កម្ពុជា​

គណបក្សសម រង្ស៊ី ស្នើ​សុំព្រះរាជ​លើក​លែង​ទោស​អោយ​ប្រធាន​របស់​ពួក​គេ

សមាជិកគណបក្ស សម រង្ស៊ី
សមាជិកគណបក្ស សម រង្ស៊ី Reuters

ក្រោយ​ពី​បាត់បង់​សមាជិកភាព​ពី​រដ្ឋសភា ក្រុម​អ្នក​តំណាងរាស្ត្រ​របស់​គណបក្ស​សម រង្ស៊ី​បាន​សរសេរ​លិខិត​ស្នើ​សុំ​អោយ​ព្រះមហាក្សត្រ អោយ​លើកលែង​ទោស​ដល់​លោក​ សម រង្ស៊ី ដែល​ត្រូវ​បាន​តុលាការ​កាត់ទោស​ក្នុង​សំណុំ​រឿង​ព្រំដែន​កម្ពុជា​-វៀតណាម។ គណបក្ស​សម រង្ស៊ី​ អត្ថាធិប្បាយ​ថា អវត្តមាន​របស់​ប្រធាន​របស់​ពួកគេ​នៅ​ក្នុង​ឆាក​នយោបាយ​កម្ពុជា នឹង​ធ្វើ​អោយ​ប៉ះពាល់​ដំណើរ​ការ​នៃ​លទ្ធិ​ប្រជាធិបតេយ្យ​នៅក្នុង​ប្រទេស​នេះ។

ផ្សាយពាណិជ្ជកម្ម

 

សេចក្តី​រាយការណ៍​របស់ លាង ដឺលុច ពីទីក្រុង​ភ្នំពេញ

អ្នកតំណាងរាស្ត្រ​២៤​រូប​របស់​គណបក្ស​សម រង្ស៊ី​បាន​ធ្វើ​លិខិត​រួមគ្នា​មួយ​ កាល​ពី​ថ្ងៃ​ទី​១៨​មីនា ស្នើ​សុំ​ព្រះរាជ​លើកលែង​ទោស​ពី​ព្រះមហាក្សត្រ អោយ​ប្រធាន​គណបក្ស​របស់​ពួកគេ គឺ​លោក​ សម រង្ស៊ី។ លោក​សម រង្ស៊ី​ដែល​ត្រូវ​បាន​រដ្ឋសភា​លុប​ឈ្មោះ​ចេញ​ពី​សមាជិកភាព​រដ្ឋសភា​កាល​ពី​ថ្ងៃ​ទី​១៥​មីនា បន្ទាប់​ពី​សាលដីកា​តុលាការ​កំពូល​ចូលជា​ធរមាន ហើយ​ដែល​ធ្វើ​អោយ​លោក​សម រង្ស៊ី​ក្លាយ​ជា​អ្នកទោស​ក្នុង​សំណុំរឿង​ព្រំដែន​កម្ពុជា​វៀតណាម។

            នៅក្នុង​លិខិត​ដែល​ត្រូវ​បាន​ផ្ញើ​ថ្វាយ​ព្រះមហាក្សត្រ ព្រះបាទ​ព្រះបរមនាថ នរោត្តម សីហមុនី និង​ចម្លង​ថ្វាយ​សម្តេចឪ​ នរោត្តម សីហនុ​ ដែរ​នោះ ក្រុម​អ្នកតំណាងរាស្ត្រ​គណបក្ស​សម រង្ស៊ី​បាន​សរសេរ​ថា លោក ​សម រង្ស៊ី​ ត្រូវ​បាន​តុលាការ​កាត់សេចក្តី​ដោយ​អយុត្តិធម៌ ហើយ​ថា​អវត្តមាន​របស់​លោក​ សម រង្ស៊ី ក្នុង​ការ​ដឹកនាំ​គណបក្ស​នយោបាយ​ធំ​ទី​២​នៅ​កម្ពុជា នឹង​ធ្វើ​អោយ​ប៉ះពាល់​ដល់​ការវិវឌ្ឍន៍​ទៅមុខ​នៃ​ប្រជាធិបតេយ្យ សេរី​ពហុបក្ស​នៅក្នុង​ប្រទេស​នេះ។

            ការ​ស្វែងរក​ព្រះរាជ​លើកលែង​ទោស​ពី​ព្រះមហាក្សត្រ​អោយ​ប្រធាន​របស់​ពួកគេ ក៏​ត្រូវ​បាន​ធ្វើ​ឡើង​ដោយ​សំអាង​លើ​មាត្រា​១៥​នៃ​លក្ខន្តិកៈ​តំណាងរាស្ត្រ​ផងដែរ។ មាត្រា​នេះ​ចែង​ថា តំណាងរាស្ត្រ​រូប​ណា​មួយ​ជា​ទណ្ឌិត ហើយ​ត្រូវ​បាន​ព្រះមហាក្សត្រ​លើកលែង​ទោស តំណាងរាស្ត្រ​រូប​នោះ​នឹង​បាន​ទទួល​សុពលភាព អភ័យ​ឯកសិទ្ធិ និង​បុព្វសិទ្ធិ​ឡើងវិញ។

            លោក​នាយក​រដ្ឋមន្ត្រី​ ហ៊ុន សែន ​ធ្លាប់​បាន​ប្រកាស​ជា​សាធារណៈ​ហើយ​ថា នៅក្នុង​ការ​បោះឆ្នោត​លើក​ក្រោយ​នេះ នឹង​មិនមាន​លោក​សម រង្ស៊ី​នោះ​ឡើយ។ ជា​សារ​មួយ​ដែល​គេអាច​យល់​បាន​រួច​ហើយ អំពី​លទ្ធផល​នៃ​ការ​ស្នើ​សុំ​ព្រះរាជ​លើកលែង​ទោស​នេះ នៅ​ពេល​ដែល ព្រះរាជ​លើកលែង​ទោស​របស់​ព្រះមហាក្សត្រ​ត្រូវ​ធ្វើ​តាម​រយៈការ​ស្នើ​សុំ​របស់​លោក​នាយក​រដ្ឋមន្ត្រី។ គណបក្ស​សម រង្ស៊ី​វិញ​នៅ​តែ​ចាត់​ទុក​ករណី​ក្តីក្តាំ​របស់​លោក សម រង្ស៊ី ថា​ជា​រឿង​នយោបាយ ដូច្នេះ​ពួកគេ​នៅ​រង់​ចាំ​ដំណោះ​ស្រាយ​បែប​នយោបាយ​មួយ។ តើ​នៅ​ពេល​ណា​​ទើប​មាន​ដំណោះស្រាយ​នោះ?

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI