អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

លោកអូបាម៉ា​រំពឹង​លើ​ក្រុម​ប្រទេស​អ៊ីស្លាម​ក្នុង​ការ​ប្រយុទ្ធ​នឹង​ពួក​ជីហាត​រដ្ឋ​អ៊ីស្លាម

សំឡេង ០៦:៤៩
លោក​ប្រធានាធិបតី​អាមេរិក Barack Obama ប្រកាស​បង្កើត​សម្ព័ន្ធ​អន្តរជាតិ​ដើម្បី​កម្ខាត់​ពួក​ជីហាត នៅ​ពេល​បិទ​ជំនួប​កំពូល​អូតង់ ថ្ងៃទី ៥ កញ្ញា ២០១៤
លោក​ប្រធានាធិបតី​អាមេរិក Barack Obama ប្រកាស​បង្កើត​សម្ព័ន្ធ​អន្តរជាតិ​ដើម្បី​កម្ខាត់​ពួក​ជីហាត នៅ​ពេល​បិទ​ជំនួប​កំពូល​អូតង់ ថ្ងៃទី ៥ កញ្ញា ២០១៤ REUTERS/Larry Downing
ដោយ៖ អៀង សុខម៉ិញ
៣៥ នាទី

កម្ចាត់​​ពួក​ជីហាត​រដ្ឋ​អ៊ីស្លាមឱ្យ​អស់​​ គឺ​ជា​កម្មវត្ថុមួយ​​របស់​លោក​អូបាម៉ា នា​ឱកាស​ជំនួប​កំពូល​អូតង់ ដែល​ទើប​បិទ​បញ្ចប់​នៅ​យប់​មិញ។ លោកប្រធានាធិបតី​អាមេរិក​ប្រកាសសន្យា​​យក​ឈ្នះឱ្យ​បាន​​ពួក​ជីហាត​អ៊ីស្លាម ដែល​បានបង្ក​សោកនាដកម្ម នៅ​ប្រទេស​អ៊ីរ៉ាក់ និង​នៅ​ស៊ីរី ​! ដើម្បី​សម្រេច​កម្មវត្ថុ​បោស​សម្អាត​គាស់​ឬស​គាស់​គល់ពួក​ជីហាត​រដ្ឋ​អ៊ីស្លាម​ឱ្យ​អស់​បាន​ សម្ព័ន្ធអន្តរជាតិ​មួយ​ គ្រោង​នឹង​បង្កើត​ឡើង​ ដោយ​មាន​ប្រទេស​ចំនួន​៩​ត្រៀម​ខ្លួន​ចូល​សហការ មាន​ជា​អាទិ៍​បារាំង​ អង់គ្លេស អាល្លឺមង់ អ៊ីតាលី​ ឬ​ក៏​តួកគី​ផង។ តើ​អាមេរិក​មាន​​យុទ្ធសាស្ត្រ​ យ៉ាងណា ? មាន​មធ្យោបាយ​ដូចម្តេច​ខ្លះ ?

ផ្សាយពាណិជ្ជកម្ម

លោក​ប្រធានាធិបតី​អាមេរិក បារ៉ាក់ អូបាម៉ា កំពុង​តែ​ស្វះ​ស្វែង​​បង្កើត​​សម្ព័ន្ធ​អន្តរជាតិ មួយ​ដើម្បី​​មាន​សមត្ថភាព​កម្ទេច​ពួក​ជីហាត​រដ្ឋ​អ៊ីស្លាម​ ដែល​អាមេរិក​ចាត់​ទុក​ថា​ជា​មេរោគ​ជំងឺ​មហារីក​ប្រចាំ​សតវត្សរ៍​ទី​ ​២១។ សកម្មភាព​យោធា​នៅ អ៊ីរ៉ាក់ ឬ​ធ្លាយ​ដល់​ស៊ីរី អាច​ជា​ជម្រើស​មួយ​របស់​អាមេរិក​ផង។ លោក​បារ៉ាក់​អូបាម៉ា ត្រូវ​ខិត​ខំ​ប្រមូល​ការ​គាំទ្រ​ឱ្យ​បាន​ច្រើន​បំផុត ហើយ​សង្ឃឹម​ថា​នឹង​អាច​ទាក់ទាញ​បណ្តា​ប្រទេស​ក្នុង​តំបន់​ដើម​បូព៌ា​ចូល​រួម​ដែរ។ ប៉ុន្តែរហូត​ដល់​ដំណាច់​ខែ​កញ្ញា​ និង​មុន​មហាសន្និបាទ​​​អង្គការ​សហប្រជាជាតិ​​ គ្មាន​​ទេសេចក្តី​សម្រេច​ចិត្ត​ដាច់​ណាត់។

 
សន្និសីទ​អន្តរជាតិស្តីពី​អ៊ីរ៉ាក់​​ដើម្បី​បង្កើត​សម្ព័ន្ធ​អន្តរជាតិ

ម្សិលមិញ ក្រៅ​ក្រប​ខ័ណ្ឌ​ជំនួប​ប្រជុំ​អូតង់​ តំណាង​១០​ប្រទេស​មាន​ជាអាទិ៍ សហរដ្ឋ​អាមេរិក អង់គ្លេស បារាំង អាល្លឺម៉ង់ អ៊ីតាលី តួកគី ប៉ូឡូញ ដាណឺម៉ាក កាណាដា និង​អូស្ត្រាលី បាន​ផ្តើម​ជួប​ជុំ​ប្រមូល​កម្លាំង​គ្នា​ធ្វើ​ជា​គ្រឹះ​សម្រាប់ប​ង្កើត​ស្ថាប័ន​សម្ព័ន្ធ​អន្តរជាតិឡើង។ រដ្ឋមន្ត្រី​ការបរទេស​ និង​ការពារ​ជាតិ​អាមេរិក ចង់​ឱ្យ​ស្ថាប័ន​នេះ​ចេញ​ជា​រូបរាង​ដោយ​ឆ្លង​កាត់​​មហាសន្និបាទ​អង្គការ​សហប្រជាជាតិ​សិន។ ព្រោះ​ទាំង​បារាំង​និង​ទាំង​អង់គ្លេស សុទ្ធ​តែ​បាន​គូស​បញ្ជាក់​អំពី​ភាព​ចាំ​បាច់ ក្នុងការ​ស្នើ​សុំ​ជា​ផ្លូវ​ការ​ ទៅ​​ប្រទេស​អ៊ីរ៉ាក់​​ជា​អ្នក​ពាក់ព័ន្ធ​ផ្ទាល់​​និងទៅ​​ក្រុមប្រឹក្សាសន្តិសុខ​អង្គការ​សហប្រជាជាតិ មុន​នឹង​បញ្ចេញ​សកម្មភាពលើ​ទឹក​ដី​អ៊ីរ៉ាក់។

សម្ព័ន្ធ​មិត្ត​ទាំង​៩​ បានព្រមព្រៀង​ទទួល​យក​គោលការណ៍​បង្កើត​សម្ព័ន្ធ​អន្តរជាតិ​ និង​សន្យា​ជួយ​ចែក​រំលែក​បន្ទុក​អាមេរិក​ក្នុង​ការ​កម្ចាត់​ពួក​ជីហាត​អ៊ីស្លាម​​នៅ​អ៊ីរ៉ាក់ និង​ចែក​រំលែក​​ព័ត៌មាន​គ្នា​ទៅ​វិញ​ទៅ​មក។ ប៉ារីស​បាន​ស្នើ​ធ្វើ​ជា​ម្ចាស់​ផ្ទះ​ទទួល​រៀប​ចំ​​សន្និសីទ​អន្តរជាតិ​ ដើម្បី​បង្កើត​សម្ព័ន្ធ​អន្តរជាតិ​ឱ្យ​ចេញ​​រូប​រាង។ ចំណែក​ប្រមុខ​ការទូត​អាមេរិក​ នឹង​ត្រូវ​ចុះ​ទៅ​ស្វែង​រក​ការ​គាំទ្រ​ចាំ​បាច់​នៅ​តំបន់​ ដោយ​ធ្វើ​ដំណើរ​ទៅ​កាន់​​តំបន់​ដើមបូព៌ា​នា​ពេល​ចុង​សប្តាហ៍​នេះ​ ព្រមទាំង​ដើម្បី​ពិចារណា​លើ​សម្មតិកម្ម​ធ្វើ​អន្តរាគមន៍​យោធា​នៅ​អ៊ីរ៉ាក់​ និង​ ស៊ីរី។

ការ​ចូលរួម​របស់​បណ្តា​ប្រទេស​នៅ​​តំបន់​ឈូង​សមុទ្ទ​ពែរ្ស

អ្វី​ដែល​លោក​អូបាម៉ា​សង្ឃឹម​ចង់​បាន​ គឺ​វត្តមាន​របស់​ក្រុម​ប្រទេស​ចំនួន​៦​​ជា​សមាជិក​ក្រុមប្រឹក្សា​សហប្រតិបត្តិការ​តំបន់​ឈូង​សមុទ្ទពែរ្ស ​និង​​ជា​ក្រុម​ប្រទេស​មាន​បណ្តាជន​ភាគ​ច្រើន​កាន់​និកាយ​ស៊ុននីត។ គំនិត​ផ្តួច​ផ្តើម​បង្កើត​សម្ព័ន្ធ​អន្តរជាតិ​ត្រូវ​បាន​បង្ហើប​ឡើង មួយ​សប្តាហ៍​គត់​ក្រោយ​ពេល​ សារ​របស់​ព្រះ​ចៅ​អាដាឡះ ដែល​បាន​ពញ្ជាក់​ស្មារតី​សហរដ្ឋ​អាមេរិក​និង​ អឺរ៉ុប​ អំពី​កំរិត​នៃ​ការ​គំរាម​កំហែង​ភេរវនិយម​ជីហាត។ នៅ​ថ្ងៃ​សៅរ៍​នេះ​ក្រុមប្រទេស​ទាំង​៦​កំពុង​ជួប​ប្រជុំ​គ្នា​នៅ​ប្រទេស​អារ៉ាប៊ីសាអ៊ូឌីត ដើម្បី​ពិភាក្សា​កំណត់​​វត្តមាន​របស់​ពួក​គេ​ក្នុង​​សម្ព័ន្ធ​អន្តរជាតិ​ប្រឆាំង​ពួក​ជីហាត​រដ្ឋ​អ៊ីស្លាម។ រដ្ឋ​អ៊ីស្លាម​ដែល​ក៏​បាន​ចោទ​ប្រកាន់​ក្រុម​រាជាណាចក្រ​នៅ​តំបន់​ឈូង​សមុទ្ទ​ពែរ្សថា​បាន​ចូល​ដៃ​ជើង​ជាមួយ​បស្ចឹម​លោក និងបាន​គំរាម​វាយប្រហារ​រដ្ឋ​ទាំង​នោះ​ដែរ។ ក្នុង​ស្ថានភាព​អស្ថិរភាព​ដូច្នេះ​ បណ្តា​ប្រទេស​ក្នុង​តំបន់​ ត្រូវ​តែ​រួបរួម​គ្នា​ ហើយ​អារ៉ាប៊ីសាអ៊ូឌីត ដែល​ជា​តំណាង​ដែនដី​អ៊ីស្លាម​ ត្រូវ​ដើរ​តួនាទី​សំខាន់​ជួយ​ចាត់​ចែង​សន្តិសុខ​តំបន់។

ចំណែក​ឯ​អ៊ីរ៉ង់​វិញ​ ដែល​សង្ស័យ​ខ្លាច​ពួក​ជីហាត​ទន្ទាន​ឈ្លានពាន​ដល់​ទឹក​ដី​របស់​ខ្លួន បាន​ប្រកាស​គាំទ្រ​ផែន​ការ​អាមេរិក​ និងបាន​ប្រកាស​ចូល​រួម​បញ្ចេញ​សកម្មភាពប្រឆាំង​នឹង​ការ​គំរាម​កំហែង​ភេរវនិយម​ដែរ ប៉ុន្តែតេហេរ៉ង់ទាមទារ​សុំ​លម្អិត​តួនាទី​ ដែល​វ៉ាស៊ីនតោន​ចង់​ទម្លាក់​ឱ្យ​សិន។ រដ្ឋមន្ត្រី​ការបរទេស​អ៊ីរ៉ង់​បាន​គូស​បញ្ជាក់​ថា អ៊ីរ៉ង់​ត្រៀម​ចូល​ជា​សមាជិក​សម្ព័ន្ធ​អន្តរជាតិ​ជា​ថ្នូ​រ​នឹង​ការ​លើកទណ្ឌកម្ម​​អន្តរជាតិ​ចេញ​ពី​តេហេរ៉ង់។ តែ​អាមេរិក​បាន​ច្រាន​ចោល​ដំណឹង​ទាក់ទង​នឹង​គម្រោង​សហប្រតិបត្តិការ​​​​ប្រយុទ្ធ​ប្រឆាំ​ងនឹង​ពួក​ជីហាត​រដ្ឋ​អ៊ីស្លាម​។

បញ្ហា​ដ៏​ធំមួយ​ទៀត​ គឺ​ស៊ីរី ដែល​ពួក​ជីហាត​រដ្ឋ​អ៊ីស្លាមមាន​គ្រឹះ​រឹង​មាំ​តាំង​នៅ​វិញ​ ! បាស្ហា អាល់អាសាដ ដែល​នៅ​តែ​ជា​​​​សម្ព័ន្ធ​មិត្ត​​ដ៏​មាន​ទម្ងន់​ ក្នុង​ការ​ប្រយុទ្ធ​ប្រឆាំង​នឹង​ពួក​ជីហាត បាន​ស្នើ​សុំ​ចូល​ជួយ ប៉ុន្តែ​អាមេរិក​និង​បារាំង​បាន​ច្រាន​ចោល​មិន​ទទួល​យក​ដោយ​គ្មាន​បង្អង់។

ចៀស​កុំ​ប្រៀប​ប្រដូច​យុទ្ធសាស្ត្រ​របស់​លោក​អូបាម៉ា និង​យុទ្ធសាស្ត្រ​អាមេរិក​សម័យ​លោក​George W. Bush

បើ​យោល​ទៅ​លើការ​ប្រើ​ពាក្យ​ “សម្ព័ន្ធ​អន្តរជាតិ” គឺ​ពិត​ជា​ធ្វើ​ឱ្យ​នឹក​ឃើញ​ដល់​សម្ព័ន្ធ​ភាព​ បង្កើត​ឡើង​ ដោយ​ប្រធានាធិបតី​អាមេរិក​ លោកហ្សក​ប៊ូស​​ កាលពី​​សម័យ​១៩៩០-១៩៩១ ដើម្បី​ប្រឆាំង​នឹង​សាដាំអ៊ូសេន ឬ​ក៏​សម័យ​អាមេរិក​ដឹកនាំ​ដោយ​ហ្ស័កប៊ូស​ ជាកូន កាលពី ឆ្នាំ​២០០៣​ដែល​បាន​ចូល​ធ្វើ​សង្គ្រាម​លុកលុយ​នៅ​អ៊ីរ៉ាក់​មែន។ ប៉ុន្តែ​នៅ​លើក​នេះ លោក​បារ៉ាក់ អូបាម៉ា ដែល​ត្រូវ​ការ​រំពឹង​លើ​សម្ព័ន្ធ​មិត្ត​អូតង់​និង​សម្ព័ន្ធ​មិត្ត​ផ្សេង​ទៀត ក្នុង​ការ​ទប់​ស្កាត់​ចលនា​ជីហាត​រដ្ឋ​អ៊ីស្លាម មិន​ត្រូវ​ការ​ឮ​ការ​ប្រៀប​ប្រដូច​ទៅ​នឹង​អាមេរិក​សម័យ​ប៊ូស​ទេ ! គឺ​មិន​អាច​ប្រៀប​ធៀបយុទ្ធសាស្ត្រ​អាមេរិក​ប្រឆាំង​នឹង​អ៊ីរ៉ាក់ ទៅ​នឹង​យុទ្ធសាស្ត្រ​អាមេរិកប្រឆាំង​នឹង​រដ្ឋ​អ៊ីស្លាម​បាន​ឡើយ។

សម្រាប់​អ្នក​វិភាគ​ជា​ច្រើន​យល់​ថា អាមេរិក​របស់​លោក​អូបាម៉ា ដំឡើង​សំឡេង​បញ្ចេញ​កម្លាំង​នៅ​ពេល​នេះ​ ត្រូវ​បាន​គេ​បក​ស្រាយ​ថា​​ បើ​ទោះ​បី​ជា​អាមេរិក​មិន​ចង់​ផុង​ខ្លួន​នៅ​អ៊ីរ៉ាក់​និង​នៅ​អាហ្វហ្កានីស្ថាន​មែន ប៉ុន្តែ​អាមេរិក​ដឹង​ខ្លួន​ថា​ចាំ​បាច់​​ត្រូវ​ដើរ​តួនាទី​ ជា​មេដឹកនាំ​ ដើម្បី​កម្ទេច​ពួក​រដ្ឋ​អ៊ីស្លាម ហើយ​ឱ្យអាមេរិក​ត្រៀម​ចូល​ប្រលូក​ក្នុង​អន្តរាគមន៍​យោធា​ជា​ថ្មី​នៅតំបន់​ដើម​បូព៌ា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ