រុស្ស៊ី

រុស្ស៊ី​ក្លាយ​ជា​ម្ចាស់ផ្ទះ​​ជំនួស​ជប៉ុន

©

ជំនួសនេះ គឺ​ដើម្បី​ទទួល​ឲ្យ​ប្រព្រឹត្ត​ទៅ “ការប្រកួត​ជើងឯក​ពិភពលោក ខាងរាំ​លើ​ទឹកកក ឆ្នាំ​២០១១”នេះ។ តាមពិត គឺ​ជប៉ុន​ទេតើ ដែល​ត្រូវ​បំពេញ​ភារកិច្ចនេះ តាំង​ពី​ថ្ងៃ​២១មីនា​ដើម​សប្តាហ៍​នេះ លុះ​រហូត​ដល់​ថ្ងៃអាទិត្យ ២៧​មីនា​ខាងមុខ។ ប៉ុន្តែ​ដោយ​មក​ពី រងគ្រោះ​ធ្ងន់​នឹង​ការរញ្ជយដី កាល​ពី​ថ្ងៃ​១១មីនា​កន្លង​ទៅ ជប៉ុន​ក៏​បាន​បង្ខំចិត្ត ប្រកែក​តួ​នាទីនេះ។

ផ្សាយពាណិជ្ជកម្ម

សេចក្តីរាយការណ៍កែវ ឆាយា​ពី​ទីក្រុង​ម៉ូស្គូ

រុស្ស៊ី​ក្លាយ​ជា​ម្ចាស់ផ្ទះ ជំនួស​ជប៉ុន គឺ​ដោយ​យោង​ទៅលើ លទ្ធផល​នៃ​ការបោះឆ្នោត រសៀល​ថ្ងៃ​ព្រហស្បតិ៍ ទី ២៤ មីនា  នៅឯក្រុង Lausanne ប្រទេស​Suisse ដែល​ជា​ទីស្នាក់ការ​នៃ “សហភាព​កីឡា​អន្តរជាតិ​ខាងដើរ​ប៉ាតាំង រំអិល​លើ​ទឹកកក“ ជា​ភាសា​អង់គ្លេស​ថា International Skating Unoin (ISU)។ បេក្ខភាព​ប្រទេស​រុស្ស៊ី ដែល​បាន​ទទួល សំឡេង​គាំទ្រ​ភាគច្រើន​ដាច់ខាត ពី​ក្នុង​ចំណោម​៦៣​រដ្ឋ ជា​សមាជិក ISU ឈ្នះ​លើ បេក្ខភាព ៥ប្រទេស​ទៀត ពោល គឺ សហរដ្ឋអាមេរិក កាណាដា ហ្វាំងឡង់ អូទ្រីស្ត និង ក្រូអាត។

លទ្ធផលនេះ​ស​ឲ្យឃើញ​ពី​ការទទួល​ស្គាល់​ឧបការគុណ​នៃ​សាលា​រុស្ស៊ី ដែល​ជំនាញ​ខាង​បណ្តុះបណ្តាល​អ្នកកីឡា​ខ្លួន​ឲ្យ​ទទួល​បាន​ជ័យជំនះ ជាច្រើន​លើក​ទៅហើយ​ខាង​មុខ​កីឡា​នេះ។

ក្រោយ​ពី​បាន​ត្រូវ សហភាពកីឡា ISU ប្រគល់​ជាផ្លូវការ​នូវ​សិទ្ធិ​ជាម្ចាស់ផ្ទះ​ខាង​ចាត់ចែង ​ការប្រកួត​ជើងឯក មកឲ្យ​រុស្ស៊ី លោក​នាយក​រដ្ឋមន្ត្រី Poutine បាន​ផ្ទុកផ្តាក់ រដ្ឋមន្ត្រី ក្រសួង​កីឡា យុវជន និង​ទេសចរណ៍ ព្រម​ទាំងស្ថាប័ន​សមស្រប ឲ្យ​រៀបចំ ដោយ​កុំ​បង្អែបង្អង់​ឡើយ ការប្រកួត​នេះ នៅទីក្រុងម៉ូស្គូ ពីថ្ងៃ ២៤មេសា រហូត​ដល់ថ្ងៃ ទី​១ឧសភា​ខាងមុខ។ គាត់​ថែម​ទាំង​អះអាង​ថា ការប្រកួតជើងឯក​នោះ​នឹង​ប្រព្រឹត្ត​ទៅ ក្នុង​កម្រិតខ្ពស់​បំផុត​ក្នុងលក្ខណៈ នៃ​ការបំពេញ​ឥតខ្ចោះ តាម​ការទាមទារ របស់ ISU។ រុស្ស៊ី នឹងសម្រួល​ការចេញ​ទិដ្ឋាការ​និង​ខាង​ធានា​សន្តិសុខ​ដល់​រាល់​ពួក​អ្នកចូលរួម​ប្រកួត​ និង​រាល់ភ្ញៀវ​ទាំងអស់។

ក្នុងឆ្នាំ​២០០៥​រុស្ស៊ី​ធ្លាប់​បាន​ធ្វើ​ជា​ម្ចាស់ផ្ទះ ទទួល​ការប្រកួត​នេះម្តង​រួច​ទៅហើយ។ គួរ​និយាយ​ថា សហភាពកីឡា ISU International Skating Union ​ដែលបានប្រសូត​មក នៅ​ប្រទេស​ហូឡង់ តាំងពី​ក្នុង ឆ្នាំ១៨៩២ ម៉្លេះ បានបើក​ធ្វើការ​ប្រកួត​ជើងឯក​ពិភពលោក ​ខាង​សិល្បៈ​រាំ​រំអិល​លើ​ទឹកកក ជា​លើកដំបូង​បង្អស់ គឺក្នុងឆ្នាំ១៨៩៦ នៅអតីត​រាជធានីរុស្ស៊ី ក្រុង​Saint-Petersbourg តែម្តង។

អន្តរជាតិ​បន្ត​ទទួល​ស្គាល់​តួនាទី​រុស្ស៊ី​ខាងកីឡា ដោយប្រគល់​ការទុកចិត្ត​មកលើ​រុស្ស៊ី ​ធ្វើជា​ម្ចាស់ផ្ទះ​រៀបចំ​កីឡា​អូឡាំពិក​រដូវត្រជាក់ ក្នុង​ឆ្នាំ២០១៤ ហើយក្នុងឆ្នាំ ២០១៨ គឺ ការប្រកួត​ជើងឯក​ពិភពលោក​ខាងកីឡា​បាល់ទាត់ ហៅថា “World Cup-2018“៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI