បាតុកម្មខ្លាំងក្លាមិនធ្លាប់មាន ប្រឆាំងភាពមិនសុចរិត នៃការបោះឆ្នោតសភាកន្លងទៅ
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មប្រឆាំងនេះ បានប្រព្រឹត្តទៅតាំងពីរសៀលម្សិលមិញរហូត ដល់យប់ជ្រៅនៅតាមសង្កាត់កណ្តាលរដ្ឋធានីម៉ូស្គូ ដោយមានមនុស្សចូលរួមជិត ១ម៉ឺននាក់ គឺ ខ្លាំងក្លាមិន ធ្លាប់មាន ប៉ុន្តែតាមតួលេខអាជ្ញាធរវិញ គឺតែជាង២ពាន់នាក់ ពីក្នុងនោះជាង ៣០០នាក់ ត្រូវបាន ប៉ូលិសចាប់ខ្លួន។ ហើយថ្ងៃនេះ ចលនាយុវជនដែលគាំទ្រ បន្ទាត់នយោបាយវិមានក្រេមឡាំង ក្រោមឈ្មោះថា”ណាហ្ស៊ី” ឫ “ពួកយើង” កេណ្ឌគ្នីគ្នាខ្លួនដល់ទៅ ១ម៉ឺន៥ពាន់នាក់ បូកទាំងមកពីខេត្តផងធ្វើមីទ្ទិញសងវិញ។
មូលហេតុនៃបាតុកម្មប្រឆាំងនោះ គឺក្រោយពីគ.ជ.ប. បានប្រកាសលទ្ធផលថា ក្នុង ការបោះឆ្នោតកាលពី ថ្ងៃអាទិត្យម្សិលម៉្ងៃ គឺបក្សកាន់អំណាចឈ្មោះ “ប្រទេសរុស្ស៊ីរួមធ្លុងមួយ” ដែលដឹកនាំដោយ លោកប្រធានាធិបតីមេដវេដេវ និងលោកនាយករដ្ឋមន្ត្រីពូទីន ទទួលបានអាសនៈដល់ទៅ ជាងពាក់កណ្តាល ក្នុងសភាឌូម៉ានីតិកាលថ្មី។
តាមមតិពួកវាគ្មិនដែលឡើងថ្លែងក្នុងមីទ្ទិញប្រឆាំង បក្សកាន់អំណាច ទទួលបានអាសនៈ ច្រើន យ៉ាងនេះ គឺដោយសារ លួចសំឡេងគាំទ្ររបស់បក្សឯទៀត ក្នុងចំនួនមិនតិចជាង១៥លានសំឡេងឡើយធ្វើជារបស់ខ្លួន លុះទាល់តែឡើងដល់ ជិត៥០% ពីព្រោះតាមពិត បក្សនេះ អាចដណ្តើម បានសំឡេងគាំទ្រយ៉ាងច្រើនណាស់ត្រឹម២៥%ប៉ុណ្ណោះ។
ម៉្លោះហើយបានជា ពួកបាតុករ ដែលតំណាងឲ្យ ចលនាប្រឆាំងឈ្មោះ”សាមគ្គីភាព”, “សមាគមស៊ីវិលរុស្ស៊ី” , “សហភាពប្រជាមានិត-ប្រជាធិបតេយ្យ” បន្ទាប់ពីមីទ្ទិញ ពេលដើរដង្ហែក្បួនបាតុកម្មតាមដងវិថីប្លែកៗនៅសង្កាត់កណ្តាលក្រុងម៉ូស្គូបានជ្រោងលើកឡើងនូវផ្ទាំងបដា ចារដោយពាក្យបែបយ៉ាង ៖ “ការបោះឆ្នោតកន្លងទៅជាឈុតបោកប្រាស់ទាំងរស់”. “សូមបង្វែរ ការបោះឆ្នោតមែនពិត មកប្រទេសរុស្ស៊ីវិញ” , “ដើម្បីប្រទេសរុស្ស៊ីដែលលែងមាន បក្ស ឈ្មោះ “ប្រទេសរុស្ស៊ីរួមធ្លុងមួយ” , “លោកប្រធានគ.ជ.ប. ល្មមលាចេញពីតំណែងហើយ”។
ក្នុងក្បួនដង្ហែនោះ សំដៅទៅកាន់ទីស្តីការរបស់គ.ជ.ប. មានបាតុករចំនួន៣០០នាក់ ដែលអភ័ព្វត្រូវប៉ូលិសឃាត់ខ្លួន។ ពីក្នុងនោះ រហូតមកទល់ឥឡូវ នៅជាប់ក្នុងបកប៉ូលិសនៅឡើយ គឺ ជាង ២០នាក់រួមទាំងលោក Navalny និង លោក Yashin ដែលជាមេដឹកនាំចលនា ”សាមគ្គីភាព” ក្រោមបទចោទប្រកាន់ថា “មិនស្តាប់បង្គាប់អាជ្ញាធរ” ដែលត្រូវជាប់ឃុំឃាំងរហូត ដល់១៥ថ្ងៃ។
អ្វីដែលគួរឲ្យកត់សម្គាល់ គឺថាក្នុងរលកប្រឆាំងលើកនេះ ពួកបាតុករថែមទាំង បានស្រែកបន្លឺ ឡើងស្រុះៗគ្នានូវពាក្យថា” បដិវត្តន៍” ទៅផង។ ទាក់ទងនឹងរឿងនេះ លោក Navalny បានថ្លែង ទៅ BBC ថា ៖ “ មេបដិវត្តធំជាងគេនៅរុស្ស៊ី គឺពិតជារូបលោកពូទីន ពីព្រោះគាត់កំពុងធ្វើ រាល់អ្វីៗ សព្វបែបយ៉ាង ដើម្បីឲ្យមានបដិវត្តន៍ ផ្ទុះឡើង នៅរុស្ស៊ី”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ