បុរីវ៉ាទីកង់

អ្នក​លួច​ធ្វើ​ឲ្យ​លេច​ធ្លាយ​ឯកសារ​សម្ងាត់​របស់​វ៉ាទីកង់​ត្រូវ​ប៉ូលិស​ចាប់​ខ្លួន

សម្តេចសង្ឃ​Benoît ទី ១៦ និង​ពិធីការ​របស់​ព្រះអង្គ Paolo Gabriele ដែល​អង្គុយ​នៅ​ពីមុខ ក្នុង​ឡាន​ដែល​បើក​នៅក្នុង​ទីលាន​Saint-Pierre ក្នុង​ទីក្រុង​រ៉ូម កាលពីថ្ងៃ​ទី ២៣ ខែ​ឧសភា
សម្តេចសង្ឃ​Benoît ទី ១៦ និង​ពិធីការ​របស់​ព្រះអង្គ Paolo Gabriele ដែល​អង្គុយ​នៅ​ពីមុខ ក្នុង​ឡាន​ដែល​បើក​នៅក្នុង​ទីលាន​Saint-Pierre ក្នុង​ទីក្រុង​រ៉ូម កាលពីថ្ងៃ​ទី ២៣ ខែ​ឧសភា REUTERS/Alessandro Bianchi

ពិធី​បុណ្យ​គ្រិស្តសាសនា​Pentecôte នៅវ៉ាទីកង់ នៅថ្ងៃ​អាទិត្យ​ទី ២៧ ឧសភានេះ​ត្រូវ​បំពុល​ដោយ​រឿង​អាស្រូវ​ផ្ទៃក្នុង ដែល​កើតមាន បន្ទាប់​ពី​មាន​ការបែក​ខ្ចខ្ចាយ​ឯកសារ​សម្ងាត់ របស់​បុរី​​វ៉ាទីកង់ ទៅ​ខាងក្រៅ។ កាលពី​ថ្ងៃ​សៅរ៍​ទី ២៦​ឧសភា បុរី​វ៉ាទីកង់​បាន​បញ្ជាក់​ការចាប់ខ្លួន​បុរស ដែល​គេ​សង្ស័យ​ថា ជា​អ្នកលួច​យក​ឯកសារ​សម្ងាត់​របស់​បុរីវ៉ាទីកង់​ទៅ​ឲ្យ​អ្នកកាសែត។ តាមអ្នកនាំពាក្យ​របស់​បុរី​វ៉ាទីកង់ បុរស​នោះ​គ្មាន​អ្នកណា​ក្រៅពី Paolo Gabriele ដែល​ជា​ពិធីការ​របស់​សម្តេចសង្ឃ​Benoît ទី ១៦។

ផ្សាយពាណិជ្ជកម្ម

ដំណឹង​ចាប់ខ្លួន​ពិធីការ​របស់​សម្តេច​សង្ឃ​​Benoît ទី ១៦ បាន​ធ្វើ​ឲ្យ​គេ​ភ្ញាក់ផ្អើល​មែនទែន នៅបុរីវ៉ាទីកង់ ព្រោះ​អ្នក​ដែល​នៅជិតស្និទ្ធ សម្តេចសង្ឃ​ជាង​គេ បែរជា​ត្រូវ​ជាប់សង្ស័យ​ថា ជាអ្នក​ដែល​លួច​បញ្ចេញ​ឯកសារ​សម្ងាត់របស់​បុរី​វ៉ាទីកង់ ទៅ​ខាងក្រៅ​ទៅវិញ។

ក្នុង​អាយុ ៤៦ឆ្នាំ Paolo Gabriele បាន​បម្រើ​សម្តេចសង្ឃ​ Benoît ក្នុង​នាម​ជាពិធីការ តាំងពីឆ្នាំ ២០០៦។ គាត់​ជា​អ្នក​ដែល​ជួយ​គ្រងគ្រឿង​ប្រចាំថ្ងៃ​ឲ្យ​សម្តេចសង្ឃ​ Benoît។ ជាអ្នក​ចូលរួម​ក្នុង​ពិធី​សូត្រធម៌ ឬ​ជួបពិភាក្សា​ជាមួយ​សាធារណជន និង​ជាអ្នករៀបចំ​អាហារថ្ងៃ​ត្រង់ ពេលល្ងាច ឲ្យ​សម្តេចសង្ឃ រហូត​ដល់​ពេល​លោក​ចូលសិង។ និយាយ​បែបសាមញ្ញ គឺ មួយថ្ងៃៗ Paolo Gabriele ជាមនុស្ស​ទីមួយ និង​ជាមនុស្ស​ចុងក្រោយ​គេ​ដែល​នៅ​ជាមួយ​សម្តេចសង្ឃ។

ប៉ុន្តែ កាលពី​ថ្ងៃ​ពុធ ក្នុង​សប្តាហ៍នេះ ប៉ូលិស​ដែល​ស្ថិតនៅក្រោម​បញ្ជា​របស់​គណៈកម្មាការ​ស៊ើបអង្កេត បង្កើត​ជា​ពិសេស​ដោយ​បុរីវ៉ាទីកង់ បាន​ឆែក​រកឃើញ​ឯកសារ​សម្ងាត់​មួយចំនួន នៅក្នុង​ផ្ទះ​របស់​ Paolo Gabriele ដែល​ស្ថិតនៅក្នុង​បរិវេណ​បុរី​វ៉ាទីកង់។

កាលពី​ដើម​ខែ​មករា ឯកសារ​សម្ងាត់ ដែល​បង្ហាញ​ពី អំពើ​ពុករលួយ​របស់​រដ្ឋ​ដ៏តូច​មួយ នៅក្នុង​ប្រទេស​អ៊ីតាលី បាន​បែកធ្លាយ​ទៅ​ដល់​ដៃ​អ្នកកាសែត។ ឯកសារ​ទាំងនោះ គឺ​ជា​សំណៅ​ទូរលេខ​ដែល​គេ​ផ្ញើ​ទៅ​ឲ្យ​សម្តេច​សង្ឃ​Benoît ដែល​លើកឡើង​ពី​ស្ថានភាព​បង់ពន្ធ​របស់​វិហារ​គ្រិស្តសាសនា រឿង​អាស្រូវ​ផ្លូវភេទ​ក្នុង​ចំណោម​មន្រ្តីសង្ឃ​កាតូលិក។

តើPaolo Gabriele​ជា​មនុស្ស​ក្បត់​បុរីវ៉ាទីកង់ ឬ​គ្រាន់តែ​ជា​ជន​ស្អាតស្អំ​ម្នាក់ ដែល​រងគ្រោះ​ដោយ​អំពើក្បត់​របស់​មនុស្ស​មួយក្រុម នៅបុរី​វ៉ាទីកង់? តាម​យោបល់​របស់​មន្រ្តី​សង្ឃ​ ​ដែល​សុំ​មិន​បញ្ចេញ​ឈ្មោះម្នាក់ Paolo Gabriele គឺ​ជាមនុស្ស​ស្មោះត្រង់ និង​គោរព​ស្រឡាញ់​សម្តេច​សង្ឃ​ Benoît។

តាមអ្នកនាំពាក្យ​របស់​បុរីវ៉ាទីកង់ Paolo Gabriele​តុលាការ​​ចោទ​ប្រកាន់​ពី​បទ​លួច​ធ្ងន់ធ្ងរ។ បើសិន​​តុលាការ​រក​ភស្តុតាង​បញ្ជាក់ថា គាត់ជា​អ្នកលួចមែន នោះ មនុស្ស​ជំនិត​របស់​សម្តេចសង្ឃ​ Benoît ​នឹង​ត្រូវមាន​ទោស​ជាប់គុក ៣០ឆ្នាំ ព្រោះថា លួចឯកសារ​សម្ងាត់​របស់​សម្តេចសង្ឃ ដែល​ជា​ប្រមុខរដ្ឋ គឺ​បទឧក្រិដ្ឋ​ធ្ងន់ធ្ងរ​ដែលមានន័យ​គំរាមកំហែង​ដល់​សន្តិសុខ​របស់​រដ្ឋ។

យ៉ាងណាក៏ដោយ មន្រ្តីសង្ឃ​មួយ​ចំនួន​នៅតែ​ជឿថា Paolo Gabriele​អាច​រងគ្រោះ ដោយ ត្រូវ​គេ​ឆ្លើយ​ទម្លាក់​កំហុស។ ពាក្យចចាម​អារ៉ាម​ខ្លះ​បាន​និយាយ​ពី​ផែនការ​ធ្វើ​រដ្ឋប្រហារ​ទម្លាក់​សម្តេចសង្ឃ​ Benoît ដោយ​ក្រុម​នាយករដ្ឋមន្រ្តី​វ៉ាទីកង់ ដែល​រហូតមក មិនពេញចិត្ត​នឹង​ការដឹកនាំ​របស់​សម្តេចសង្ឃ​ Benoît។ ក្រុមទាំងនេះ ដែល​ជាក្រុមអភិរក្ស​និយម​មិន​ពេញចិត្តទេ​ដែល​ សម្តេច​សង្ឃ​ Benoît​បាន​បញ្ជា​ឲ្យ​គេ​រៀបចំ​បញ្ជី ហិរញ្ញវត្ថុ​វ៉ាទីកង់ ឡើងវិញ គឺ​ធ្វើយ៉ាងម៉េច​ដើម្បី​ឲ្យ​សហភាព​អឺរ៉ុប​ចាត់ចូល​បុរីវ៉ាទីកង់ ចូលទៅក្នុង​បញ្ជី​ប្រទេស​ដែល​ស្អាតស្អំ និង​មិន​ពាក់ព័ន្ធ​នឹង​ការលាង​លុយ​កខ្វក់។ ប៉ុន្តែ​ក្រុមអភិរក្ស​រិះគន់​នយោបាយនេះ ព្រោះគេ​នៅតែ​ចង់​រក្សា​បញ្ជី​ហិរញ្ញវត្ថុ​របស់​វ៉ាទីកង់​ឲ្យ​នៅសម្ងាត់​ជានិច្ច។ គំនិត​ខ្វែងគ្នា នេះ​បាន​ឈាន​ទៅដល់​ការលាលែង​តំណែង​ដោយ​បង្ខំ កាលពី​ថ្ងៃ​ព្រហស្បតិ៍ របស់​ប្រធាន​ធនាគារ​វ៉ាទីកង់ ដែល​សម្តេចសង្ឃ​ Benoît ​ធ្លាប់បាន​ចាត់តាំង​ឲ្យ​រៀបចំ​បញ្ជី​ហិរញ្ញវត្ថុ​របស់​វ៉ាទីកង់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI