ភូមា-អាមេរិក

លោក​​អូបាម៉ា​ប្រកាស​បន្ត​ដាក់​ទណ្ឌកម្ម​លើ​ភូមា

លោកប្រធានាធិបតី​អាមេរិក បារ៉ាក់ អូបាម៉ា
លោកប្រធានាធិបតី​អាមេរិក បារ៉ាក់ អូបាម៉ា © Reuters

ប្រធានាធិបតី​អាមេរិក លោក បារ៉ាក់​ អូបាម៉ា ប្រកាស​បន្ត​ដាក់​ទណ្ឌកម្ម​លើ​ប្រទេស​ភូមា មួយ​ឆ្នាំ​បន្ថែម​ទៀត​នៅថ្ងៃ​សុក្រ​ម្សិលមិញ ព្រោះ​សម្រាប់​សហរដ្ឋ​អាមេរិក ភូមា​ជា​ប្រទេស​មិន​គោរព​លទ្ធិ​ប្រជាធិបតេយ្យ និង​ជា​ប្រទេស​គ្រោះ​ថ្នាក់​​ដល់​ស្ថិរភាព​ជាតិ​និង​អាមេរិក។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

បើ​យោង​តាម​ឯកសារ​ផ្លូវ​ការ​ ដែល​សេតវិមាន​បាន​ចុះ​ផ្សាយ​នៅ​ថ្ងៃ​សុក្រ​ម្សិលមិញ លោក​ប្រធានាធិបតី​អាមេរិក បារ៉ាក់​ អូបាម៉ា បាន​សម្រេច​ចិត្ត​បន្ត​ប្រើ​​វិធានការ​ដាក់​ទណ្ឌកម្ម​​លើ​ប្រទេស​ភូមា ដែល​អាមេរិក​បាន​តាក់​តែង​ឡើង​តាំង​ពី​ក្នុង​រដ្ឋការ​លោក​ប៊ីល គ្លីនតុន (Bill Clinton)ក្នុង​ឆ្នាំ​១៩៩៧។ វិធានការ​ដែល​ជានិច្ចជាកាល​ត្រូវ​បាន​ប្រធានាធិបតី​អាមេរិក​ក្រោយៗ​ទៀត ឲ្យ​តម្លៃ​ និង​ថែម​ថយ​ចំណុច​ខ្លះ​ដើម្បី​ឲ្យ​កាន់​តែ​មាន​ប្រសិទ្ធភាព។

វិធានការ​ដាក់​ទណ្ឌកម្ម​នេះ គឺ​គ្មាន​អ្វី​ក្រៅ​ពី បន្ត​ហាម​ឃាត់​មិន​បញ្ជូន​សហគ្រាស​អាមេរិក​ទៅ​ដាក់​វិនិយោគ​ទុន​នៅ​ភូមា ហាម​ឃាត់​មិន​ឲ្យ​ភូមា​នាំ​ផលិតផល​របស់​ខ្លួន​មក​កាន់​ទី​ផ្សារ​អាមេរិក។

សូម​បញ្ជាក់​ថា សេចក្តី​សម្រេច​បន្ត​ដាក់​ទណ្ឌកម្ម​​សេដ្ឋកិច្ច​លើ​ភូមា​នេះ ធ្វើ​ឡើង​បួន​ថ្ងៃ​ប៉ុណ្ណោះ បន្ទាប់​ពី​ប្រេសិត​អាមេរិក​ លោក Kurt Cambell បាន​អញ្ជើញ​ទៅ​បំពេញ​ទស្សនកិច្ច​នៅ​ភូមា និង​បាន​ជួប​ប្រាស្រ័យ​ជាមួយ​ប្រមុខ​បក្ស​ប្រឆាំង លោកស្រី​ អ៊ុង សានស៊ូជី ដែល​របប​សឹក​បាន​ច្រាន​ចេញ​ពី​ការ​បោះ​ឆ្នោត​សភា​ កាលពី​ថ្ងៃ​ច័ន្ទ​ដើម​សប្តាហ៍​មក។ សម្រាប់​អាមេរិក សកម្មភាព​នយោបាយ​របស់​របប​សឹក​ក្រុង​រ៉ង់ហ្គូន នៅ​តែ​ជា​គ្រោះ​ថ្នាក់​ដ៏​ចំបង​មួយ​ចំពោះ​ស្ថិរភាព​ជាតិ និង​នយោបាយ​បរទេស​របស់​សហរដ្ឋ​អាមេរិក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI