កម្ពុជា-តុលាការ

តុលាការ​បើក​សវនាការ​កាត់​ទោស​លោក​ម៉មសូណង់ដូ​

ប៉ូលិស​ដាក់របាំង​បិទផ្លូវ​មិន​ប្រជាជន​អ្នកតំណាងរាស្ត្រ​និង​អ្នកកាសែត​ចូលរួម​ស្តាប់​សវនាការ​លោក​ម៉មសូណង់ដូឡើយ​
ប៉ូលិស​ដាក់របាំង​បិទផ្លូវ​មិន​ប្រជាជន​អ្នកតំណាងរាស្ត្រ​និង​អ្នកកាសែត​ចូលរួម​ស្តាប់​សវនាការ​លោក​ម៉មសូណង់ដូឡើយ​ RFI/Ly Meng Hour

ដូច​​ការ​​គ្រោង​​ទុក​នៅ​​ថ្ងៃ​​អង្គារ ​​ទី​​១១​​កញ្ញា​​នេះ ​តុលាការ​​ក្រុង​​ភ្នំពេញ ​បាន​​បើក​សវនាការ​កាត់​ទោស​លោក ម៉ម សូណង់ដូ នៅ​ក្នុង​សំណុំរឿង​ពាក់ព័ន្ធ​នឹង​ជម្លោះ​ដីធ្លី នៅ​ខេត្ត​ក្រចេះ។ សំណុំ​រឿងនោះ មាន​ជន​ជាប់ចោទ​សរុប​ចំនួន ៩​នាក់​ ចំណែក​សាក្សី មាន​រហូត​ដល់ ៨៦ នាក់។​​ដោយ​​ឡែក​នៅ​ក្រៅ​តុលាការ​ឯណោះ​វិញ ប៉ូលិស​បាន​ដាក់​បារ៉ាស់ ​បិទ​ផ្លូវ​ មិន​ឲ្យ​តំណាង​រាស្ត្រ អ្នកកាសែត និង​ក្រុម​ប្រជា​ពលរដ្ឋ ដែល​គាំទ្រ​លោក​ម៉ម​សូណង់ដូ ចូល​រួម​ស្តាប់​សវនាការ​ឡើយ។

ផ្សាយពាណិជ្ជកម្ម

សវនាការ​កាត់ទោស​លោក ម៉ម សូណង់ដូ នៅ​ថ្ងៃ​អង្គារ ទី​១១​កញ្ញា​នេះ ត្រូវ​បាន​ប៉ូលិស រឹត​បន្តឹង​​សន្តិសុខ ដោយ​ដាក់​បារ៉ាស់ បិទ​ផ្លូវ​ចេញ-ចូល​តុលាការ​ក្រុង​ភ្នំពេញ ចាប់​ពី​រង្វង់​ភ្លើង​ស្តុប អាងទឹក រហូត​ដល់​ភ្លើង​ស្តុប​នាង​គង្ហីង។ ចំណែក​ប្រជាពលរដ្ឋ អ្នក​ភូមិ​បឹងកក់ អ្នក​បុរីកីឡា​និង​សមាជិក​សមាគម​អ្នក​ប្រជាធិបតេយ្យ​រាប់​រយ​នាក់ បាន​ប្រមូល​ផ្តុំ ចង់​ទំលុះ​បារ៉ាស់​របស់​ប៉ូលិស ដើម្បី​ចូល​ទៅ​តាម​ដាន​សវនាការ​លើ​លោក​ម៉ម​សូណង់ដូ។ ប៉ុន្តែ​ត្រូវ​ប៉ូលិស​រារាំង និង​មាន​ការ​ប៉ះ​ទង្គិច​បន្តិចបន្តួច។

ក្រុម​អ្នក​តំណាងរាស្ត្រ​គណបក្ស​សមរង្ស៊ី និង​គណបក្ស​សិទ្ធិ​មនុស្ស​ ព្រម​ទាំង​សកម្មជន​អង្គការ​សិទ្ធិ​មនុស្ស​ជា​ច្រើន​នាក់ ក៏​មិន​ត្រូវ​បាន​អនុញ្ញាត​ឲ្យ​តាម​ដាន​សវនាការ​កាត់​ទោស លោក ម៉ម សូណង់ដូ ឡើយ។

លោក ម៉ម សូណង់ដូ ត្រូវ​បាន​នាំ​ខ្លួន ចូល​ក្នុង​បន្ទប់​សវនាការ ជា​មួយ​នឹង​ជន​ជាប់​ចោទ ៨ នាក់​​​ផ្សេង​​ទៀត​។ ក្នុង​សំណុំរឿង​ក្តី​ពាក់​ព័ន្ធ​នឹង​ជម្លោះ​ដី​នៅ​ខេត្ត​ក្រចេះ មាន​ជន​ជាប់​ចោទ​សរុប ៩​នាក់ ដោយ ៤​នាក់ រាប់​ទាំង​លោក ម៉ម សូណង់ដូ ត្រូវ​បាន​ប៉ូលិស​ឃុំ​ខ្លួន​និង​នៅ​ក្រៅ​ឃុំ ៥​នាក់​។ ក្នុង​សំណុំរឿង​ក្តី​នោះ សាក្សី​មាន​រហូត​ដល់ ៨៦​នាក់​ដោយ​សាក្សី​ដោះ​បន្ទុក​របស់​លោក ម៉ម សូណង់ដូ មាន ៥​នាក់​។ ចំណែក​សាក្សី​ ដាក់​បន្ទុក មាន​រហូត​ដល់ ៨១​នាក់។​
ជន​ជាប់​ចោទ​ទាំង ៩ នាក់​នោះ ស្ថិត​ក្នុង​សំណុំរឿង​តែ​មួយ ជា​មួយ​នឹង​លោក ម៉ម សូណង់ដូ ក្នុង​​បទល្មើស​ចោទ​ប្រកាន់ ៤ ករណី ពាក់ព័ន្ធ​នឹង​ជម្លោះ​ដី​នៅ​ខេត្ត​ក្រចេះ រួម​មាន​៖

 ទី​១-​បទ​ផ្តួចផ្តើម​គំនិត​ប្រឆាំង​អ្នករាជការ​សាធារណៈ
ទី​២-​ធ្វើ​កុបកម្ម ជ្រៀតជ្រែក​ខុសច្បាប់ នៅក្នុង​ការ​បំពេញ​​មុខ​ងារ​សាធារណៈ
ទី​៣-​ញុះញង់​ឲ្យ​ប្រជាពលរដ្ឋ​កាន់​កាប់​អាវុធ​ខុស​ច្បាប់និង
ទី​៤-​ប្រឆាំង​​​នឹង​អាជ្ញាធរ​ស្របច្បាប់ ដែល​មានចែង​ក្នុង​មាត្រា​មួយចំនួន នៃ​ក្រម​ព្រហ្មទណ្ឌ​។​

មានអាយុ ៧២ ឆ្នាំ លោក ម៉ម សូណង់ដូ នាយក​វិទ្យុ​សំបុកឃ្មុំ និង​ជា​ប្រធាន​សមាគម​អ្នក​ប្រជាធិបតេយ្យ ត្រូវ​បាន​ប៉ូលិស​ចាប់​ខ្លួន កាលពី​ថ្ងៃ​ទី​១៥ ខែ​កក្កដា ឆ្នាំ​២០១២។ ការ​ចោទ​ប្រកាន់​លោក ម៉ម សូណង់ដូ គឺ​តុលាការ​បាន​ភ្ជាប់​នឹង​ករណី​ជម្លោះ​ដី ដែល​បង្ក​ឡើង​ដោយ​ប្រជា​ពលរដ្ឋ​មួយ​ក្រុម ដែល​ជា​សាខា​សមាគម​អ្នក​ប្រជាធិបតេយ្យ នៅ​ក្នុង​ភូមិ​ប្រម៉ា ឃុំ​កំពង់​ដំរី ស្រុក​ឆ្លូង ខេត្ត​ក្រចេះ​។ ករណី​ជម្លោះ​ដី​នោះ ត្រូវបាន​អាជ្ញាធរ​រដ្ឋាភិបាល​ចោទ​ប្រកាន់​ថា អ្នក​ទាំង​នោះ​ចាប់​ដី​រដ្ឋ បង្កើត​តំបន់​អបគមន៍ ហើយ​ត្រូវ​បាន​រដ្ឋាភិបាល​បង្ក្រាប និង​បណ្តេញ​ចេញកាលពី​ថ្ងៃ​ទី​១៦ ខែ​ឧសភា ឆ្នាំ​២០១២ បណ្តាល​ឲ្យ​ក្មេងស្រី​ម្នាក់​ស្លាប់ និង​មនុស្ស​ជាច្រើន​បាន​រត់គេចខ្លួន ពី​ការ​តាម​ចាប់​របស់​តុលាការ​ខេត្ត​ក្រចេះ​។ ក្រោយមក សំណុំរឿង​នោះ ត្រូវ​បាន​​ផ្ទេរ​មក​សាលាដំបូង​រាជធានី​ភ្នំពេញ​។​

មក​ដល់​ម៉ោង ៦ ព្រលប់​ថ្ងៃ​ទី​១១​កញ្ញា​នេះ សវនាការ​កាត់​ទោស​លោក​ម៉ម​សូណង់ដូ ត្រូវ​បាន​ផ្អាក បន្ទាប់​ពីចៅក្រម បាន​សួរ​នាំ​ជន​ជាប់​ចោទ​ទាំង​៩ នាក់ រាប់​ទាំង​លោក​ម៉មសូណង់ដូ។ លោក​ម៉ម​សូណង់ដូ បាន​បដិសេធ​ការ​ចោទ​ប្រកាន់​ទាំង​នោះ។ សវនាការ នឹង​បន្ត​នៅ​ព្រឹក​ថ្ងៃ​ពុធ​ស្អែក​ទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI