អានតួអត្ថបទ
អាមេរិក

ប្រធានាធិបតី​ អូបាម៉ា​ ស្បថ​ចូល​កាន់​​តំណែង​​សំរាប់​អណត្តិ​ទី​ពីរ​

លោក​ អូបាម៉ា និង​ភរិយា នៅ​​សេតវិមាន​ ថ្ងៃ​​​ទី​ ២០ មករា ឆ្នាំ​២០១៣
លោក​ អូបាម៉ា និង​ភរិយា នៅ​​សេតវិមាន​ ថ្ងៃ​​​ទី​ ២០ មករា ឆ្នាំ​២០១៣ REUTERS/Doug Mills/Pool
ដោយ៖ ព្រំ សឿន សូលីណា
១៥ នាទី

នៅ​ថ្ងៃ​ចន្ទ​នេះ ប្រធានាធិបតី​អាមេរិក បារ៉ាក់ អូបាម៉ា​ នឹង​ស្បថ​ស្បែ​​ចូល​កាន់​តំណែង​​របស់​លោក ជា​សាធារណៈ សំរាប់​​អណត្តិ​​លើក​ទី​ពីរ​​ នៅ​វិមាន​រដ្ឋ​សភា។​ ប្រជាជន​អាមេរិកាំង​​ ប្រហែល​ជា​​ ប្រាំបី​សែន​នាក់​ នឹង​រង់​ចាំ​ស្តាប់​សន្ទរកថា​ របស់​​លោក​ អូបាម៉ា​ ខុស​ពី​​អណត្តិ​​ទី​មួយ​ ដែល​កាល​ណោះ ​គេ​បាន​ឃើញ​សាធារណជន​ មាន​រហូត​ដល់​​ទៅ​មួយ​លាន ប្រាំបី​សែន​នាក់ ​ឯណោះ​ ដែល​នៅ​ចាំ​ស្តាប់​​ប្រធានាធិបតី អាមេរិក។​ការ​កាត់​បន្ថយ​ចំណាយ​សាធារណៈ ​ការ​ត្រួត​ពិនិត្យ​​​កាំ​ភ្លើង កំណែ​ទំរង់​​ច្បាប់​អន្តោប្រវេសន៍ និង​នយោបា​យ​​ផ្នែក​ថាមពល គឺ​ជា​ដំណោះ​ស្រាយ នៅ​​​​ចំពោះ​មុខ ​សំរាប់​ប្រធានាធិបតី​អាមេរិក ក្នុង​​​អណត្តិ​​ថ្មី​នេះ។

ផ្សាយពាណិជ្ជកម្ម

កាល​ពី​ថ្ងៃ​អាទិត្យ​ម្សិលមិញ​នេះ​ ប្រធានា​ធិបតី​​​អាមេរិក អូបាម៉ា ដែល​បាន​ជាប់​ឆ្នោត​ កាល​ពី​ថ្ងៃ​ ៦​​ វិច្ឆិកា​ ឆ្នាំ​ ២០១២​ កន្លង​មក​ បាន​ស្បថស្បែ​​​​ម្តង​រួច​​មក​ហើយ​​ ក្នុង​លក្ខណៈ​​ជា​​ឯកជន នៅ​ចំពោះ​មុខ​​គម្ពីរ​សាសនា​ សំរាប់​​អណត្តិ​​ថ្មី​របស់​លោក។ ​ការ​ស្បថស្បែនេះ បាន​ធ្វើ​ឡើង​ដោយ​មាន​​​​វត្តមាន​​​របស់ ប្រធាន​តុលាការ​កំពូល​អាមេរិក​ ព្រម​ទាំង​ភរិយា​ និង​កូន​ស្រី​ទាំង​ពីរ​របស់​លោក។

ប៉ុន្តែ​នៅ​ថ្ងៃ​ចន្ទ​នេះ លោក​អូបាម៉ា​ ត្រូវ​ធ្វើ​ការ​ស្បថស្បែ​​​ជា​ថ្មី​ម្តង​ទៀត​ នៅ​ចំពោះ​មុខ​សាធារណជន ប្រហែល​ជា​ ប្រាំបីសែន​នាក់។ មូល​ហេតុ​ដែល​នាំ​អោយ​លោក​ ស្បថស្បែ​​សារជាថ្មី ដោយសារថា ប្រក្រតិទិន​អាមរិក បាន​ចែង​ថា ប្រសិន​បើ​ថ្ងៃ​ទី​ ២០​មករា ប៉ះ​ចំ​ថ្ងៃ​អាទិត្យ នោះ​ប្រធានាធិបតី​​ត្រូវ​ស្បថ​ចូល​កាន់​​តំណែង​​​ នៅ​ថ្ងៃ​អាទិត្យ​ម្តង រួច​ហើយ​ស្បថ​ម្តង​ទៀត​ នៅវិមាន​រដ្ឋ​សភា នៅ​​ថ្ងៃ​ចន្ទ​បន្ទាប់​មក។

ទន្ទឹម​នេះ​ដែរ​ អនុប្រធានាធិបតី​អាមេរិក លោក​ ចូ​ បៃ​ដិន​ ក៏​បាន​ធ្វើការ​ស្បថស្បែ​ ចូល​កាន់​តំណែង​ តាំង​ពី​ថ្ងៃ​ម្សិលមិញ ហើយក៏​​នឹង​ស្បថស្បែម្តង​ទៀត​​ នៅ​ថ្ងៃ​ចន្ទ​នេះ​ដូច​ប្រធានាធិបតី អូបាម៉ាដែរ។ កា​ល​ពី​ថ្ងៃ​​អាទិត្យ​ម្សិល​មិញ អនុ​ប្រធានាធិបតី​ បៃ​ដិន បាន​ច្រលំ​មាត់​ ​និយាយ​ថា លោក​មាន​មោទនភាព​​ធ្វើ​ជា​ ប្រធានាធិបតី​របស់​សហរដ្ឋ​អាមរិក ដែល​ធ្វើ​អោយ​​មាន​ការ​ផ្ទុះ​សំណើច​ឡើង។

ដោយ​ឡែក​​ សំរាប់​​​​អណត្តិ​​ថ្មី​នេះ ប្រធានាធិបតី​អាមេរិក​ត្រូវ​ប្រឈម​មុខ​ នឹង​​ភារកិច្ច​សំខាន់ៗ​ ដូច​ជា​ ការ​​កាត់​បន្ថយ​លើ​ចំណាយ​សាធារណៈ ​ការដាក់​អោយ​មាន​ការ​​ត្រួត​ពិនិត្យ​​​កាំ​ភ្លើង កិច្ច​ការ​កែ​​ទំរង់​​ច្បាប់​អន្តោប្រវេសន៍ និង​នយោបា​យ​​ផ្នែក​ថាមពល​ជា​ដើម។
យោង​តាម​​អ្នក​ទទួល​ខុស​ត្រូវ​មួយ​រូប នៃ​ផ្នែក​​រដ្ឋបាល​​ប្រធានាធិបតី លោក​អូបាម៉ា ត្រូវ​ធ្វើ​យ៉ាង​ណា អោយ​សតវត្ស​ទី​ ២១​​ នេះ នៅ​តែ​រក្សាបាន​​​ភាព​រុងរឿង នៃ​​​​ស្ថាបនិកករ​​អាមរិក​ កន្លង​មក​​ ហើយ​ធ្វើ​យ៉ាងណា​​ ជំរុញ​លើក​ទឹកចិត្ត​​​​ប្រជាជន​​អាមេរិក អោយហ៊ាន​បង្ហាញ​ទស្សនៈ​​​របស់​ពួក​គេ​ ដើម្បី​​ចូលរួម​​​ដល់​ការ​បង្កើត​ច្បាប់​ ក្នុង​ប្រទេស៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ