ស៊ីរី

ទស្សនកិច្ច​លើក​ទីមួយ​របស់​អន្តរការី Lakhdar Brahimi នៅ​ស៊ីរី

លោក Lakhdar Brahimi បេសកជនពិសេស​របស់​អង្គការសហប្រជាជាតិ និង​សម្ព័ន្ធអារ៉ាប់​សម្រាប់​វិបត្តិ​ស៊ីរី
លោក Lakhdar Brahimi បេសកជនពិសេស​របស់​អង្គការសហប្រជាជាតិ និង​សម្ព័ន្ធអារ៉ាប់​សម្រាប់​វិបត្តិ​ស៊ីរី REUTERS/Amr Abdallah Dalsh

លោក Lakhdar Brahimi បេសកជន​ពិសេស​របស់​អង្គការ​សហប្រជាជាតិ និង​សម្ព័ន្ធអារ៉ាប់​បាន​ទៅ​ដល់​ប្រទេស​ស៊ីរី​ហើយ​នៅ​ថ្ងៃ​ព្រហស្បតិ៍ ទី១៣ កញ្ញា​នេះ។ លោក Brahimi ត្រូវ​ចូល​ជួប​ពិភាក្សា​ជាមួយ​ភាគី​ផ្សេងៗ​គ្នា​ដែល​ជាប់​ពាក់ព័ន្ធ​នឹង​វិបត្តិ​ស៊ីរី​បច្ចុប្បន្ន ពិសេស​លោក​ប្រធានាធិបតី​ស៊ីរី បាស្ហារ អាល-អាសាដ​។ សូម​ជម្រាប​ជូន​ថា តំាង​ពី​បាន​តែងតំាង​ជា​អ្នក​សម្របសម្រួល​អន្តរជាតិ​ឲ្យ​វិបត្តិ​ស៊ីរី​មក នេះ​ជា​លើក​ទីមួយ​ហើយ​ដែល​លោក Brahimi បាន​ធ្វើ​ដំណើរ​ទៅ​កាន់​ប្រទេស​ស៊ីរី។

ផ្សាយពាណិជ្ជកម្ម

តំាង​ពី​បាន​ទទួល​តំណែង​ជា​បេសកជន​ពិសេស​របស់​អង្គការ​សហប្រជាជាតិ និង​សម្ព័ន្ធអារ៉ាប់​ឲ្យ​វិបត្តិ​ស៊ីរី​កាល​ពី​ថ្ងៃទី១ កញ្ញា​មក លោក Lakhdar Brahimi ធ្លាប់​បាន​ថ្លែង និង​បាន​រំលឹក​ជាថ្មី​នា​ថ្ងៃច័ន្ទ​ដើម​សប្តាហ៍​នេះ​ថា បេសកកម្ម​របស់​លោក គឺ​ជា​បេសកកម្ម​មួយ​ដ៏​សែនពិបាក​ក្រៃលែង។ អ្នក​សម្របសម្រួល​អន្តរជាតិ​ជនជាតិ​អាល់ហ្សេរី​រូប​នេះ​បាន​ទទួល​សារភាព​ថា ការ​និយាយ​មិន​ចុះសម្រុង​គ្នា​តាម​ផ្លូវទូត​ដែល​បាន​បង្ខំ​ឲ្យ​លោក​អតីត​អន្តរការី​ Koffi Annan លា​ឈប់​ពី​មុខ​តំណែង​នោះ ក៏​កំពុង​បន្ត​ចោទ​ជា​បញ្ហា​ដដែល។ ចំណែក​ឯ​ស្ថានការណ៍​នៅ​ក្នុង​ប្រទេស​ស៊ីរី​ឯណោះ​ក៏​កាន់​តែ​ដុនដាប​ទៅៗ។

តែ​យ៉ាង​ណា​ក៏​ដោយ លោក Lakhdar Brahimi បាន​ប្រកាស​ថា លោក​មិន​មាន​សិទ្ធិ​ឈរ​អោបដៃ​ដើម្បី​មើល​ពី​ទុក្ខសោក​របស់​ប្រជាជន​ស៊ីរី​បាន​ទេ។ គឺ​នៅ​ក្នុង​ក្របខ័ណ្ឌ​នៃ​ការ​ព្យាយាម​ជា​ថ្មី​របស់​សហគមន៍​អន្តរជាតិ​ដើម្បី​ស្វែង​រក​កិច្ចព្រមព្រៀង​មួយ​ឲ្យ​បាន​នេះ​ហើយ ដែល​លោក Lakhdar Brahimi ត្រូវ​ចូល​ជួប​អ្នក​ទទួលខុសត្រូវជាន់ខ្ពស់​របស់​​ក្រុមប្រឆំាង​ស៊ីរី ព្រម​ទំាង​ក្រុម​តំណាង​សង្គមស៊ីវិល​នា​ថ្ងៃ​ព្រហស្បតិ៍​នេះ។ រីឯ​ជំនួប​ជាមួយ​លោក​ប្រធានាធិបតី បាស្ហារ អាល-អាសាដ​នឹង​ត្រូវ​ធ្វើ​ឡើង​នៅ​ថ្ងៃ​សុក្រ​ស្អែក។

គួរ​ជម្រាប​ជូន​ថា សហគមន៍​អន្តរជាតិ​នៅ​តែ​បន្ត​និយាយ​មិន​ចុះ​សម្រុងគ្នា​ពាក់ព័ន្ធ​នឹង​ការ​លា​ចុះ​ពី​មុខតំណែង​របស់​លោក​ប្រធានាធិបតី​ស៊ីរី បាស្ហារ អាល-អាសាដ។ មាន​ប្រទេស​យ៉ាង​​ច្រើន ពិសេស​សហរដ្ឋអាមេរិក​យល់​ឃើញ​ថា គេ​ត្រូវ​តែ​ដោះស្រាយ​វិបត្តិ​ស៊ីរី​តាម​ផ្លូវយោធា រីឯ​ប្រទេស​រុស្ស៊ី ចិន និង​អ៊ីរ៉ង់​វិញ នៅ​តែ​ចង់​បាន​ឲ្យ​មាន​ដំណោះស្រាយ​តាម​ផ្លូវ​ចរចា​រវាង​រដ្ឋាភិបាល​ទីក្រុង​ដាម៉ាស់ និង​ក្រុមអ្នកប្រឆំាង។

ទន្ទឹម​គ្នា​នេះ នៅ​ក្នុង​ប្រទេស​ស៊ីរី អំពើហិង្សា​កំពុង​បន្ត​មាន គ្មាន​លួស​ថ្ងៃ តំាង​ពី ១៨ខែ​មក​ហើយ និង​ដែល​រៀងរាល់​ថ្ងៃ កម្លំាង​រដ្ឋាភិបាល​បាន​ទម្លាក់​គ្រាប់បែក​លើ​ទីតំាង​របស់​ក្រុមអ្នកប្រឆំាង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI