ចិន

ប៉េកាំង​ស្ថិត​ក្រោម​ការត្រួត​ពិនិត្យ​ឃ្លាំ​មើល​ខ្លាំង​ណាស់​មុន​មហាសន្និបាត​​ប្រជាជន​ទូទាំង​ប្រទេស​ជាតិ

ផ្លូវ​ Wangfujing នា​ទីក្រុង​ប៉េកាំង​ក្រោម​ការ​ត្រួត​ពិនិត្យ​
ផ្លូវ​ Wangfujing នា​ទីក្រុង​ប៉េកាំង​ក្រោម​ការ​ត្រួត​ពិនិត្យ​ REUTERS/Petar Kujundzic

នៅ​ប្រទេស​ចិន​ វិធានការ​ត្រួត​ពិនិត្យ​ឃ្លាំ​មើល​ប្លែក​ពី​ធម្មតា​ត្រូវ​បាន​ចាត់​នៅ​ប៉េកាំង​ មុន​ការបើក​មហាសន្និបាត​ប្រជាជន​ទូទាំង​ប្រទេស​ជាតិ​ នៅ​ក្នុង​សប្តាហ៍​នេះ​។​ការត្រួត​ពិនិត្យ​ឆែក​ឆេរ​ធ្វើ​នៅ​ច្រក​ចូល​រដ្ឋ​ធានី​ ហើយ​ចាប់​ពី​ពាក់​កណ្តាល​អធ្រាត្រ​យប់​នេះ​ទៅ​ អាជ្ញាធរ​ហាម​ប្រាម​មិន​ឱ្យ​មាន​ការហោះ​ហើរ​កាត់​ពី​លើ​លំហ​អាកាស​ទំហំ​២០០គីឡូម៉ែត្រការ៉េ​ជុំវិញ​ទីលាន​Tiananmen។​ ជា​វិធាន​ការ​ធម្មតា​ ប៉ុន្តែ​ចាត់​កាន់​តែ​ខ្លាំង​ថែម​ទៀត​ ដោយ​ហេតុ​មាន​ការបះបោរ​នៅ​ក្នុង​បណ្តា​ប្រទេស​អារ៉ាប ​និង​មាន​ការអំពាវ​នាវ​ជាថ្មី​តាម​ប្រព័ន្ធ​អាំងទែរណេត​ឱ្យ ​“ប្រមូល​ផ្តុំ​គ្នា​”​ ធ្វើ​បាតុកម្ម​នៅ​រដ្ឋ​ធានី​ប៉េកាំង​ ជា​ហេតុ​ធ្វើ​ឱ្យ​អាជ្ញាធរ​ចិន​មួម៉ៅ​ខ្លាំង​ណាស់។​ នៅ​ថ្ងៃ​១មីនា​នេះ​ ប៉េកាំង​ក៏​ធ្វើ​សំណូម​ពរ​ផង​ដែរ​ឱ្យ​អ្នក​កាសែត​ “យល់​និង​សហការ​“​ ​ ប៉ុន្តែ​ដោយ “គោរព​ច្បាប់​“​ កំពុង​ជា​ធរមាន​ នៅ​ប្រទេស​ចិន។

ផ្សាយពាណិជ្ជកម្ម

សេចក្តី​រាយការណ៍​របស់​Stéphane Lagarde ពីទីក្រុង​ប៉េកាំង ប្រែ​សម្រួល​ដោយ វីនស្តុន រតនា

ដូច​ជា​នៅ​រាល់​ដើម​និទាឃរដូវ​ ​ មាន​ភ្នាក់ងារ​ស្លៀក​ពាក់​ឯកសណ្ឋាន​ច្រើន​ដេរដាស​នៅ​ប៉េកាំង​និង​”​ ពួក​អ្នក​ស្ម័គ្រចិត្ត​រក្សា​សន្តិសុខ​នៅ​រដ្ឋ​ធានី​ “​ ពាក់​ប៉ាន​ដៃ​ក្រហម​ វិល​ត្រឡប់​មក​កាន់​ចិញ្ចើម​ថ្នល់​វិញ​។​ស្តង់​ប៉ូលិស​”​ របៀប​អឺរ៉ូប​ “​ -នេះ​ជា​ការបញ្ជាក់​ប្រាប់​នៃ​កាសែត​Xin​ Jing​ Bao​ (​ កាសែត​ប៉េកាំង​ថ្មី​ )​ ប្រដាប់​ដោយ​Computeur​និង​ថ្នាំ​ពេទ្យ​ត្រូវ​បាន​ដាក់​ប្រចាំ​នៅ​ស្ថានីយ​ខាង​លិច។

 
នៅ​ខាង​ត្បូង​រដ្ឋធានី ដូច្នេះ​នៅ​មជ្ឈមណ្ឌល​នៃ​រដ្ឋ​អំណាច​មាន​ភ្នាក់​ងារ​ចំនួន​ជាង​១៨០០​នាក់​នៃ​ការិយាល័យ​សន្តិសុខ​មក​ពី​ស្រុក​Fengtai នឹង​ធ្វើ​ការ​បណ្តាក់​វេន​គ្នា​នៅ​ត្រង់​២៨​កន្លែង​ត្រួត​ពិនិត្យ​ឆែក​ឆេរ​នៅ​ច្រក​ចូល​ទីក្រុង។

គឺ​ជា​វិធានការ​ចាត់​ជា​ធម្មតា​នៅ​សម័យ​ប្រជុំ​នៃ​មហាសន្និបាត​ប្រជាជន​ទូទាំង​ប្រទេស​ជាតិ។ ប៉ុន្តែ​នៅ​ក្នុង​សម័យ​ប្រជុំ​ផ្សេងៗ​ទៀត​មាន​ចាត់​វិធានការ​តិច​ជាង​នេះ។ ចាប់​ពី​ថ្ងៃ អង្គារ​ទី​១​មីនា​នេះ​ទៅ អ្នក​លត់​ភ្លើង​​មួយ​ក្រុម​ គ្នា​៨​នាក់​នឹង​ធ្វើ​ការ​ “ត្រួត​ពិនិត្យ​ប្រឆាំង​នឹង​អគ្គិភ័យ” នៅ​គ្រប់​តែ​កន្លែង​លក់​ដូរ​​នៃ​វិថី Wangfujing។

នៅ​វិថី​មួយ​សម្បូណ៌​ដោយ​អ្នក​ដើរ​នៅ​កណ្តាល​ក្រុង​ ជា​ទី​ដែល​ចាប់​តាំង​ពី​២​អាទិត្យ​មក​ហើយ​មាន​ “ចលនា​ផ្កាម្លិះ​ចិន” មួយ​ដ៏​អាថ៌​កំបាំង​ អំពាវនាវ​ឲ្យ​ប្រមូល​ផ្តុំ​គ្នា។ សង្កាត់​នេះ​ស្ថិត​ក្រោម​ការ​ត្រួត​ពិនិត្យ​ឃ្លាំ​មើល​របស់​ភ្នាក់ងារ​ស្លៀក​ពាក់​ឯកសណ្ឋាន​ និង​ជា​ជន​ស៊ីវិល​ ក៏​ព្រម​ទាំង​ក្រុម​ជន​វិថីបាល​មាន​ប្រដាប់​ស្តាប់​ពាក់​នៅជាប់​នឹង​ត្រចៀក៕ 

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI