រុស្ស៊ី

ថ្ងៃនេះ ជាថ្ងៃ​ប្រវត្តិសាស្ត្រ​នៅ​រុស្ស៊ី នគរបាល ប្រែ​ឈ្មោះ​ទៅ​ជា “ប៉ូលិស”

ប៉ូលិស​រុស្ស៊ី​កំពុង​ចាប់​ខ្លួន​ក្រុម​បាតុករ​បក្ស​ប្រឆាំង
ប៉ូលិស​រុស្ស៊ី​កំពុង​ចាប់​ខ្លួន​ក្រុម​បាតុករ​បក្ស​ប្រឆាំង © Reuters

ច្បាប់​ស្តី​អំពី “ប៉ូលិស” ដែល​ចូល​ជា​ធរមាន​ចាប់ពី​ថ្ងៃ​ទី​១​មីនា​ឆ្នាំ ២០១១​នេះ​ទៅ បាន​ត្រូវ​ផ្តួចផ្តើម​បំផុស​មក គឺ​ដោយ​លោក ប្រធានាធិបតី Medvedev ផ្ទាល់​តែ​ម្តង ​ក្នុង​ក្របខ័ណ្ឌ​នៃ​នយោបាយ​ធ្វើ​ទំនើបកម្ម​ប្រទេស​រុស្ស៊ី។ តាម​ប្រសាសន៍​គាត់ ឈ្មោះ “ប៉ូលិស” នេះ គឺ​ធ្លាប់​មាន​នៅ​រុស្ស៊ី​សម័យ​ស្តេច Tsar ហើយ​ត្រូវ​គេ​និយម​ប្រើ​ នៅ​តាម​ប្រទេស​ស៊ីវីល័យ។

ផ្សាយពាណិជ្ជកម្ម

សេចក្តី​រាយការណ៍​របស់ កែវ ឆាយា ពីទីក្រុង​ម៉ូស្គូ

ជាបឋម គួរ​រំលឹក​ថា ពាក្យថា “នគរបាល” បាន​ចាប់​កំណើត​មក​នៅ​រុស្ស៊ី គឺ​នៅ​ថ្ងៃ ១០​វិច្ឆិកា ឆ្នាំ​១៩១៧ បានន័យ​ថា​៣​ថ្ងៃ​ក្រោយ​ពី​បដិវត្តន៍​សង្គមនិយម​ ផ្តួល​របប​គ្រប់គ្រង​ស្តេច Tsar មក។ ដូច្នេះ ​នគរបាល​ បាន​មាន​អត្ថិភាព​នៅ​សហភាព​សូវៀត បន្ទាប់​មក​នៅ​រុស្ស៊ី សរុប​ទៅ​គឺ​អស់​៩៤​ឆ្នាំ។ ចាប់​ពី​អំណើះ​តទៅ ចូល​ខ្លួន​ទៅ​ជំនួស​ពាក្យ “នគរបាល” គឺ​ពាក្យ​ថា “ប៉ូលិស” តែ​ម្តង។

តាំងពី​មាត្រា​ទី​១​ម៉្លេះ នៃ​ច្បាប់​នេះ គឺ​រំលេច​ឲ្យ​ឃើញ ពី​មនោគមវិជ្ជា​អាជីព​ផ្ទាល់​នៃ​អង្គការ​មហាផ្ទៃ​រុស្ស៊ី ៖ “ប៉ូលិស” មិនមែន​ជា​អ្វី​ដែល​ហៅ​ថា “ដាវ​បង្ក្រាប​របស់​មហាអំណាច” ទេ ហើយ​ក៏​មិនមែន​ជា “ឧបករណ៍​របស់​រដ្ឋ​សំរាប់​ប្រព្រឹត្ត​អំពើ​ហិង្សា”​ទៅ​លើ​ប្រជាជន​ឡើយ។ ភារកិច្ច​បឋម​ទីមួយ​របស់​“ប៉ូលិស” គឺ ការពារ​សិទ្ធិ​និង​សេរីភាព​ពលរដ្ឋ​ ប្រឈម​នឹង​ឧក្រិដ្ឋកម្ម ថែរក្សា​សណ្តាប់​ធ្នាប់​សង្គម ការពារ​កម្មសិទ្ធិ និង ធានា​ឲ្យ​មាន​សន្តិសុខ​សង្គម។

ក្នុង​បទ​អំពាវនាវ​ធ្វើ​ទៅ​កាន់​ប្រជាពលរដ្ឋ ក្នុង​ឱកាស​ចូល​ជា​ធរមាន​នៃ​ច្បាប់​ថ្មី លោក​រដ្ឋមន្ត្រី​ក្រសួង​មហាផ្ទៃ​រុស្ស៊ី Rashid Nurgaliev បាន​សំណូមពរ​គេ ឲ្យ​ពេល​និយាយ​ទៅ​កាន់ “ប៉ូលិស” គប្បី​ហៅ ភ្នាក់ងារ​ប៉ូលិស​នោះ​ថា “លោក​ប៉ូលិស”។

ស្រប​នឹង​ច្បាប់​ស្តីអំពី “ប៉ូលិស” “នគរបាល”​សព្វថ្ងៃ ដើម្បី​ក្លាយ​ទៅ​ជាប៉ូលិស គឺ​ត្រូវ​រង​វិញ្ញាសា​ជា​៣​ដំណាក់កាល ៖
-​ ដំណាក់​ទី១ គឺ ត្រូវ​រងតេស្ត​នៅ​ពីមុខ​គ្រូពេទ្យ​ចិត្តសាស្ត្រ ដែល​ចោទ​ជា​សំណួរ​កំប៉ិកកំប៉ុក ប្រមាណ ៦០០ សំណួរ ស្ទង់​ចិត្ត​គំនិត​សាមីជន។
- ដំណាក់ទី២ គឺ អំពី​អាការៈ​សុខភាព​អនាគត​ប៉ូលិស នៅ​ពី​មុខ “គណៈកម្មការ​ពេទ្យ​យោធា”។
- ដំណាក់កាល​ទី​៣ សាមីជន​ត្រូវ​ឆ្លើយ​នៅ​ពី​មុខ​ម៉ាស៊ីន ដែល​ស្ទង់​អំពី​ចរិយា​សុចរិត​ស្មោះត្រង់​របស់​គេ។

បើគេ​ប្រឡង​ធ្លាក់ គឺ​មិន​អាច​ក្លាយ​ជា ប៉ូលិស​ទេ។ បច្ចុប្បន្ន នៅ​រុស្ស៊ី មាន​នគរបាល​ចំនួន ១​លាន​៤​សែន​នាក់ ដែល​ក្នុង​ក្របខ័ណ្ឌ​នៃ​កំណែ​ទម្រង់ ទៅ​ទល់​ដើម​ឆ្នាំ ២០១២ ត្រូវ​កាត់​បន្ថយ​ឲ្យ​អស់​២០% ឬ​អស់ ២​សែន​៨​ម៉ឺន​នាក់ ដើម្បី​នៅ​សល់​ត្រឹម ១​លាន​១​សែន​២​ម៉ឺន​នាក់៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI