កម្ពុជា

រដ្ឋាភិបាល​អះអាង​ពី​ការ​គាំទ្រ​របស់ អ.ស.ប ពេល​បក្ស​ប្រឆាំង​រក​អន្តរាគមន៍​ពី​អន្តរជាតិ​

លោក​នាយក​រដ្ឋមន្ត្រី​ហ៊ុន​សែន​ ឆ្លើយ​ឆ្លង​ជាមួយ​​លោក​អគ្គលេខាធិការ​អ.ស.ប.(ឆ្វេង)​ នៅ​ជំនួប​ប្រជុំ​អាស៊ាន​ ប្រទេស​ព្រុយណេ ថ្ងៃ​១០​តុលា​២០១៣។
លោក​នាយក​រដ្ឋមន្ត្រី​ហ៊ុន​សែន​ ឆ្លើយ​ឆ្លង​ជាមួយ​​លោក​អគ្គលេខាធិការ​អ.ស.ប.(ឆ្វេង)​ នៅ​ជំនួប​ប្រជុំ​អាស៊ាន​ ប្រទេស​ព្រុយណេ ថ្ងៃ​១០​តុលា​២០១៣។ © Reuters

មន្ត្រី​រដ្ឋាភិបាល​បាន​អះអាង​ថា លោក​នាយក​រដ្ឋមន្ត្រី ហ៊ុន សែន បាន​ទទួល​ការ​គាំទ្រ និង​សាទរ​ពី​លោក បាន គី​មូ​ន អគ្គលេខាធិការ​អង្គការ​សហប្រជាជាតិ​ ក្នុង​នាម​ជា​អ្នក​ឈ្នះឆ្នោត។ លោក ហ៊ុន សែន និង​លោក បាន គី​មូ​ន បាន​ជួប​ពិភាក្សា​គ្នា​នៅ​ក្រៅ​កិច្ច​ប្រជុំ​កំពូល​អាស៊ាន​នៅ​ប្រទេស​ព្រុយណេ។ ដំណឹង​នេះ​បាន​កើត​ឡើង​ ក្នុង​ពេល​ដែល​លោក​សម រង្ស៊ី មេ​ដឹកនាំ​បក្ស​ប្រឆាំង​កំពុង​បើក​យុទ្ធនាការ​ការទូត​ដើម្បី​ទាមទារ​ឲ្យ​សហគមន៍​អន្តរជាតិ​កុំ​ទទួល​ស្គាល់​រដ្ឋាភិបាល។

ផ្សាយពាណិជ្ជកម្ម

នៅពេល​វិលត្រឡប់​ពី​កិច្ចប្រជុំ​កំពូល​អាស៊ាន​វិញ ​កាលពី​យប់​ថ្ងៃ​ព្រហស្បតិ៍​ម្សិលមិញ លោក កៅ គឹមហួន រដ្ឋមន្ត្រី​ប្រតិភូ​អម​នាយករដ្ឋមន្ត្រី​ បាន​ប្រាប់​ក្រុមអ្នកកាសែត​ថា អគ្គលេខាធិការ​អង្គការសហប្រជាជាតិ លោក បាន គី​មូ​ន បាន​ថ្លែង​សាទរ​ចំពោះ​លោកនាយក​រដ្ឋមន្ត្រី ហ៊ុន សែន ក្នុងនាម​ជា​ប្រមុខ​រដ្ឋាភិបាល​នៃ​គណបក្ស​ឈ្នះឆ្នោត។ បើ​យោងតាម​លោក កៅ គឹមហួន លោក​បាន គី​មូ​ន ក៏បាន​ថ្លែង​សរសើរ​ផងដែរ​ពី​ការបោះឆ្នោត​នៅ​កម្ពុជា​ ដែល​បាន​ប្រព្រឹត្ត​ទៅដោយ​សន្តិភាព។

ជំនួប​រវាង​លោកនាយក​រដ្ឋមន្ត្រី ហ៊ុន សែន និង​លោក​បាន គី​មូ​ន បានធ្វើ​ឡើង​កាលពី​រសៀល​ថ្ងៃទី១០តុលា​ នៅឯ​ក្រៅ​កិច្ចប្រជុំ​កំពូល​អាស៊ាន ​នៅ​ប្រទេស​ព្រុយ​ណេ។ ជំនួប​នេះ​បានកើត​ឡើង​ស្រប​ពេលដែល​ប្រទេស​កម្ពុជា​កំពុង​ជួប​វិបត្តិ​នយោបាយ និង​វិបត្តិ​ថវិកា​នៅ​សាលាក្តី​ខ្មែរក្រហម។ យ៉ាងណាក៏ដោយ គ្មាន​សេចក្តីរាយការណ៍​ណា​បញ្ជាក់ថា ភាគី​ទាំង​ពីរបាន​ពិភាក្សា​អំពី​បញ្ហានយោបាយ​នៅ​កម្ពុជា​ទេ។

បើ​យោងតាម​លោក កៅ គឹម ហួន ដដែល ជំនួប​នេះ​បាន​ពិភាក្សា​អំពី​បេសកកម្ម​ទាហាន​មួក​ខៀវ​កម្ពុជា​ដើម្បី​រក្សា​សន្តិភាព និង​ដោះមីន​នៅក្រៅ​ប្រទេស​ និង​បញ្ហា​ថវិកា​សាលាក្តី​ខ្មែរក្រហម។ លោក​អគ្គលេខាធិការ​អង្គការសហប្រជាជាតិ​បាន​សុំ​ឲ្យ​កម្ពុជា​បញ្ជូន​កងទ័ព​មួក​ខៀវ​ជា​ស្ត្រី​ផងដែរ​ សម្រាប់​បេសកកម្ម​នៅក្រៅ​ប្រទេស។ ចំណែកឯ​បញ្ហា​ថវិកា​សាលាក្តី​ខ្មែរក្រហម​វិញ អង្គការសហប្រជាជាតិ​បាន​សុំ​ឲ្យ​រដ្ឋាភិបាល​ប្រើ​ថវិកាបដិភាគ​របស់​ខ្លួន ​សម្រាប់​ភាគី​ជាតិ​រហូតដល់​ចុងឆ្នាំ ២០១៣ នេះ។

យ៉ាងណាក៏ដោយ ការ​រំលេច​ព័ត៌មាន​ស្តីពី​ការ​សាទរ និង​គាំទ្រ​របស់​អគ្គលេខាធិកា​រ​អង្គការ​សហប្រជាជាតិ​នេះ​ បាន​កើតឡើង​ក្នុងខណៈដែល​គណបក្សប្រឆាំង​កំពុងបើក​យុទ្ធនាការ​ការទូត​នៅឯ​ក្រៅប្រទេស ​ដើម្បី​សុំ​កុំ​ឲ្យ​សហគមន៍​អន្តរជាតិ​ទទួលស្គាល់​រដ្ឋាភិបាល​ក្រុងភ្នំពេញ។ គណបក្ស​សង្គ្រោះ​ជាតិ​ដែល​នៅតែ​មិន​ព្រម​ចូល​អង្គុយ​ក្នុង​សភា បាន​ហៅ​រដ្ឋាភិបាល និង​រដ្ឋសភា​ឯក​បក្ស​របស់​គណបក្ស​ប្រជាជន​កម្ពុជា​ថា បានកើត​ឡើង​ដោយ​មិន​ស្របច្បាប់។

លោក សម រង្ស៊ី កំពុង​ស្ថិតនៅ​ទ្វីបអឺរ៉ុប និង​គ្រោង​ធ្វើដំណើរ​ទៅ​អាមេរិក​ទៀត​ ដើម្បី​ស្វែងរក​ការគាំទ្រ​ពី​សហគមន៍​អន្តរជាតិ​ឲ្យ​ជួយ​ដាក់​សម្ពាធ​ទៅលើ​រដ្ឋាភិបាល​របស់លោក​នាយករដ្ឋមន្ត្រី ហ៊ុន សែន។ ទោះជា​យ៉ាងណាក៏ដោយ រដ្ឋាភិបាល និង​រដ្ឋសភា​ដែលមាន​តែ​គណបក្ស​ប្រជាជន​ម្នាក់ឯង​នៅតែ​ដំណើរការ ​ដោយ​គ្មាន​ការជាប់គាំង​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI