អានតួអត្ថបទ
កម្ពុជា

អ.ស.ប.​​បារម្ភ​ពី​ការយឺតយ៉ាវ ចំពោះ​ការតែង​​តាំង​ចៅក្រម​ស៊ើប​អង្កេត​អន្តរជាតិ

លោក​Laurent Kasper Ansermet​សហចៅក្រម​បម្រុង​ នៅមិន​ទាន់​ទទួលការតែងតាំង​ជា​ផ្លូវការ​ជា​សហចៅក្រម​ស៊ើបអង្កេត​អន្តរជាតិ
លោក​Laurent Kasper Ansermet​សហចៅក្រម​បម្រុង​ នៅមិន​ទាន់​ទទួលការតែងតាំង​ជា​ផ្លូវការ​ជា​សហចៅក្រម​ស៊ើបអង្កេត​អន្តរជាតិ ©ECCC
ដោយ៖ លី ម៉េងហួរ
២០ នាទី

មន្ត្រីអង្គការសហប្រជាជាតិ បានសម្តែង​ការព្រួយបារម្ភ ចំពោះ​រដ្ឋាភិបាល​កម្ពុជា ដែល​បាន​ពន្យារ​ពេល​តែងតាំង​សហចៅក្រម​ស៊ើប​អង្កេត​អន្តរជាតិ​ថ្មី នៅ​តុលាការ​ខ្មែរក្រហម។ ក៏​ប៉ុន្តែ​មន្ត្រី​អ្នក​នាំពាក្យ​សាលាក្តី​ខ្មែរក្រហម លោក នេត្រ ភក្ត្រា លើក​ឡើង​ថា ការ​តែងតាំង​ចៅក្រម​ថ្មី​នេះ ស្ថិត​នៅ​ក្នុង​ដំណើរការ​នីតិវិធី ដែល​តុលាការ​ខ្មែរក្រហម ក៏​កំពុង​ទន្ទឹង​រង់ចាំ​ការសម្រេច​នោះ​ផង​ដែរ។

ផ្សាយពាណិជ្ជកម្ម

មន្ត្រី​អង្គការសហប្រជាជាតិ បាន​សម្តែង​ជា​ព្រួយបារម្ភ​ជាខ្លាំង ចំពោះ​រដ្ឋាភិបាល​កម្ពុជា ដែល​បាន​ពន្យារពេល មិន​ព្រម​តែងតាំង​សហ​ចៅក្រម​ស៊ើបអង្កេត​អន្តរជាតិ​ថ្មី នៅ​តុលាការ​ខ្មែរ​ក្រហម ដើម្បី​ដំណើរការ​ករណី​០០៣ និង​០០៤ ដែល​ជា​សំណុំរឿង ត្រូវ​បាន​ជំទាស់​ដ៏​ខ្លាំងក្លា​ពី​រដ្ឋាភិបាល​កម្ពុជា។ នេះ​បើ​តាម​ការបញ្ជាក់​របស់​អ្នកនាំពាក្យ​អគ្គលេខាធិការ​អង្គការសហ​ប្រជា​ជាតិ បាន​ប្រាប់​ទីភ្នាក់ងារ​សារព័ត៌មាន​បារាំង AFP នៅ​ថ្ងៃ​ពុធ​នេះ។

 
​អ្នកនាំពាក្យ Martin Nesirky បាន​បន្តែមថា អង្គការសហប្រជាជាតិ បាន​ប្រឹងប្រែង​ដើម្បី​ជំរុញ​ឲ្យមាន​ការតែង​តាំង​សហ​ចៅក្រម​ថ្មី ដែល​កម្ពុជា​ត្រូវមាន​កាតព្វកិច្ច ដើម្បី​តែងតាំង​ចៅក្រម​បម្រុង​អន្តរជាតិ សម្រាប់​ដំណើរការ​រឿងក្តី នៅ​តុលាការ​ចម្រុះ​នោះ។

សហ​ចៅក្រម​ស៊ើបអង្កេត​អន្តរជាតិ​បម្រុង ជនជាតិ​ស្វីស លោក Laurent Kasper Ansermet បាន​មក​ដល់​ភ្នំពេញ ចាប់តាំងពី​ខែ​ធ្នូ ដើម្បី​ត្រៀម​ខ្លួន​ចូល​ជំនួស​កៅអី​ចៅក្រម​អាល្លឺម៉ង់ ដែល​បាន​លាលែង កាលពី​ខែតុលា ខណៈ​ដែល​មាន​ការជំទាស់​ពី​រដ្ឋាភិបាល​កម្ពុជា លើ​ដំណើរការ​ស៊ើបអង្កេត​រឿងក្តី​ថ្មី ២ ទៀត ក្នុង​ចន្លោះ​របប​ខ្មែរក្រហម ពី​ឆ្នាំ​១៩៧៥ ដល់​ឆ្នាំ​១៩៧៩។

ក៏​ប៉ុន្តែ​រដ្ឋាភិបាល​កម្ពុ​ជា ចាប់តាំងពី​ខែ​តុលា មកដល់ពេលនេះ មិនទាន់​បាន​តែងតាំង​ចៅក្រម​ថ្មី​នៅឡើយ​ទេ។

ការតែងតាំង​ចៅក្រម​ស៊ើបអង្កេត​អន្តរជាតិ​ថ្មី​នៅ​តុលាការ​ខ្មែរក្រហម ក៏​ត្រូវ​បាន​លើកឡើង កាលពី​ថ្ងៃ​២០ ខែតុលា ឆ្នាំ​២០១១ ក្នុង​កិច្ចពិភាក្សា​ទ្វេភាគី រវាង​អគ្គលេខាធិការរង​អង្គការសហប្រជាជាតិ ទទួលបន្ទុក​កិច្ចការ​ច្បាប់ លោកស្រី Patricia O’Brien ជាមួយ​លោក សុខ អាន តំណាង​រដ្ឋាភិបាល​កម្ពុ​ជា ទទួលបន្ទុក​កិច្ចការ​សាលាក្តី​ខ្មែរក្រហម។

នៅ​ថ្ងៃ​ពុធ​នេះ លោក​នេត្រ ភ​ក្ត្រា អ្នកនាំពាក្យ​សាលាក្តី​ខ្មែរក្រហម បាន​លើកឡើង​ថា ការតែងតាំង​ចៅក្រម​អន្តរជាតិ​ថ្មី​នោះ កំពុង​ស្ថិត​ក្នុង​ដំណើរការ​នីតិវិធី តែ​មិន​ដឹង​ពេលណា ត្រូវបាន​គេ​ប្រកាស​ឡើយ។

ចំណែក​មន្ត្រី​ក្រសួង​យុត្តិធម៌ បានបញ្ជាក់​ថា បាន​ទទួល​លិខិត​ពី​អង្គការ​សហប្រជាជាតិ ដើម្បី​ស្នើសុំ​ពិភាក្សា​លើ​បញ្ហា​នោះ​ហើយ។ តែ​មិនដឹងថា កិច្ចប្រជុំ​នោះ នឹង​ធ្វើ​នៅ​ពេល​ណា​ទេ។​

លោក ឯក ថា អ្នកនាំពាក្យ​អង្គភាព​ព័ត៌មាន និង​ប្រតិកម្ម​រហ័ស របស់​ទីស្តីការគណៈរដ្ឋមន្ត្រី បាន​លើកឡើង​ថា រដ្ឋាភិបាល​គ្មាន​ហេតុផល​ណា ចង់​ពន្យារពេល​លើ​ដំណើរការ​កាត់ទោស​មេ​ខ្មែរក្រហម​ទេ​។ ផ្ទុយ​ទៅ​វិញ​រដ្ឋាភិបាល ជំរុញ​ឲ្យមាន​ការកាត់​ទោស​មេ​ខ្មែរក្រហម​ធ្វើ​ដោយ​រលូន និង​ឆាប់រហ័ស ព្រោះ​មេ​ខ្មែរក្រហម​ទាំង​នោះ​ចាស់ជរា​ហើយ។

តាម​អ្នកនាំពាក្យ ចំពោះ​ការយឺតយ៉ាវ​នៃ​ការតែងតាំង​ចៅក្រម​អន្តរជាតិ​ថ្មី​នោះ ស្ថិតនៅលើ​ចំណាត់ការ​របស់​ឧត្តមក្រុមប្រឹក្សា​នៃអង្គចៅក្រម។

កាលពី​ថ្ងៃ​ចន្ទ សហ​ចៅក្រមជាតិ លោក យូ ប៊ុនឡេង បាន​បដិសេធ មិន​ធ្វើការ​ជាមួយ​លោក​ចៅក្រម​បម្រុង ដោយ​អះអាង​ថា ចៅក្រម​អន្តរជាតិ​នោះ មិនទាន់​ទទួលបាន​ការតែងតាំង​ជា​ផ្លូវការ​នៅឡើយ។ រីឯ​ចៅក្រម​បម្រុង បាន​ចោទ​លោក​យូ ប៊ុនឡេង​ថា មានបំណង​រារាំង នូវ​ព័ត៌មាន​សំខាន់ៗ លើ​សំណុំរឿង​០០៣ និង​០០៤ ដែល​ជា​ការចោទប្រកាន់​លើ​អតីត​មេខ្មែរក្រហម ៥ រូប​បន្ថែម​ទៀត ដើម្បី​នាំ​មក​កាត់ទោស ក្នុង​សំណុំរឿង​ឧក្រិដ្ឋកម្ម​ប្រឆាំង​មនុស្សជាតិ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ