អានតួអត្ថបទ
រុស្ស៊ី

តើ​មហន្តរាយ​នុយក្លេអ៊ែរ​ស៊ីវិល​នៅ​ជប៉ុន អាច​ជះ​ឥទ្ធិពល​មកលើ​វិស័យ​នុយក្លេអ៊ែរ​នៅ​រុស្ស៊ី ឬទេ?

រោងចក្រ​នុយក្លេអ៊ែរ​រុស្ស៊ី
រោងចក្រ​នុយក្លេអ៊ែរ​រុស្ស៊ី
ដោយ៖ កែវ ឆាយា
១៩ នាទី

ស្ថាប័ន​រដ្ឋរុស្ស៊ីឈ្មោះ RosAtom ខាងសាងសង់​ស្ថានីយ​អគ្គិសនី​បរមាណូ កំពុង តាមដាន​អំពី​ប្រតិបត្តិការ​ពុះពារ​ជំនះ​លើ​ផលវិបាក បណ្តាលមកពីការ​ផ្ទុះខូច​ក្នុង រោងចក្រ​អគ្គិសនី ដើរដោយ​ថាមពល​បរមាណូ​នៅក្រុង Fukushima ប្រទេស ជប៉ុន។ ដ្បិត​សោកនាដកម្ម នេះ ញ៉ាំង​ប្រទេស​ខ្លះ​ឲ្យ​សំដែង​ទៅហើយ​នូវ ឥរិយាបថ​អវិជ្ជមាន ចំពោះ រោងចក្រ​អគ្គិសនី​ណា ដែលដើរ​ដោយ ថាមពល​នុយក្លេអ៊ែរ។

ផ្សាយពាណិជ្ជកម្ម

សេចក្តី​រាយការណ៍​របស់​កែវ ឆាយា​ពី​ទីក្រុង​ម៉ូស្គូ

មូលហេតុ​នៃ​ការតាមដាន ដោយ​យកចិត្ត​ទុកដាក់​នេះ គឺមក​ពី ៖
ទី១ - ក្រោយ​ពីមាន​ការផ្ទុះ​នេះ​នៅ​ជប៉ុន ស្រាប់តែ​មាន​បន្លឺឡើង ជា​ការប្រៀបធៀប​ថា សូម្បី​តែ​ជប៉ុន​ដែល​ជា​ប្រទេស​ល្បី ខាង​បច្ចេកវិជ្ជា​ទំនើប ក៏​មិនអាចចៀស​ផុត​ពី​គ្រោះថ្នាក់​បែបនេះ ចុះ​ទំរាំ​រុស្ស៊ី​វិញ​ដែល​ធ្លាប់​បាន​សាងសង់​ស្ថានីយ​ប្រភេទ​នេះ ដោយ​ប្រើ​បច្ចេកវិជ្ជា​ចាស់ តើ សភាពការណ៍ នឹង​ទៅ​ជា​យ៉ាងណា​ទៅវិញ?

ទី២- ប៉ុន្តែ សំរាប់រុស្ស៊ីវិញ គឺ​មាន​មតិផ្ទុយ​ស្រឡះ​សោះ ដ្បិត​ការសាងសង់​ស្ថានីយ​អគ្គិសនី បរមាណូ គឺជា វិស័យ​ដែល​រុស្ស៊ី​អនុវត្ត បច្ចេកវិជ្ជា​ឈានមុខ​ពេញទី និង​ជា “ឆ្នាំងបាយ”មួយ​ដ៏​សំខាន់​នាំ​ចំណូល​ដល់​ថវិកា​ជាតិ ដូច​វិស័យ ២​ផ្សេង​ទៀត ពោល​គឺ វិស័យ​អវកាស និង​វិស័យ​លក់អាវុធ។

ទី៣- បើយុទ្ធនាការ​ខាងពុះពារ​ជំនះ លើ​មហន្តរាយ​នុយក្លេអ៊ែរ នៅជប៉ុន​ បំពាក់​ទៅដោយ ជោគជ័យ នោះរុស្ស៊ី នឹង​ទទួល​លទ្ធភាព សង់ តទៅទៀត ស្ថានីយ​អគ្គិសនី​បរមាណូ នៅតាម​ប្រទេសណា​ដែល​​​សម្រេច​ផ្អាកសិន ការសាងសង់​បែបនេះ ក្រោយ​ពីឃើញ​សោកនាដកម្ម​នោះ ឧទាហរណ៍ ចិន បាន​ផ្អាកសិន ការសាងសង់ ម៉ាស៊ីន​ប្រតិកម្ម ២​កន្លែងទៀត នៅស្ថានីយ តៃវ៉ាន់។

រុស្ស៊ី​ត្រូវ​សាងសង់ នៅតាម ១៥​ប្រទេស គឺ ម៉ាស៊ីន​ប្រតិកម្ម​នុយក្លេអ៊ែរ សរុប​ទៅ ៣៥ កន្លែង ពីក្នុងនោះ ចំនួន១៩ មានបញ្ជាក់​ទៅហើយ ដោយ​កិច្ចព្រមព្រៀង​អន្តរ​រដ្ឋាភិបាល។

ផលប្រយោជន៍​ក្នុង​ការសាងសាង់​នេះ គឺ​ខ្ទង់​ចំណេញ​មាន​អត្រា​ដល់​ទៅ ៥៣% ទោះបី សំរាប់​ផ្នែកធានា​សន្តិសុខ គឺត្រូវ​ចំណាយ​អស់៤០%ក្តី។

រុស្ស៊ី​ជាប្រទេស​សម្បូរ​ពិសោធន៍ ខាងសាងសាង់ ស្ថានីយអគ្គិសនី​បរមាណូ ៖ រោងចក្រ​ភ្លើងទី១ បែបនេះ​បាន​ត្រូវ​រុស្ស៊ី​ដាក់​ឲ្យដំណើរការ​ក្នុងប្រទេស តាំងពីក្នុងឆ្នាំ ១៩៥៤ម៉្លេះ។ នៅអង់គ្លេស គឺក្នុងឆ្នាំ ១៩៥៦។ នៅស.រ.អា. គឺក្នុងឆ្នាំ១៩៥៧។

ពីក្នុងចំណោម ម៉ាស៊ីនប្រតិករនុយក្លេអ៊ែរ ​៧៦ ដែលមានសង់បាននៅរុស្ស៊ី ក្នុង​អំឡុងពេល​ជាង កន្លះ​សតវត្សរ៍​កន្លងទៅ នៅ​ដំណើរការ​គឺ ចំនួន ៣២ ដែលសុទ្ធតែ​បំពាក់ទៅដោយ​បច្ចេកវិជ្ជា ឈានមុខ ធ្វើឲ្យរុស្ស៊ី ជាប់ចំណាត់ថ្នាក់ទី៤ ក្នុងបញ្ជី​នាំមុខ​ដោយស.រ.អា ដែលមាន១០៤ , បារាំង មាន៥៨ , ជប៉ុន មាន៥៥។ សរុបទៅក្នុងលោក មាន៤៤៣ ម៉ាស៊ីន​ប្រតិករ​បែបនេះ ។

រដ្ឋាភិបាល​រុស្ស៊ី មាន​គម្រោង​​សង់​ក្នុងប្រទេស ឲ្យ​បាន​ម៉ាស៊ីនប្រតិកម្ម​នុយក្លេអ៊ែរ ១២កន្លែងទៀត ទៅទល់ឆ្នាំ២០២០។ នៅរុស្ស៊ី អគ្គិសនី បានមកពីធាតុនុយក្លេអ៊ែរ គឺក្នុងអត្រា​តែ១៦%ប៉ុណ្ណោះ។ នាំមុខគេ​គឺបារាំង ដល់ទៅ ៧៥%  អាល្លឺម៉ង់ ៦០%៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ