រុស្ស៊ី

រុស្ស៊ី​ស្នើ​ជា​ផ្លូវការ​ទៅ​សរអា​ឲ្យ​លុប​ទិដ្ឋាការ​ ទៅវិញ ទៅមក

នាយករដ្ឋមន្រ្តី​រុស្ស៊ី លោក​Vladimir Putin (ស្តាំ) ចាប់ដៃ​ជាមួយ​អនុប្រធានាធិបតី​អាមេរិក លោកJoe Biden ក្នុង​ទីក្រុង​ម៉ូស្កូ នៅថ្ងៃ​ទី​១០ មីនា ២០១១
នាយករដ្ឋមន្រ្តី​រុស្ស៊ី លោក​Vladimir Putin (ស្តាំ) ចាប់ដៃ​ជាមួយ​អនុប្រធានាធិបតី​អាមេរិក លោកJoe Biden ក្នុង​ទីក្រុង​ម៉ូស្កូ នៅថ្ងៃ​ទី​១០ មីនា ២០១១ ©Reuters

សំណើ​គួរឲ្យ​ភ្ញាក់ផ្អើលនេះ ត្រូវ បាន​​បំផុសមក​ដោយ​លោកនាយករដ្ឋមន្ត្រីរុស្ស៊ី Poutine ​នា​កិច្ចចរចា​ម្សិលមិញ នៅក្រុងម៉ូស្គូ​ជាមួយ​លោក​អនុប្រធានាធិបតី​អាមេរិកាំង Joseph Biden។ នៅ​​ក្នុង​ជំនួប​នេះ អាមេរិក​បាន​សន្យា​គាំទ្រ​ឲ្យ​រុស្ស៊ី​បាន​ចូល ជា សមាជិក “អង្គការ​ពាណិជ្ជកម្ម​ពិភពលោក”។ ថ្នាក់ដឹកនាំ​ប្រទេស​ទាំងពីរ​ពិភាក្សា​គ្នា​ផងដែរ ពី​រឿង​បង្កើត​ជា “ប្រព័ន្ធ​ខែល​មីស្ស៊ីល​ប្រឆាំង មីស្ស៊ីល“ នៅទ្វីបអឺរ៉ុប“ជាដើម។ ទោះយ៉ាងណាក្តី ក៏លោក Biden ប្រតិកម្ម​ដោយ​សំដីការទូត​ថា ​សំណើ​នេះ ជា “គំនិត​ដ៏ល្អ“។

ផ្សាយពាណិជ្ជកម្ម

សេចក្តី​រាយការណ៍​របស់​កែវ ឆាយា​ពី​ទីក្រុង​ម៉ូស្គូ

ជាការកត់សម្គាល់ នេះជាលើកទី១ ​ដែលក្នុង​ប្រវត្តិ​នៃ​ទំនាក់ទំនង​រវាង​រុស្ស៊ី និងអាមេរិក មាន​បន្លឺឡើង ជាសំណើ ឲ្យ​លុបទិដ្ឋាការ​ទៅវិញទៅមក។

មុននឹង​ដាក់ចេញមក​ជាសំណើ​បែបនេះ លោក Poutine លាតត្រដាង​ទៅ​គូសន្ទនា​អាមេរិកាំង នូវ ទឡ្ហីករណ៍​ដែលថា ក្នុង​១៥ឆ្នាំ​កន្លងទៅ តាំងពី​លោក Biden បាន​អញ្ជើញ​មក​កាន់ប្រទេស រុស្ស៊ី​កាល​ពីលើក​មុន។ នៅ​រុស្ស៊ី​ពេលនេះ​មាន​ការផ្លាស់ប្តូរ​សឹងមើល​លែងស្គាល់។ ពួកអ្នកជំនួញ​អាមេរិកាំង ប្រកបរបរ​ខ្លួន​នៅរុស្ស៊ី​កាន់តែច្រើន​ឡើង ក៏​ដូចជា​ពួកអ្នកជំនួញ​រុស្ស៊ី ទៅរកស៊ី​នៅ អាមេរិក ​កាន់តែច្រើន​ឡើងដែរ។ ដូច្នេះ គប្បី​គួរ​លុប​​របង​ដែល​តែង​ខាឃាំង ដល់​ការធ្វើ​ដំណើរ​របស់​ពួកគេ​ទៅវិញទៅមក។

ប្រមុខ​រដ្ឋាភិបាល​រុស្ស៊ី ក៏​លំអិត​ថា បច្ចុប្បន្ន រុស្ស៊ី​កំពុង​ធ្វើ​កិច្ចចរចា​យ៉ាង​សកម្ម​ជាមួយ បណ្តា​ប្រទេស​សហភាពអឺរ៉ុប ឆ្ពោះទៅ​លុបទិដ្ឋាការ​ទៅវិញ ទៅមកដែរ។ ចំណែកស.រ.អា. សព្វថ្ងៃ គឺអនុវត្ត​​ទៅហើយ ជាមួយគ្រប់ប្រទេស​សហភាពអឺរ៉ុប នូវ​របប​លើកលែង​ទិដ្ឋាការ។ បើរុស្ស៊ី និង ស.រ.អា. ចេះនិយាយ​បានត្រូវគ្នា ក្នុងរឿង​លើកទិដ្ឋាការ​ទៅវិញ​ទៅមក បាន​មុន សហភាពអឺរ៉ុប ធ្វើជាមួយរុស្ស៊ី ការនេះ​នឹងក្លាយទៅជា​ជំហាន​ប្រវត្តិសាស្ត្រ ក្នុង​ការអភិវឌ្ឍន៍ ទំនាក់ទំនង​រុស្ស៊ី -អាមេរិក។

មិនតែប៉ុណ្ណោះ តាមប្រសាសន៍លោក Poutine ការនេះ​នឹង​កាច់បំបាក់​រាល់​ផ្នត់​គំនិត ចាស់​ដុះស្លែរ សល់តាំង​ពីជំនាន់​សហភាព​សូវៀត​មក លុះទាល់តែ ផ្លាស់ប្តូរ​រហូតដល់ ឫសគល់ ផ្នត់គំនិត​របស់​ប្រជាជនរុស្ស៊ី ចំពោះប្រជាជនអាមេរិក ក៏ដូចជា​ផ្នត់គំនិត ដែល​បណ្តាជន អាមេរិក​តែង​ចិញ្ចឹម​ចំពោះ​ប្រជាជន​រុស្ស៊ី។ ក្នុងខណៈនោះ អាមេរិក និងរុស្ស៊ី នឹង​បិទ​ទំព័រ​អតីតកាល​ខ្លួន ហើយ​ចាប់ផ្តើម​ពីអ្វីៗ​ដែលថ្មី ដោយ​បង្កើត​បរិយាកាស​ចិត្តសាស្ត្រ​ថ្មីស្រឡះ។

ជា​ចម្លើយតបវិញ លោកអនុប្រធានាធិបតីអាមេរិកាំង Biden បានថ្លែង ដោយលើក ម្រាម​ដៃ​ធំ បង្ហាញ​ទៅលោក Poutine ក្នុងន័យ​សាទរ ថា សំណើ​ឲ្យលុប ទិដ្ឋាការនោះ គឺជា “គំនិតដ៏ល្អ“។

ឃើញដូច្នេះ លោក Poutine ក៏បន្ថែមថា គាត់ចាត់ទុកប្រតិកម្ម​ជា​វិជ្ជមាន ពីខាង លោកអនុ ប្រធានាធិបតី​អាមេរិកាំង ដែល​ជា​ឥស្សរជន​មាន​ទឹកមាត់ប្រៃ​ស្រាប់ ក្នុង​សមាជ​សភាអាមេរិក គឺ​សំខាន់ណាស់ សម្រាប់រុស្ស៊ី។

ភ្លាមនោះ លោក Biden បានធ្វើការកត់សម្គាល់ថា “រវាងរូបខ្ញុំ​ជាអនុប្រធានាធិបតី និង រូបលោក​ប្រធានាធិបតី​​អាមេរិកផ្ទាល់ គឺ​នៅ​មាន​គម្លាត​ធំ នៅឡើយ។ ប៉ុន្តែ ដំណឹង​ដែលល្អ គឺថា ទាំងរូប​លោក​ប្រធានាធិបតី ទាំងរូបខ្ញុំ សុទ្ធ​តែ​ឯកភាព​ថា ជា​ការចាំបាច់​ដែល​ត្រូវតែ​បង្ខិត​រុស្ស៊ី និង អាមេរិក ឲ្យកាន់តែ​ខិតចូលជិតគ្នា”៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI