ចិន

Wen Jiabao ៖ អតិផរណា​ជា​បញ្ហា​ធំ តែ​គ្មាន​ទេ​ក្លិន​បដិវត្តន៍​ផ្កា​ម្លិះ​នៅ​ប្រទេស​ចិន

លោក​នាយក​រដ្ឋមន្ត្រី​ចិន Wen Jiabao នៅ​ក្នុង​ឱកាស​​បើក​សម័យ​ប្រជុំ​សភា​ជាតិ
លោក​នាយក​រដ្ឋមន្ត្រី​ចិន Wen Jiabao នៅ​ក្នុង​ឱកាស​​បើក​សម័យ​ប្រជុំ​សភា​ជាតិ Jason Lee / Reuters

មហា​សន្និបាត​សភា​ប្រជាជន​ចិន​ត្រូវ​បាន​បញ្ចប់ នៅ​ថ្ងៃ​ចន្ទ​ទី​១៤​មីនា​នេះ។ លោក​នាយក​រដ្ឋមន្ត្រី​ចិន​Wen Jiabao បាន​ធ្វើ​សន្និសីទ​សារព័ត៌មាន​មួយ ដើម្បី​គូស​បញ្ជាក់​ជា​ថ្មី​នូវ​ការ​ប្តេជ្ញា​ចិត្ត​របស់​រដ្ឋាភិបាល ក្នុង​ការ​ប្រយុទ្ធ​ទប់ទល់​នឹង​បញ្ហា​ទំនិញ​ឡើង​ថ្លៃ។ លោក​Wen Jiabao ក៏​បាន​លើក​ឡើង​ដែរ​អំពី​បដិវត្តន៍​ផ្កា​ម្លិះ​នៅ​ក្នុង​ពិភព​អារ៉ាប់ និង​អំពី​កំណែទម្រង់​នយោបាយ។

ផ្សាយពាណិជ្ជកម្ម

 

សេចក្តី​រាយការណ៍​របស់ តាន់ ហ្សង់-ហ្វ្រង់ស័រ

ចំពោះ​លោក​Wen Jiabao ការ​ប្រយុទ្ធ​ទប់ទល់​នឹង​អតិផរណា គឺ​ជា​អាទិភាព​សំខាន់​ជាង​គេ​មួយ​បង្អស់​របស់​រដ្ឋាភិបាល​ចិន ពីព្រោះ​តាម​សំដី​របស់​លោក បញ្ហា​ទំនិញ​ឡើង​ថ្លៃ គឺ​ដូច​សត្វ​ខ្លា​អ៊ីចឹង បើ​វា​រួច​ពី​ទ្រុង​ហើយ ពិបាក​នឹង​ស្ទាក់​ចាប់​វា​បាន​មក​វិញ​ណាស់។ ប៉ុន្មាន​ខែ​ចុង​ក្រោយ​នេះ អតិផរណា​ចេះ​តែ​កើន​ឡើង កើន​ប្រមាណ​ជាង​៤​ភាគ​រយ កាល​ពី​ខែ​មករា​កន្លង​ទៅ និង​ប្រមាណ​៤,៩​ភាគ​រយ​នៅ​ខែ​កុម្ភៈ​មុន​នេះ។ រដ្ឋាភិបាល​ចិន​បារម្ភ​ខ្លាច​ទំនិញ​ឡើង​ថ្លៃ ជាពិសេស​ស្បៀង​អាហារ​ឡើង​ថ្លៃ បង្ក​ឲ្យ​មាន​ការ​ងើប​បះបោរ​ឬ​បាតុកម្ម​ផ្សេងៗ​នា​ពេល​ខាង​មុខ។

នា​ឱកាស​សន្និសីទ​សារព័ត៌មាន​ដដែល​នោះ លោក​Wen Jiabao ក៏​បាន​និយាយ​បន្តិចបន្តួច​ដែរ​ពី​បដិវត្តន៍​ផ្កា​ម្លិះ​នៅ​ក្នុង​ពិភព​អារ៉ាប់។ ចំពោះ​លោក​ប្រមុខ​រដ្ឋាភិបាល​ចិន អ្វី​ដែល​បាន​និង​កំពុង​បន្ត​កើត​ឡើង​នៅ​មជ្ឈិម​បូព៌ា​និង​នៅ​អាហ្វ្រិក​ខាង​ជើង មិន​អាច​កើត​មាន​ឡើយ នៅ​ក្នុង​ប្រទេស​ចិន ដ្បិត​សង្គម​ចិន​និង​សង្គម​អារ៉ាប់​មិន​ដូច​គ្នា​ទេ។

យ៉ាង​ណា​ក៏​ដោយ លោក​Wen Jiabao ទទួល​ស្គាល់​ថា ការ​ធ្វើ​កំណែ​ទម្រង់​នយោបាយ​ជា​ការ​មួយ​ចាំ​បាច់ ពីព្រោះ​តាម​សំដី​របស់​លោក«បើ​គ្មាន​កំណែ​ទម្រង់​នយោបាយ កំណែ​ទម្រង់​សេដ្ឋកិច្ច​នឹង​មិន​អាច​បន្ត​មាន​ដំណើរ​ការ​ទៅ​មុខ​ទៀត​បាន​ទេ ហើយ​លទ្ធផល​ដែល​ប្រទេស​ជាតិ​ទទួល​បាន​មក​ទល់​ពេល​នេះ ក៏​នឹង​រលាយ​សាប​សូន្យ​អស់​ទៅ​វិញ​ដែរ»។ ប៉ុន្តែ​លោក​ប្រមុខ​រដ្ឋាភិបាល​ចិន​ដែល​បាន​និយាយ​ពី​កំណែ​ទម្រង់​នយោបាយ​នេះ រួច​ម្តង​ទៅ​ហើយ កាល​ពី​ខែ​សីហា​ឆ្នាំ​ទៅ​មិញ មិន​បាន​ពន្យល់​ច្បាស់​ទេ នូវ​អ្វី​ដែល​លោក​ហៅ​ថា កំណែ​ទម្រង់​នយោបាយ​នោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI