រុស្ស៊ី-វេណេស៊ុយអេឡា

រុស្ស៊ី ទទួល”ភ្លើងខៀវ” ចូលទៅកាន់ អណ្តូងសម្បូណ៌ប្រេង នៅវ៉េណេស៊ុយអេឡា

លោកប្រធានាធិបតី វ៉េណេស៊ុយអេឡា  Hugo Chavez
លោកប្រធានាធិបតី វ៉េណេស៊ុយអេឡា Hugo Chavez RFI/Keo Chhaya

លទ្ធភាព​នេះ មាន​ចែង​ក្នុង​កិច្ច​ព្រមព្រៀង​ចុះ​នៅ​ក្រុង​ការ៉ាកាស ម្សិលមិញ​គឺ​កាល​ដែល​នៅ​សល់​​តែ៩​ថ្ងៃ​សោះ ដល់​ពេល​បោះឆ្នោត​ប្រធានាធិបតី​នៅ វេណេស៊ុយអេឡា ។ ឯកសារ​នេះ នឹង​ចូល​ជា​ធរមាន​លុះ​ក្រោយ​ពី​មាន​ការ​អនុម័ត​ដោយ​ប្រមុខរដ្ឋ​និង​រដ្ឋសភា​ប្រទេស​នេះ​សិន។ ចំណែក​ប្រធានាធិបតី​ឆ្វេង​និយម​សព្វ​ថ្ងៃ លោក Hugo Chavez ដែល​ស្និទ្ធ​នឹង​រុស្ស៊ី​តាម​ការ​ស្ទង់មតិ មាន​ភ័ព្វ​សំណាង គឺ​ត្រឹម​ស្មើ​និង​គូ​ប្រជែង​ស្តាំ​និយម​របស់​គាត់​ប៉ុណ្ណោះ។ 

ផ្សាយពាណិជ្ជកម្ម

 

កិច្ច​ព្រមព្រៀង ត្រូវ​បាន​ចុះ​ក្នុង​រដ្ឋធានី​វ៉េណេស៊ុយអេឡា រវាង​ក្រុមហ៊ុន​រដ្ឋ​រុស្ស៊ី​ខាង​ប្រេងកាត RosNeft​និង​សាជីវកម្ម​វេណេស៊ុយអេឡា Corporation Venecolana del Petroleoដើម្បី បង្កើត​​ឡើង​ជា​សហាគម​ចម្រុះ​ខាង​ជីក​យកប្រេង​នៅ​អណ្តូង​វេណេស៊ុយអេឡា Orinoko ដែល​មាន​កំណប់ ប្រេង​ដល់​ទៅ ៦.៥០០ លាន​តោន។ ក្នុង​សហាគម​ចម្រុះ​នេះ ភាគី​រុស្ស៊ី មាន​ហ៊ុន​៤០%។

ដើម្បី​ឲ្យ​ឯកសារ​នេះ ចូល​ជា​ធរមាន​ទៅ​កើត គឺ​តម្រូវ​ឲ្យ​មាន​ការ​អនុម័ត ពី​ខាង​ប្រធានាធិបតី និង​ពី​ខាង​រដ្ឋសភា វ៉េណេស៊ុយអេឡា សិន។ តាម​ពួក​អ្នក​វិភាគ កិច្ចព្រមព្រៀង​នេះ ត្រូវ​បាន​ចុះ គឺ​កាល​ដែល​នៅ​សល់​តែ​ជាង​មួយ​សប្តាហ៍ ដល់​ពេល​បោះឆ្នោត​ប្រធានាធិបតី​ក្នុង​ប្រទេស អាមេរិក​ឡាទីន​នោះ​ដែល​លទ្ធផល​វា​ពិបាក​ត្រូវ​គេ​ទស្សន៍ទាយ​ជា​មុន។

បើ​ឯកសារ​នេះ ចូល​ជា​ធរមាន នោះ​ក្រុមហ៊ុន​រុស្ស៊ី RosNeft នឹង​ទទួល​លទ្ធភាព​ចូល​ទៅ​កាន់​អណ្តូង​ដ៏​សែន​សម្បូណ៌​ប្រេង​នោះ។ ហើយ​ជា​ថ្នូរ ភាគី​រុស្ស៊ី​នឹង​ផ្តល់​ប្រាក់ ១.៥០០​លាន​ដុល្លារ ឲ្យ ដៃ​គូ​វេណេស៊ុយអេឡា ខ្ចី​ប្រើ​ប្រាស់ ព្រមទាំង​នឹង​បង់​ឲ្យ​នូវ​ប្រាក់​សគុណ​១.០០០​លាន​ដុល្លារ​ថែម​ទៀត។ លុយ​នេះ នឹង​ផ្ទេរ​ទៅ​ក្នុង​គណនី របស់​ភាគី​វ៉េណេស៊ុយអេឡា​មួយ​ចំណែក​ម្តងៗ ក្នុង​ទំហំ ពី​៣០០​លាន​ទៅ​៤០០​លាន​ដុល្លារ។

នេះ​ជា​កិច្ច​សន្យា​ដ៏​ធំ​បំផុត ចុះ​ដោយ​ក្រុមហ៊ុន​ប្រេងកាត​រុស្ស៊ី​នៅ​ទ្វីប​អាមេរិក​ខាង​ត្បូង ហើយ​ចុះ នេះ​សោត គឺ​នៅ​ពី​មុខ​វត្តមាន​នៃ​លោក​ប្រធានាធិបតី​វ៉េណេស៊ុយអេឡា Hugo Chavez ផ្ទាល់​ដែល​តាំង​ពី​គាត់​កាន់​អំណាច​ពី​ឆ្នាំ ១៩៩៩​មក​ក្នុង​ឋានៈ​​ជា​អ្នក​ដឹកនាំ​ឆ្វេង​និយម​រមែង​សត្រូវ​នឹង ស.រ.អា. ហើយ​មាន​ទំនោរ​ស្និទ្ធ​នឹង​រុស្ស៊ី។

ប៉ុន្តែ​សំណួរ​ដែល​ចោទ៖តើ​នរណា​ដែល​នឹង​កាន់​អំណាច​គ្រប់​គ្រង​ប្រទេស​វ៉េ​ណេ​ស៊ុយ​​អេឡា សម្រាប់​អំឡុង​ពេល ៦​ឆ្នាំ​ទៅ​មុខ? សំនួរ​នេះ​ចោទ​ឡើង គឺ​ក្រោយ​ពី​លទ្ធផល​នៃ​ការ​ស្ទាប​ស្ទង់ បង្ហាញ​ឲ្យ​ឃើញ​ថា លោក Hugo Chavez ក្នុង​ការ​បោះឆ្នោត​នៅ​ថ្ងៃ​៧​តុលា​ខាង​មុខ​គឺ​មាន ភ័ព្វសំណាង​ស្រដៀង​គ្នា​ទេ​តើ​នឹង​គូ​ប្រជែង​ស្តាំ​និយម​របស់​គាត់ លោក Enrike Capriles ដែល បស្ចិម​លោក​និយម​ពេញទី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI