កម្ពុជា

សហ​ព្រះរាជអាជ្ញា​នៅ​តែ​តម្កល់​ទោស​ជាប់​ពន្ធនាគារ​មួយ​ជីវិត​ដល់​ជន​ជាប់​ចោទ​ដដែល​

សហព្រះរាជអាជ្ញាជាតិ លោក​ស្រី ជា លាង នៅ​ថ្ងៃដំបូងនៃសវនការសំនុំរឿង ០០២ វគ្គ១ កាលពី​ថ្ងៃទី១៦តុលា២០១៣
សហព្រះរាជអាជ្ញាជាតិ លោក​ស្រី ជា លាង នៅ​ថ្ងៃដំបូងនៃសវនការសំនុំរឿង ០០២ វគ្គ១ កាលពី​ថ្ងៃទី១៦តុលា២០១៣ @ECCC

បន្ទាប់​ពី​បាន​ឆ្លើយតប​នឹង​មេធាវី​ការពារ​ជន​ជាប់​ចោទ​រយៈពេល​ពេញ​មួយ​ថ្ងៃ​មក សហ​ព្រះរាជអាជ្ញា​បាន​ធ្វើ​សេចក្តី​សន្និដ្ឋាន​ចុង​ក្រោយ​ដោយ​នៅ​តែ​ទាមទារ​ឲ្យ​តុលាការ​ផ្តន្ទាទោស នួន ជា និង ខៀវ សំផន ឲ្យ​ជាប់​ពន្ធនាគារ​មួយ​ជីវិត​ដដែល។ សម្រាប់​សហ​ព្រះរាជអាជ្ញា គ្មាន​ទោស​ណា​ដែល​ស័ក្តិសម​សម្រាប់​ជន​ជាប់​ចោទ​ទាំងពីរ​ជាង​ទោស​ជាប់​ពន្ធណាគារ​មួយ​ជីវិត​ឡើយ។ ជន​ជាប់​ចោទ នួន ជា និង ខៀវ សំផន នឹង​ឡើង​ធ្វើ​សេចក្តី​សន្និដ្ឋាន​ការពារ​ខ្លួន​ចុង​ក្រោយ​នៅ​ថ្ងៃ​ព្រហស្បតិ៍​ទី ៣១ តុលា​ស្អែក​នេះ។

ផ្សាយពាណិជ្ជកម្ម

ទោះបីជា​ក្រុម​មេធាវី​ការពារ​ក្តី​ឲ្យ​លោក នួន ជា និង ខៀវ សំផន ខិតខំ​លើក​អំណះអំណាង​ការពារ​កូនក្តី​របស់ខ្លួន​យ៉ាងណាក៏ដោយ ក៏​សហ​ព្រះរាជអាជ្ញា​មិនបាន​បន្ធូរបន្ថយ​ការចោទប្រកាន់​ដល់​ជនជាប់ចោទ​ទាំងពីរ​ឡើយ។ នៅក្នុង​សេចក្តីសន្និដ្ឋាន​ចុងក្រោយ​របស់ខ្លួន​នៅ​ល្ងាច​ថ្ងៃ​ពុធ​នេះ សហ​ព្រះរាជអាជ្ញា​នៅតែ​រក្សា​ជំហរ​ដដែល​គឺ​ទាមទារ​ឲ្យ​តុលាការ​ផ្តន្ទាទោស​ជនជាប់ចោទ នួន ជា និង ខៀវ សំផន ឲ្យ​ជាប់ពន្ធនាគារ​អស់​មួយជីវិត។

សហ​ព្រះរាជអាជ្ញា​បាន​អះអាងថា​ទោស​នេះ​ស័ក្តិសម​នឹង​ឧក្រិដ្ឋកម្ម​ដែល​ពួកគេ​បាន​ប្រព្រឹត្ត​នៅក្នុង​ការជម្លៀស​ប្រជាជន​ដោយ​បង្ខំ​ទាំង​ពីរលើក​និង​ការកាប់​សម្រាប់​ទាហាន​និង​មន្ត្រី​នៃ​របប​លោក លន់ នល់។

សូមបញ្ជាក់ថា ពេញ​មួយថ្ងៃ​ពុធ​នេះ មេធាវី​នាំមុខ​ដើម​បណ្តឹងរដ្ឋប្បវេណី ក៏ដូចជា​សហ​ព្រះរាជអាជ្ញា​ដែរ បាន​បដិសេធ​ទាំងស្រុង​ទឡ្ហីករណ៍​នានា​របស់​ក្រុម​មេធាវី​ការពារ​ក្តី​ឲ្យ នួន ជា និង ខៀវ សំផន។ សម្រាប់​ពួកគេ បងធំ​ទី២ លោក នួន ជា និង អតីត​ប្រមុខរដ្ឋ​ខ្មែរក្រហម លោក ខៀវ សំផន មិនមែនជា​សុភាពបុរស​ដូចដែល​មេធាវី​របស់គេ​បានលើកឡើង​នោះឡើយ។

សហ​ព្រះរាជអាជ្ញា​អន្តរជាតិ​បាន​អះអាងថា ខ្មែរក្រហម​បានបង្ហាញ​ឲ្យ​កូនទាហាន​របស់ខ្លួន​ស្អប់ខ្ពើម​ប្រជាជន​ក្រុងភ្នំពេញ។ ពួកគេ​បាន​បង្ខំ​ឲ្យ​ពលរដ្ឋ​ចេញពីផ្ទះ​សម្បែង​ដោយ​គ្មាន​អាណិតអាសូរ និង​គ្មាន​លើកលែង​សូម្បី​ស្ត្រី​មាន​ផ្ទៃពោះ ចាស់ជរា និង​អ្នកជំងឺ​ក្នុង​មន្ទីរពេទ្យ។

គួររម្លឹកថា នៅក្នុង​សេចក្តីសន្និដ្ឋាន​របស់ខ្លួន លោក គង់ សំអុន បាន​ហៅ លោក ខៀវ សំផន ដែលជា​កូនក្តី​របស់ខ្លួន​ថា ជា​សុភាពបុរស​ដែល​ត្រូវបាន​គេ​លាប​ពណ៌​ជា​បិសាច។ លោក​បាន​ព្យាយាម​លើក​អំណះអំណាងផ្សេងៗមក​បញ្ជាក់ប្រាប់​តុលាការ​ថា ខៀវ សំផន ជា​មនុស្ស​ស្លូតបូត សុចរិត និង​មិន​ឃោរឃៅ​ដូច​ការចោទប្រកាន់​ឡើយ។ នៅ​ទីបំផុត ក្រុម​មេធាវី​ការពារ​ក្តី​ឲ្យ​លោក ខៀវ សំផន និង នួន ជា ទាំង​មេធាវី​ជាតិ និង​អន្តរជាតិ​បាន​សុំ​ឲ្យ​តុលាការ​ដោះលែង​កូនក្តី​របស់ខ្លួន​ឲ្យ​រួច​ផុតពី​ការចោទប្រកាន់។

ប៉ុន្តែ សហ​ព្រះរាជអាជ្ញា​មិនបាន​បន្ធូរបន្ថយ​ការចោទប្រកាន់​សូម្បីតែ​បន្តិច​ឡើយ។ នៅ​ថ្ងៃទី ៣១ តុលា​ស្អែក​នេះ​ដែលជា​ថ្ងៃ​ចុងក្រោយ​នៃ​ការសួរដេញដោល​បញ្ចប់​សំណុំរឿង ០០២ វគ្គ​ទី១ ជនជាប់ចោទ នួន ជា និង ខៀវ សំផន នឹង​ឡើង​ថ្លែង​ការពារ​ខ្លួន​ពី​ការចោទប្រកាន់។

នួន ជា គ្រោង​ប្រើពេល​មួយ​ម៉ោង​កន្លះ​សម្រាប់​ថ្លែងការណ៍ ខណៈដែល ខៀវ សំផន និង​មេធាវី​របស់គាត់​គ្រោង​ប្រើពេល​មិន​ដល់​មួយ​ម៉ោង​ទេ។ នេះ​បើតាម​ការប្រកាស​ឲ្យ​ដឹង​របស់​ក្រុម​មេធាវី​ការពារ​ជនជាប់ចោទ​ទាំងពីរ​នៅមុន​ពេល​បិទ​សវនាការ​ថ្ងៃនេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI