កម្ពុជា-តុលាការ

សហព្រះរាជអាជ្ញា​យល់ព្រម​ឲ្យ​ដោះលែង​លោកស្រី អៀង ធីរិទ្ធ

សហព្រះរាជអាជ្ញា​ យល់ព្រម​ដោះលែង​លោកស្រីអៀង​​ធីរិទ្ធ អតីត​រដ្ឋមន្ត្រី​ក្រសួង​សង្គមកិច្ច​ខ្មែរ​ក្រហម​
សហព្រះរាជអាជ្ញា​ យល់ព្រម​ដោះលែង​លោកស្រីអៀង​​ធីរិទ្ធ អតីត​រដ្ឋមន្ត្រី​ក្រសួង​សង្គមកិច្ច​ខ្មែរ​ក្រហម​

ភាគី​​សហ​​ព្រះរាជ​​អាជ្ញា​​របស់​​តុលាការ​​ខ្មែរ​ក្រហម​ បាន​​បង្ហាញ​​ជំហរ​ នៅ​​ថ្ងៃ​​សុក្រ​​នេះ​​ថា​ ​យល់​ព្រម​​ឲ្យ​​តុលាការ​ ដោះលែង​​លោកស្រី​ អៀង ធីរិទ្ធ​ អតីត​​រដ្ឋមន្ត្រី​​ក្រសួង​​សង្គមកិច្ច​​ខ្មែរក្រហម​ ​ដោយ​​ស្ថិត​​ក្រោម​​លក្ខខណ្ឌ​​មួ​យ​​ចំនួន។​ មូលហេតុ​​មក​​ពី​​លោកស្រី ​អៀង ធីរិទ្ធ​ មាន​​ជំងឺ​​វង្វេង​​វង្វាន់​​ស្មារតី​ ដែល​​តាម​​គ្រូពេទ្យ​ គឺ​​មិន​​អាច​​ព្យាបាល​​បាន​​ទេ។​ ក៏​ប៉ុន្តែ​​ភាគី​​មេ​ធាវី​​ការពារ​​ជន​​រង​គ្រោះ​ បាន​​ជំទាស់​​ហើយ​​យល់​​ថា​ លោកស្រី​ អៀង ធីរិទ្ធ​ អាច​​ធ្វើ​​ពុត​ ជា​​វង្វេង​​ស្មារតី​ ដើម្បី​​បន្លំ​​គ្រូពេទ្យ។​ ក្រុម​​មេ​ធាវី​​ការពារ​​ជន​​រងគ្រោះ ​បាន​​ស្នើ​​សុំ​​ឲ្យ​​តុលាការ​​បន្ត​​ឃុំ​​ខ្លួន​​លោកស្រី​ អៀង ធីរិទ្ធ​និង​​បង្កើត​​ក្រុម​​វេជ្ជបណ្ឌិត​​ថ្មី​ ជា​​គ្រូពេទ្យ​​ស្រ្តី​​ដើម្បី​​ពិនិត្យ​​ជំងឺ​​របស់​​លោកស្រី​​ម្តង​​ទៀត៕

ផ្សាយពាណិជ្ជកម្ម

ក្នុងពេល​បិទ​បញ្ចប់​សវនាការ លើ​កាយសម្បទា និង​បញ្ញា​ស្មារតី​របស់​លោកស្រី អៀង ធីរិទ្ធ នា​រសៀល​ថ្ងៃ​ទី​៣១ ខែ​សីហា ឆ្នាំ​២០១២ ភាគី​សហ​ព្រះរាជអាជ្ញា​របស់​តុលាការ​ខ្មែរក្រហម បាន បង្ហាញ​ជំហរ សន្និដ្ឋាន​ចុងក្រោយ​ថា ភស្តុតាង​នៅ​ចំពោះមុខ បានបញ្ជាក់​អស់ហើយ​ថា លោកស្រី​ អៀង ធីរិទ្ធ ទទួលរង​នូវ​ជំងឺ​រវើរវាយ​ពី​កម្រិត​មធ្យម​ទៅ​ធ្ងន់ ហើយ​វា​ប៉ះពាល់​ដល់​កម្រិត​ធ្ងន់​មួយ​ដែលថា លោកស្រី អៀង​ធីរិទ្ធ មិន​អាច​ប្រើប្រាស់​សិទ្ធិ​ជំនុំជម្រះ ដោយ​យុត្តិធម៌​បានទេ​។ ដូច្នេះហើយ ព្រះរាជអាជ្ញា យល់ថាលោកស្រី អៀង ធីរិទ្ធ មិន​មាន​សម្បទា​គ្រប់គ្រាន់ ក្នុង​ការចូលរួម​ក្នុង​សវនាការ​នោះ​ឡើយ​។

​ភាគី​សហ​ព្រះរាជអាជ្ញា មិន​មាន​សំណើ​ណាមួយដើម្បី​បន្ត​ឃុំខ្លួន​លោកស្រី អៀង ធីរិទ្ធឡើយ។ ផ្ទុយទៅវិញ​ព្រះរាជអាជ្ញា បាន​យល់ព្រម​ឲ្យ​តុលាការ​ដោះលែង​លោកស្រី​អៀង​ធីរិទ្ធ តែ​ត្រូវ​ស្ថិត​ក្រោម​លក្ខខណ្ឌ ៦ ចំណុចដើម្បី​ធានា​ដល់​វត្តមាន​របស់​លោកស្រី នៅ​ចំពោះមុខ​តុលាការ និង​​មិន​គំរាមកំហែង​ដល់​សាក្សី រួមទាំង​កិច្ចដំណើរការ​សវនាកា​រ​។​

​ក៏​ប៉ុន្តែ​ភាគី​សហ​មេធាវី​នាំមុខ ការពារ​ដើម​បណ្តឹងរដ្ឋប្បវេណី ដែល​ជា​ជនរងគ្រោះ បាន​យល់​ឃើញ​ផ្ទុយ​ពី​នេះ ហើយ​ថា លោកស្រី​អតីត​រដ្ឋ​មន្ត្រី​ក្រសួង​សង្គមកិច្ច អៀង​ធីរិទ្ធ អាយុ ៨០ ឆ្នាំ បាន​ធ្វើ​ពុត ជា​វង្វេងស្មារតី​ប៉ុណ្ណោះ​។
​មេធាវី​ការពារ​ជនរងគ្រោះ បាន​សំអាង​ថា លោកស្រី អៀង ធីរិទ្ធ ជា​អ្នក​មាន​ការអប់រំ​ខ្ពស់​នៅ​ប្រទេស​បារាំង ជា​អ្នកដឹកនាំ​ក្នុង​ចលនា​តស៊ូ ជា​អ្នកដឹកនាំ​ការផ្សាយ​វិទ្យុ​ខ្មែរក្រហម ហើយក៏​ជា​រដ្ឋមន្ត្រី​។ ដូច្នេះ​តាម​មេធាវី លោកស្រី​អៀង​ធីរិទ្ធ មានចំណេះដឹង និង​មាន​ជំនាញ ក្នុងការ​បំភ័ន្ត​ចំលើយ របស់​គ្រូពេទ្យ​។​

​មេធាវី​ដើម​បណ្តឹងរដ្ឋប្បវេណី ចង់​ឲ្យ​តុលាការបង្កើត​ក្រុម​វាយ​តម្លៃ​មួយ​ទៀត ដែល​ជា​វេជ្ជ​បណ្ឌិត​​​​ជំនាញ ភេទ​ស្រី និង​បន្ត​ឃុំខ្លួន​លោកស្រី​អៀង​ធីរិទ្ធ​បន្តទៀត​។ ​យ៉ាង​ក៏ដោយ លោក​​​មេធាវី ផាត់ ពៅ​ស៊ា​ង សហ​មេធាវី​ជាតិ ការពារ​ក្តី​របស់​លោកស្រី អៀង ធីរិទ្ធ បាន​ច្រាន​ចោល​នូវ​ការស្នើសុំ​របស់​សហ​មេធា​វី​ការពារ​ក្តី ដើម​បណ្តឹងរដ្ឋប្បវេណី ហើយ​ថា ការវាយ​តម្លៃ​​លើ​ជំងឺ​វង្វេងវង្វាន់​របស់​លោក​ស្រី អៀង ធីរិទ្ធ ត្រូវបាន​ធ្វើឡើង ៤ លើក​មក​ហើយ​។​
​លោក​មេធាវី ផាត់ ពៅ​ស៊ា​ង បានបញ្ជាក់​ថា "​អ្នកជំនាញ​បានធ្វើ​សេចក្តីសន្និដ្ឋាន ដោយ​ផ្អែក​ទៅតាម​បែបបទ​របស់​ពេទ្យ ដោយ​ទទួលស្គាល់​ដោយ​អង្គការ​សុខភាព​ពិភពលោក គឺ​បាន​ពិត​ឃើញថា ត្រឹមត្រូវ ហើយក៏​បាន​វាយតម្លៃ​ទៅតាម​តេស្ត MMSE គឺ​គេ​បាន​ពិនិត្យ​បាន​ត្រឹមត្រូវ​ហើយ​។ ដូច្នេះ​សំណើសុំ​នេះ ខ្ញុំបាទ​យល់ឃើញថា គឺ​មិន​អាច​អូសបន្លាយ​បានទេ គឺថា ពិនិត្យ​ដោយ​អ្នកជំនាញ ចំនួន ៤​លើក​មក​ហើយ​"​។​

​លោក​មេធាវី បាន​ស្នើ​ដល់​តុលាការ ឲ្យ​ដោះលែង​លោក​ស្រី អៀង ធីរិទ្ធ ដោយ​គ្មាន​លក្ខខណ្ឌ ដើម្បី​ទុក​លទ្ធភាព​ថែទាំ​ឲ្យ​គ្រួសា​ររបស់គាត់ ក្រែងលោ​កែសម្រួល​សុខភាព​របស់​គាត់ បាន​ប្រសើរ​ឡើង​វិញ​។​
​មុន​នឹង​បញ្ចប់​ការផ្តល់​សក្ខីកម្ម​របស់​ខ្លួន ក្នុង​សវនាការ នៅ​រសៀល​ថ្ងៃ​ទី​៣១ ខែ​សីហា ឆ្នាំ​២០១២ លោក​វេជ្ជបណ្ឌិត ស៊ីណា ហ្វា​ហ្សែ​ល ( Seena Fazil ) ដែល​ជា​គ្រូពេទ្យ​ជំនាញ​វាយតម្លៃ​ជំងឺ​របស់​លោកស្រី អៀង ធីរិទ្ធ ក្នុងចំណោម​គ្រូពេទ្យ​ជាតិ និង​អន្តរជាតិ ទាំង ៤ រូប បាន​គូសបញ្ជាក់ថា ការបង្ហាញ​ក្នុង​របាយការណ៍​វាយតម្លៃ តាមរយៈ​ការធ្វើ​តេស ដែល​មាន​ការទទួលស្គាល់​ពី​អង្គការ​សុខភាព​ពិភពលោក បង្ហាញថា លោកស្រី អៀង ធីរិទ្ធ មិន​មាន​សមត្ថភាព ក្នុង​ការប្រើប្រាស់​សិទ្ធិ​ដើម្បី​ការពារ​ខ្លួនឯង ក្នុងការ​ជំនុំជម្រះ​ដោយ​យុត្តិធម៌​បាន​ទេ នោះ​ក៏​ព្រោះតែ​លោកស្រី មាន​ជំងឺ​វង្វេងវង្វាន់​ស្មារតី កាន់តែ​ធ្ងន់ធ្ងរ​។
​សវនាកា​រលើ​ការវាយតម្លៃ​កាយសម្បទា និង​បញ្ញា​ស្មារតី​របស់​លោកស្រី អៀង ធីរិទ្ធ រយៈពេល​ពីរ​ថ្ងៃ ចាប់ពី​ថ្ងៃ​ទី​៣០ ខែ​សីហា បាន​បិទ​បញ្ចប់​នា​រសៀល​ថ្ងៃទី​៣១ ខែ​សីហា ឆ្នាំ​២០១២​។ លោក​ចៅក្រម និល ណុន បានប្រកាសថា អង្គជំនុំជម្រះ​សាលាដំបូង របស់​តុលាការ​ខ្មែរក្រហម នឹង​ចេញ​សេចក្តីសម្រេច នៅ​ថ្ងៃក្រោយ ដើម្បី​សម្រេច​ថា ត្រូវ​ដោះលែង​លោកស្រី​អៀង​ធីរិទ្ធ ឬ​ក៏​បន្ត​ឃុំឃាំង​លោកស្រី ដើម្បី​នាំយក​ទៅ​កាត់ទោស​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI