លើ​សំណុំ​រឿង​ថ្មី លេខ ០០៣ និង ០០៤។ សហព្រះរាជ​អាជ្ញា​អន្តរជាតិ ចង់​ឲ្យ​សហ​ចៅក្រម​ស៊ើប​អង្កេត បើក​ការស៊ើប​អង្កេត​បន្ថែម​លើ​សំណុំ​រឿង​០០៣ ដើម្បី​ឈាន​ទៅ​ចោទ​ប្រកាន់ និង​ចាប់ខ្លួន​អតីត​មេ​ខ្មែរក្រហម មក​កាត់ទោស​បន្ថែម​ទៀត។ ក៏​ប៉ុន្តែ​ខាង​ភាគី​កម្ពុជា បាន​ជំទាស់។

​យ៉ាងណាក៏ដោយ លោក ឌឹម​សុវណ្ណារុំ អ្នក​នាំពាក្យ​សាលាក្តី​ខ្មែរក្រហម បាន​បញ្ជាក់​ថា ការងារ​នៅ​តុលាការ​ខ្មែរក្រហម គឺ​ឯករាជ្យ។ ចំណែក​ការងារ​របស់​សហ​ចៅក្រម​ស៊ើប​អង្កេត​លើ​សំណុំរឿង​០០៣ ឬ​០០៤ ក៏​ជា​ការងារ​ឯករាជ្យ គ្មាន​ភាគី​ណា​មួយ​ចូល​ជ្រៀតជ្រែក​ឡើយ។

​លោក ឌឹម សុវណ្ណារុំ បាន​បញ្ជាក់​ថា លើ​សំណុំ​រឿង​០០៣ កិច្ចការ​បន្ត ជា​ភារៈ​របស់​សហ​ចៅក្រម​ស៊ើប​អង្កេត ត្រូវ​ពិនិត្យ​លើ​ការបំពេញ​កិច្ច​របស់​សហ​ព្រះរាជ​អាជ្ញា។ បើសិន​ជា​សហចៅក្រម​ស៊ើប​អង្កេត បដិសេធ​ការ​ស្នើ​សុំ​របស់​សហព្រះរាជ​អាជ្ញា នោះ​សហព្រះរាជ​អាជ្ញា​អាច​​ប្តឹង​ឧទ្ធរណ៍ ទៅកាន់​អង្គ​បុរេ​ជំនុំ​ជម្រះ៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI