អានតួអត្ថបទ
កូរ៉េខាងត្បូង

មុនផុតតំណែង ប្រធានាធិបតី​លើក​លែង​ទោស​ដល់​ជន​ពុករលួយ

លោក Lee Myung-bak (ស្តាំ) ចាប់​ដៃ​ស្វាគមន៍​លោកស្រី  Park Geun-Hye ទើប​ជាប់​ឆ្នោត​ថ្មី ថ្ងៃទី ២៨​ធ្នូ ឆ្នាំ​២០១២
លោក Lee Myung-bak (ស្តាំ) ចាប់​ដៃ​ស្វាគមន៍​លោកស្រី Park Geun-Hye ទើប​ជាប់​ឆ្នោត​ថ្មី ថ្ងៃទី ២៨​ធ្នូ ឆ្នាំ​២០១២ REUTERS
ដោយ៖ អៀង សុខម៉ិញ
១៦ នាទី

លោក​ប្រធានាធិបតី​កូរ៉េខាង​ត្បូង​ លី ម្យ៉ុងបាក់ (Lee Myung-Bak) បាន​សម្រេច​​លើក​លែង​ទោស នៅ​ថ្ងៃ​អង្គារ​ទី ២៩ មករា​ ឆ្នាំ​២២០១៣​ ​ដល់​អ្នក​ទោស​ជាង​៥០​នាក់ ដែល​ភាគ​ច្រើន​ជា​មនុស្ស​ជំនិត​នឹង​លោក តែ​មាន​ទោស​ប្រព្រឹត្ត​អំពើ​ពុក​រលួយ។ ការ​លើកលែង​ទោស​នេះ​បាន​ទទួល​ការ​រិះគន់​យ៉ាង​ខ្លាំង​នៅ​ក្នុង​ចំណោម​អ្នក​នយោបាយ​ ដ្បិត​លោក ​លីម្យ៉ុងបាក់​ ធ្លាប់​បាន​សន្យា​យក​​ការ​ប្រយុទ្ធ​ប្រឆាំង​នឹង​អំពើ​ពុក​រលួយ​ជា​អាទិភាព​មួយ​របស់​រដ្ឋាភិបាល។

ផ្សាយពាណិជ្ជកម្ម

ក្នុង​ចំណោម​អ្នក​ទោស​៥៥​នាក់ ដែល​ត្រូវ​ដោះលែង នៅ​ថ្ងៃ​អង្គារ​នេះ គេ​សង្កេត​ឃើញ​មាន​ឈ្មោះ លោក Choi See-Joong មិត្ត​ដ៏​ជំនិត​បំផុត និង​ជា​​​អតីត​រដ្ឋមន្ត្រី​​​​ម្នាក់​របស់​រដ្ឋាភិបាល​ និងលោក Chun Shin-Il ជាមិត្ត​និង​ជា​​ពាណិជ្ជករ​ ដែល​តុលាការ​កូរ៉េខាង​ត្បូង​កាត់​ទោស​​ឱ្យ​ជាប់​ពន្ធនាគារ​ពី​បទ​ប្រព្រឹត្ត​អំពើ​ពុក​រលួយ។ លោក លី​ ម្យ៉ុងបាក់ ដែល​នឹង​ត្រូវ​ផុត​អាណត្តិ​ជា​ប្រធានាធិបតី ក្នុង​រយៈ​ពេល​ពីរ​បី​ថ្ងៃ​ទៀត​សោះ​នោះ ក៏​បាន​លើក​លែង​ទោសផង​ដែរ​​ដល់​អតីត​ប្រធាន​សភា​ និង​អតីត​ទីប្រឹក្សា​នយោបាយ​របស់​លោក ​(អ្នក​ទាំង​ពីរ​រូប​នេះ​ ត្រូវ​បាន​តុលាការ​កាត់​ទោស​ នៅ​ឆ្នាំ​២០១២ ពី​បទ​លួច​ទិញ​សន្លឹក​ឆ្នោត​នៅ​ក្នុង​ជួរ​បក្ស​​អភិរក្ស)។ ប៉ុន្តែ​ពុំ​ឃើញ​មាន​ឡើយ​ ឈ្មោះ​បង​ប្រុស​របស់​លោក​ប្រធានាធិបតី​ ដែល​តុលាការ​ទើប​កាត់​ទោស​ពី​បទ​ប្រព្រឹត្ត​រលួយ​ កាល​ពី​ពេល​ថ្មីៗ​នេះ។

 “មិនមែន​ជា​ការ​ប្រើ​អំណាច​ជ្រុលហួសហេតុ​ឡើយ” ! នេះ​ជា​ការ​អះអាង​របស់​លោក​ប្រធានាធិបតី​ផុត​អាណត្តិ​ ដែល​ពន្យល់​បំភ្លឺ​ការពារ​ខ្លួន​ថា លោក​គ្រាន់​តែ​ធ្វើ​តាម​ច្បាប់​និង​តាម​ដំណើរ​ការ​ដែល​មាន​ជា​ធរមាន​តែ​ប៉ុណ្ណោះ។

ប៉ុន្តែ​រាល់​ការ​លើក​លែង​ទោស​ខុស​ពេល​វេលា​ដែល​ប្រជាពលរដ្ឋ​មិន​បាន​ដឹង​ ជា​ប្រើ​អំណាច​ខុសច្បាប់​ និង​ដែល​អាច​នាំ​ដល់​ការ​ថ្កោល​ទោស​ជាតិ​ផង ! នេះ​ជា​បើ​តាម​អ្នកនាំពាក្យ​របស់​លោកស្រី ប៉ាក់ គុនហឺ (Park Geun-Hye) ដែល​ទើប​ជាប់​ឆ្នោត​ និង​ដែល​ជា​អនាគត​ប្រធានាធិបតី​កូរ៉េខាង​ត្បូង​ ​បន្ត​ពី​លោក​ លីម្យ៉ុង​បាក់។ ថ្វីដ្បិត​តែ​ប្រសូត​ចេញពី​​​បក្ស​អភិរក្ស​តែ​មួយ​ជាមួយគ្នាមែន ប៉ុន្តែ​លោកស្រី​ ដែល​បាន​ស្នើ​សុំ​ឱ្យ​ប្រធានាធិបតីផុត​អាណត្តិ​​កុំ​អនុគ្រោះ​ទោស​ដល់​មិត្ត​ភក្តិ​ពុករលួយ បាន​ចាត់​ទុក​ការ​លើក​លែង​ទោស​នេះ ថា​ជា “ទង្វើ​ដ៏​គួរ​ឱ្យ​សោកស្តាយ​បំផុត” !

សូម​បញ្ជាក់​ថា​ក្នុង​អំឡុង​ពេល​កាន់​អំណាច​៥​ឆ្នាំ លោក​ លី ម្យ៉ុងបាក់ បាន​ធ្វើ​ការ​​លើក​លែងទោស​ ដល់​ទៅ​៧​ដង។ ហើយ​ជា​រៀង​រាល់​លើក តែងទទួល​រង​​ការ​រិះគន់​​យ៉ាង​ខ្លាំង​ ព្រោះ​លោក​តែង​ដោះលែង​ថៅកែ​ធំៗ មាន​ជា​អាទិ៍​ប្រធាន​ក្រុមហ៊ុន​ Hyundai នៅ​ឆ្នាំ​២០០៨ និង​ប្រធាន​ក្រុមហ៊ុន Samsung នៅ​ឆ្នាំ​២០០៩ ដែល​អ្នក​ទាំងពីរ​ម្នាក់​ជាប់​ទោស​កេង​បំបាត់​ថវិកា និង​លួច​គេច​ពន្ធ។ ទង្វើ​ដែល​ប្រជាពលរដ្ឋ​មើល​ឃើញ​ថា​ផ្ទុយ​ស្រឡះ​នឹង​ពាក្យ​សន្យា​កាលពី​ដើម​អាណត្តិ​ ដែល​ លោក​លីម្យ៉ុងបាក់ ប្រាថ្នា​បង្កើត​​រដ្ឋាភិបាល​​ស្អាតស្អំ ​ប្រយុទ្ធ​ប្រឆាំង​នឹង​អំពើ​ពុករលួយ​ មិន​ដូច​រដ្ឋាភិបាល​មុនៗ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ