រុស្ស៊ី

​រុស្ស៊ី​ប្រតិកម្ម​ ​ចំពោះ​​ការ​ធ្វើ​បត្យាប័ន​ពលរដ្ឋ​ខ្លួន​ពី​ប្រទេស​ថៃ​ទៅ​​ស រ អា

ដៃ​ជាប់​ខ្នោះ​និង​ពាក់​មួក​ដែក Viktor Bou ឈ្មួញរត់ពន្ធអាវុធ ត្រូវបានគេអមដំណើរទៅកាន់​យន្តហោះមួយគ្រឿង​នោ​ទីក្រុង​បាងកក ថ្ងៃ​១៦​វិច្ឆិកា២០១០​
ដៃ​ជាប់​ខ្នោះ​និង​ពាក់​មួក​ដែក Viktor Bou ឈ្មួញរត់ពន្ធអាវុធ ត្រូវបានគេអមដំណើរទៅកាន់​យន្តហោះមួយគ្រឿង​នោ​ទីក្រុង​បាងកក ថ្ងៃ​១៦​វិច្ឆិកា២០១០​ Reuters/Stringer

ពលរដ្ឋ​រុស្ស៊ីនោះ ឈ្មោះ Viktor Bout អាយុ ៤៣ឆ្នាំ ដែល​ត្រូវ​អាមេរិក​ចោទ​ថា ជា​ឈ្មួញ​លក់​អាវុធ ទៅ​ឲ្យ ក្រុម​ភេរវជន​នានា​ក្នុង​លោក បាន​ត្រូវ​ដឹក​តាម​យន្តហោះ​អាមេរិកាំង ទៅ​ដល់​ក្រុង​ញីវយ៉ក ទៅ​ហើយ កាលពី​ល្ងាច​ម្សិល​មិញ។ ទីក្រុង​ម៉ូស្គូ ចាត់​ទុក​របៀប​របប​ធ្វើ​បត្យាប័ន​នេះ​គឺ ជា​ការ​បំពាន​លើ​បទដ្ឋាន​ពីរ ៖ បទដ្ឋាន​ជា​នីតិវិធី​ផង ​បទដ្ឋាន​ការទូត​ផង។

ផ្សាយពាណិជ្ជកម្ម

សេចក្តី​រាយការណ៍​របស់ កែវ ឆាយា

ក្នុង​សេចក្តី​ថ្លែងការណ៍​ខ្លួន ក្រសួង​ការបរទេស​រុស្ស៊ី​​សង្កត់​ធ្ងន់​ថា ការ​ប្រគល់​ពលរដ្ឋ​រុស្ស៊ី​នោះ ដោយ​ភាគី​ថៃ​ទៅ​ក្នុង​ដៃ​អាមេរិក ខាង​ផ្លូវ​ច្បាប់ គឺ​វា​ល្មើស​លើ​សាលក្រម​ចេញ​ដល់​ទៅ​ពីរ​លើក ដោយ​សាលាឧក្រិដ្ឋ​ថៃ​ផ្ទាល់ ដែល​ទទួលស្គាល់​ថា គ្មាន​ភស្តុតាង​គ្រប់គ្រាន់​ទេ ដើម្បី​កាត់ទោស​លោក​ Viktor Bout ទៅ​តាម​ការ​ចោទ​ប្រកាន់​របស់​ស.រ.អា។ ព្រមជាមួយ​នេះ ទីក្រុង​ម៉ូស្គូ សន្យា​ថា ចាត់​រាល់តែ​វិធានការ​ចាំ​បាច់​សំរាប់​ការពារ​សិទ្ធិ​ស្របច្បាប់​របស់​ពលរដ្ឋ​ខ្លួន។

 
គួរ​រំលឹក​ថា អង្គ​ជំនុំ​ជំរះ​ពីរ​លើក​នោះ បាន​ប្រព្រឹត្ត​ទៅ ក្នុង​រយៈពេល​ជាង​២​ឆ្នាំ​កន្លះ​ដែល​សាមី​ខ្លួន​នោះ បាន​ជាប់​ឃុំឃាំង​នៅ​ក្នុង​ប្រទេស​ថៃ ក្រោយពី​គាត់​បាន​ត្រូវ​អាជ្ញាធរ​ថៃ​ឃាត់ខ្លួន​គាត់​ក្នុង​សណ្ឋាគារ​មួយ នៃ​ក្រុង​បាងកក កាលពី​ថ្ងៃ​៦​មីនា​ឆ្នាំ ២០០៨​មក ទៅ​តាម​ពាក្យ​សុំ​ឲ្យ​ចាប់​ខ្លួន ពី​ខាង​អាមេរិក។ ប៉ុន្តែ ៣​ខែ​មុន ​តុលាការ​ថៃ​ស្រាប់តែ​បាន​សំរេច​ថា ឲ្យ​បញ្ជូន​រូប​លោក Viktor Bout ទៅ​ឲ្យ​ស.រ.អា រក​ខុស​រក​ត្រូវ​ទៅ។

ចំណែក​រដ្ឋមន្ត្រី​ការបរទេស​រុស្ស៊ី លោក Serguei Lavrov ដែល​ម្សិលមិញ​ពេល​ធ្វើ​ទស្សនកិច្ច​នៅ​ប្រទេស​ Kenya បាន​ថ្លែង​ក្នុង​សន្និសីទ​កាសែត​ថា ទង្វើ​របស់​រដ្ឋាភិបាល​ថៃ ដែល​ធ្វើ​បត្យាប័ន​ពលរដ្ឋ​រុស្ស៊ី គឺ​ធ្វើ​ក្រោម​គំនាប​នយោបាយ​រក​លេខ​ដាក់​គ្មាន​ពី​ខាង​ស.រ.អា ហើយ​ទង្វើ​នេះ ជា​គំរូ​នៃ​អយុត្តិធម៌​ដែល​នាំ​ឲ្យ​ក្តួលក្តៅ​ក្រៃ​លែង។

ស​ឲ្យ​ឃើញ​ពី​ការ​បំពាន​ខាង​ផ្លូវទូត​ គឺ​ថា​អាជ្ញាធរ​ថៃ​ ពេល​ប្រគល់​រូប​ពលរដ្ឋ​រុស្ស៊ី​នោះ ទៅ​ឲ្យ​អាមេរិក​ ឥត​បាន​ប្រាប់​ឲ្យ​ស្ថានទូត​រុស្ស៊ី​នៅ​ក្រុង​បាងកក បាន​ដឹង​ជា​មុន​ឡើយ។ មិន​តែ​ប៉ុណ្ណោះ​ ក៏​ឥត​ជូន​ជា​ដំណឹង​អំពី​រឿង​នេះ ទៅ​មេធាវី​ដែល​ខំ​ការពារ​កូន​ក្តី​របស់​ខ្លួន​នោះ និង​ជាពិសេស មិន​ឲ្យ​ទាំង​ប្រពន្ធ​លោក Viktor Bout ផ្ទាល់ ដែល​មាន​វត្តមាន​នៅ​ក្រុង​បាងកក​ស្រាប់ ដើម្បី​តាមដាន​អំពី​វាសនា​ប្តី​ខ្លួន បាន​ដឹង​សោះ​ឡើយ។

បើនិយាយ​ពី​ស្ត្រី ​ប្រពន្ធ​លោក Viktor Bout នោះ​ ក្នុង​បទ​សម្ភាសន៍​ទៅ​កាសែត​ក្រុង​ម៉ូស្គូ​លេខ ថ្ងៃ​នេះ បាន​រិះ​គន់​អាជ្ញាធរ​រុស្ស៊ី​ថា មិន​ចេះ​ការពារ​ប្តី​គាត់​ជា​ពលរដ្ឋ​រុស្ស៊ី ដោយ​បណ្តោយ​ឲ្យ​របូត​បាត់​ទៅ​នូវ​ភ័ព្វសំណាង​ដែល​មាន​លេច​ចេញ​មក សំរាប់​ផ្តោះប្តូរ​រូប​ប្តី​គាត់ ទៅ​នឹង​រូប​អតីត​នាយករដ្ឋមន្ត្រី​ថៃ លោក ថាក់ស៊ីន​ស៊ីណាវ៉ាត់ ដែល​កាលពី​ត្រី​មាស​ទី​១​ឆ្នាំ​នេះ បាន​មក​ជ្រកកោន ​មួយ​រយៈពេល​នៅ​រុស្ស៊ី ហើយ​ដែលត្រូវ​រដ្ឋាភិបាល​លោក អាភីស៊ីត​ ទាមទារ​ពី​រុស្ស៊ី​ឲ្យ ប្រគល់​ទៅ​ក្រុង​បាងកក ក្នុង​ឋានៈ​ជា​ជន​ដែល​បាន​ត្រូវ​តុលាការ​ថៃ កាត់ទោស​កំបាំង​មុខ​ទៅ​ហើយ ចំពោះ​ការ​ប្រើ​មុខ​តំណែង​ខ្លួន ដោយ​រំលោភ​លើ​ច្បាប់។ ស្ត្រី​នោះ ថ្លែង​ទាំង​ក្តៅ​ក្រហាយ​ថា បើ​ប្តី​គាត់ ឈ្មោះ Viktor Bout បែរ​ទៅ​ជា​អាមេរិក​ត្រូវការ​ជាង​មាតុប្រទេស​រុស្ស៊ី​ទៅ​វិញ​នោះ ចាប់ពី​អំណើះ​តទៅ សូម​ប្តី​គាត់​ធ្វើ​ទៅ​នូវ​រាល់​អ្វីៗ​ដែល​អាមេរិក​ត្រូវការ​ចង់​បាន​ដើម្បី​សង្គ្រោះ​ជីវិត​ខ្លួន ដោយ​ខ្លួន​ឯង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI