កូរ៉េ

មន្ត្រី​ជាន់ខ្ពស់​កូរ៉េ​ខាង​ត្បូង ទៅ​បំពេញ​ទស្សនកិច្ច​មនុស្សធម៌ និង​នយោបាយ​នៅ​ព្យុងយ៉ាង

សមុទ្ទ​លឿង​
សមុទ្ទ​លឿង​ Getty Images/Ryan McVay

អ្នក​ទទួល​ខុស​ត្រូវ​ជាន់​ខ្ពស់​កូរ៉េ​ខាង​ត្បូង​ម្នាក់ ទើប​អញ្ជើញ​ទៅ​ដល់​ក្រុង​ព្យុង​យ៉ាង ប្រទេស​កូរ៉េខាងជើង ជា​បង​ប្អូន​គូ​សត្រូវ​នឹង​គ្នា។ កម្មវត្ថុ​ចំបង​នេះ​បេសកកម្ម​៥​ថ្ងៃ​នេះ គឺ​ជា​ផ្លូវការ​ដើម្បី​ត្រួត​ពិនិត្យ​​ការ​ចែក​ចាយ​អំណោយ​មនុស្ស​ធម៌​​ដល់​បណ្តា​ជន​ក្រីក្រ​ខាង​ជើង។ ប៉ុន្តែ​ទស្សនកិច្ច​ផ្លូវការ​​រៀប​ចំ​ដោយ​អង្គការ​ក្រៅ​រដ្ឋាភិបាល​ ដែលមានក្រុមនិកាយ​សាសនា​ Moon ជា​អ្នក​ផ្តល់​ហិរញ្ញប្បទាន​នេះ មាន​កប់​ជ្រៅ ទៅ​ដោយ​​បំណង​នយោបាយ។

ផ្សាយពាណិជ្ជកម្ម

ជា​លើក​ទី​មួយ​ គិត​ចាប់​ពី​កូរ៉េ​ខាង​ជើង​បាន​បាញ់​នាវា​មុជ​ទឹក​កូរ៉េ​ខាង​ត្បូង បណ្តាល​ឲ្យ​ស្លាប់​នាវិក​៤៦​នាក់​ កាលពី ១៨​ខែ​មុន​មក ដែល​តំណាង​ជាន់​ខ្ពស់​កូរ៉េ​ខាង​ត្បូង​អញ្ជើញ​ទៅ​កាន់​ក្រុង​ព្យុងយ៉ាង។ តំណាង​រដ្ឋាភិបាល​ក្រុង​សេអ៊ូល អប​ដំណើរ​ដោយ​សមាជិក​អង្គការ​ក្រៅ​រដ្ឋាភិបាល​បួន​នាក់ឧបត្ថម្ភ​ដោយ​ក្រុម​គ្រិស្ត​សាសនា​ និកាយ​ Moon ដែល​ធ្លាប់​មាន​ទំនាក់ទំនង​ល្អ​​ជាមួយ​នឹង​របប​កុម្មុយនិស្ត​ព្យុងយ៉ាង។

 
បើ​យោង​តាម​ទី​ភ្នាក់ងារ​សារព័ត៌មាន ​Yonhap​ តំណាង​កូរ៉េ​​ខាង​ត្បូង​ទាំង​៥​រូប មាន​បេសកកម្ម​ត្រួត​ពិនិត្យ​ការ​ចែក​ចាយ​​ម្សៅ​ចំនួន ៣០០​តោន ដល់​ប្រជាជន​នៅ​ក្រុង​ Jongju ក្រុង​កំណើត​របស់​អ្នក​បង្កើត​និកាយ​Moon ក្រែង​មាន​ក្រុម​​​យោធា​លួច​បង្វែរ​​ជំនួយ​នេះ​បាន។

ដំណើរ​ទស្សនកិច្ច​ជា​ផ្លូវការ​នេះ ជា​សញ្ញា​ថ្មី​មួយ​បន្ថែម​ទៀត​ បង្ហាញ​អំពី​ចេតនា​​ចង់​​រំសាយ​កំហឹង​ប្រឈម​មុខ​ដាក់​គ្នា។​ ដើម្បី​បន្ធូរ​បន្ថយ​សម្ពាធ​តាន​តឹង​ ជាមួយ​នឹង​កូរ៉េ​ខាង​ជើងជា​​បង​ប្អូន​គូ​សត្រូវនឹង​​គ្នា​​ កូរ៉េ​ខាង​ត្បូងតែង​បង្ហាញ​ពីភាព​​ទន់​ភ្លន់​ និង​ការ​សម្រប​សម្រួល។ សេអ៊ូល ទើប​បាន​ប្រកាស​សន្យា​ផ្តល់​ជំនួយ​មនុស្សធម៌​ តាម​រយៈ​​ទី​ភ្នាក់ងារ​​អង្គការ​សហប្រជាជាតិ​ ដែល​មាន​វត្តមាន​នៅ​ក្នុង​ប្រទេសកូរ៉េ​ខាង​ជើង​ស្រាប់។

ក៏​ប៉ុន្តែការ​បន្ធូរ​បន្ថយ​សម្ពាធ​នេះ​ នៅ​មាន​លក្ខណៈ​តិច​តួច​នៅ​ឡើយ​ទេ។ កាល​ពី​ថ្ងៃ​ព្រហស្បតិ៍​​កន្លង​ទៅ​ ក្រុង​ព្យុងយ៉ាង​បាន​​រិះគន់​កូរ៉េ​ខាង​ត្បូង​ជា​ថ្មី អំពី​ការ​ធ្វើ​សមយុទ្ធ​នៅ​ក្នុង​សមុទ្ទ​លឿង និង​បាន​គំរាម​​បំផ្លាញ​វិមាន​ប្រធានាធិបតី​កូរ៉េ​ខាង​ត្បូង​ឲ្យ​ក្លាយ​ជា​សមុទ្ទ​ភ្លើង !

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI