ឥណ្ឌូនេស៊ី

ទស្សនកិច្ច​រយៈពេល​២៤​ម៉ោង​របស់​លោក បារ៉ាក អូបាម៉ា នៅ​ឥណ្ឌូនេស៊ី

ប្រធានាធិបតី​អាមេរិក លោក បារ៉ាក អូបាម៉ា និង​ភរិយា ពេល​អញ្ជើញ​ដល់​ទីក្រុងDjakarta ថ្ងៃ​ទី​៩វិច្ឆិកា ២០១០
ប្រធានាធិបតី​អាមេរិក លោក បារ៉ាក អូបាម៉ា និង​ភរិយា ពេល​អញ្ជើញ​ដល់​ទីក្រុងDjakarta ថ្ងៃ​ទី​៩វិច្ឆិកា ២០១០ REUTERS/Jason Reed

ក្នុង​ដំណើរ​មក​ពី​ប្រទេស​ឥណ្ឌា​ ​ លោក​ប្រធានាធិបតី​អាមេរិកាំង​បារ៉ាក​ អូបាម៉ា​អញ្ជើញ​មក​បំពេញ​ទស្សនកិច្ច​រយៈពេល​២៤ម៉ោង​ នៅ​ថ្ងៃ​អង្គារ​៩​វិច្ឆិកា​នេះ​នៅ​ឥណ្ឌូនេស៊ី​ជា​ប្រទេស​ដែល​គាត់​បាន​ ស្នាក់​អាស្រ័យ​នៅ​អស់​មួយ​ភាគ​នៃ​កុមារភាព​របស់​គាត់។ ប្រជាជន​ឥណ្ឌូនេស៊ី​ មាន​ការខក​ចិត្ត​ ដោយ​ហេតុ​ការលុប​ចោល​អស់​២ដង​ទស្សនកិច្ច​របស់​គាត់​ ចាប់​ពី​ដើម​ឆ្នាំ​នេះ​មក​គឺ​នៅ​ខែ​មីនា​ម្ដង​ បន្ទាប់​មក​នៅ​ខែ​មិថុនា​ម្ដង​ទៀត​ ​ ដោយ​ហេតុ​តែ​មាន​ការតស៊ូ​មតិ​ នៅ​ទីក្រុង​វ៉ាស៊ិនតោន​ស្តីពី​កំណែ​ទម្រង់​ប្រព័ន្ធ​សុខាភិបាល​និង​គ្រោះ​ មហន្តរាយ​ប្រេងកាត​អណ្តែត​រាយ​ពពាយ​នៅ​លើ​ផ្ទៃ​ទឹក​សមុទ្រ​ក្នុង​តំបន់​ឈូង​ សមុទ្រ​ម៉ិចស៊ិច។

ផ្សាយពាណិជ្ជកម្ម

សេចក្តី​រាយការណ៍​របស់ Solenn Honorine ប្រែសម្រួល​ដោយ ​វីនស្តុន​ រតនា

ឥឡូវ​នេះ​គឺ​ជា​ការប្រាកដ​និង​ជា​ផ្លូវ​ការ​ទៀត​ផង​គឺ​លោក​បារ៉ាក​ អូបាម៉ា​នឹង​ពិសា​ នៅ​ល្ងាច​ថ្ងៃ​អង្គារ​នេះ​ ម្ហូប​bakso​និង​nasi​ goreng​ជា​ម្ហូប​២មុខ​ដែល​ប្រជាជន​ឥណ្ឌូនេស៊ី​និយម​ចូល​ចិត្ត​បំផុត។

ម្ហូប​ដែល​ត្រូវ​លោក​ប្រធានាធិបតី​អាមេរិកាំង​និយម​ចូល​ចិត្ត​តាំង​ពី​៤០ឆ្នាំ​មុន​ ត្រូវ​ជន​ជាតិ​ឥណ្ឌូនេស៊ី​ស្គាល់​ច្បាស់​ណាស់​ដែល​ផ្តល់​ជា​មោទនភាព​ដល់​គេ​ នៅ​ក្នុង​ទំនាក់​ទំនង​ជាមួយ​លោក​ប្រធានាធិបតី​អាមេរិកាំង​ដែល​ជា​”​ បុត្រ​នៃ​ប្រទេស​ “​។នេះ​ហើយ​ជា​ទិដ្ឋភាព​មនោសញ្ចេតនា​នៃ​ទស្សនកិច្ច​ដែល​នឹង​ត្រូវ​ប្រឈម​មុខ​នឹង​សាច់ការ​ផង​ដែរ។

នៅ​ល្ងាច​ថ្ងៃ​អង្គារ​នេះ​ ​ ប្រធានាធិបតី​នៃ​ប្រទេស​ទាំង​ពីរ​នឹង​ត្រូវ​ចុះ​កិច្ច​ព្រម​ព្រៀង​ជា​ដៃ​គូ​សកល​ដែល​គ្រប​ដណ្តប់​ទាំង​ជំនួយ​ក្នុង​វិស័យ​អាកាស​ធាតុ​ប្រែប្រួល​ ​ ទាំង​វិស័យ​ឩត្តមសិក្សាធិការ​ ​ ពី​ព្រោះ​រដ្ឋការ​វ៉ាស៊ិនតោន​ប្រាថ្នាចង់​រឹត​ឡើង​វិញ​ចំណង​ដែល​បាន​ធូរ​ស្ពែត​ ចាប់​តាំង​ពី​ទសវត្ស​ឆ្នាំ​១៩៩០​ជាមួយ​ប្រទេស​នេះ​ត្រូវ​ចាត់​ទុក​ជា​ដៃ​គូ​ចំណាត់​ថ្នាក់​លេខ១​នៅ​ក្នុង​ភូមិភាគ​។

ជា​ប្រទេស​ទី​៤​ដែល​មាន​ចំនួន​បណ្តាជន​ច្រើន​បំផុត​នៅ​លើ​ពិភពលោក​ ​ ​ ជា​របប​ប្រជាធិបតេយ្យ​ដោយ​បណ្តាជន​ភាគ​ច្រើន​ជា​អ្នក​កាន់​សាសនា​អ៊ីស្លាម​និង​ជា​សេដ្ឋកិច្ច​ទី១​ នៅ​អាស៊ី​អាគ្នេយ៍​ដែល​មាន​អ្វី​មួយ​ដែល​បាន​ទាក់​ទាញ​ទឹក​ចិត្ត​ប្រទេស​ដទៃ​ទៀត​មាន​ជាអាទិ៍​ ប៉េកាំង​គឺ​គណៈប្រតិភូ​businessmen​មួយ​ទើប​នឹង​បាន​សន្យា​ថា​ នឹង​ធ្វើ​វិនិយោគ​ទុន​ជាង​៦០០០លាន​ដុល្លារ​ ដើម្បី​សាង​សង់​ហេដ្ឋារចនាសម្ព័ន្ធ​នៅ​ឥណ្ឌូនេស៊ី។

ដោយ​បាន​ឃើញ​តំបន់​អាស៊ី​កំពុង​តែ​កើន​មហិទ្ធិឫទ្ធិ​ ​ ឥណ្ឌូនេស៊ី​ដែល​ត្រូវ​បាន​គេ​បំភ្លេច​ចោល​យូរពេល​ ប៉ុន្តែ​ឥឡូវ​ជា​សមាជិក​ក្រុម​ប្រទេស​G-20​ ប្រហែល​អាច​នឹង​ក្លាយ​ទៅ​ជា​ប្រទេស​មួយ​ដ៏​សំខាន់​ជាង​មុន​ នៅ​លើ​ពិភពលោក៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI