កូរ៉េ

កូរ៉េខាងត្បូង​អំពាវនាវ​ឱ្យកូរ៉េ​ខាងជើង​ដកស្រង់​គំនិត​ពីកំណែ​ទម្រង់​នៅភូមា​

លោក​ប្រធានាធិបតីកូរ៉េ​ខាងត្បូង លី ម្យ៉ុងបាក់​
លោក​ប្រធានាធិបតីកូរ៉េ​ខាងត្បូង លី ម្យ៉ុងបាក់​ REUTERS/Petar Kujundzic

លោក​ប្រធានាធិបតី​កូរ៉េ​ខាង​ត្បូង​ លី​ ម្យ៉ុង​ បាក់​ ដែល​បាន​បំពេញ​ទស្សនកិច្ច​ជា​ប្រវត្តិសាស្ត្រ​ នៅ​ប្រទេស​ភូមា​ កាល​ពី​ខែ​ឩសភា​មុន​ នៅ​ថ្ងៃ​ពុធ​៦​មិថុនា​នេះ​បាន​អំពាវ​នាវ​កូរ៉េ​ខាង​ជើង​ឱ្យ​ដក​ស្រង់​គំនិត​ពី​កំណែ​ទម្រង់​នយោបាយ​ដែល​របប​សឹក​ភូមា​បាន​ធ្វើ​ជា​ច្រើន​ខែ​មក​ហើយ​ ដើម្បី​ធ្វើ​ឱ្យ​ប្រទេស​ជាតិ​ចេញ​ផុត​ពី​ភាព​ឯកា​។

ផ្សាយពាណិជ្ជកម្ម

នៅ​ក្នុង​សុន្ទរកថា​ថ្លែង​នៅ​ឱកាស​”​ ទិវា​នឹក​ចង​ចាំ​ “​ រំលឹក​ដល់​វិញ្ញាណ​ក្ខន្ធ​ទាហាន​កូរ៉េ​ខាង​ត្បូង​ពលិជីវិត​ នៅ​ក្នុង​សង្គ្រាម​កូរ៉េ​(ពីឆ្នាំ១៩៥០​ដល់១៩៥៣)​ លោក​ លី​ ម្យ៉ុង​ បាក់​បាន​អះអាង​ជាថ្មី​ចេតនា​របស់​ខ្លួន​ចង់​ពង្រឹង​ទំនាក់ទំនង​នៃ​ប្រទេស​ខ្លួន​ជាមួយ​ភូមា​ដែល​កំណែ​ទម្រង់​ប្រកប​ដោយ​លក្ខណៈ​ប្រជាធិបតេយ្យ​ “​ពុំអាច​វិលត្រឡប់​ថយក្រោយ​វិញ​បានឡើយ”។

 
លោក លី​ ម្យ៉ុង​ បាក់​ បាន​ថ្លែងថា​ “​ខ្ញុំបាន​សុំឲ្យ​លោក​ប្រធានាធិបតី​ ថេន​សេន​ បញ្ជូន​បន្ត​ទៅឲ្យ​កូរ៉េ​ខាងជើង​ដែល​ជិតដិត​នឹង​ប្រទេស​គាត់​នូវ​សារ​នៃ​ប្រទេស​ភូមា​ដែលបាន​បើក​”សករាជ​ថ្មី​មួយ”​សម្រាប់​ប្រជាជន​ខ្លួន។

លោក​ លី​ ម្យ៉ុង​ បាក់​បាន​សង្កត់​ធ្ងន់ថា​ “ភូមា​ទោះបី​ជា​មាន​ធនធាន​ធម្មជាតិ​ដ៏​សំខាន់​និង​​ដែនដី​ដ៏​ធំ​ទូលាយ​ក្តី​ ​ មាន​ផលទុន​គិតតាម​បណ្តាជន​ម្នាក់ៗ​តែ​៧០០​ដុល្លារ​(ប្រមាណជា​៥៦០អឺរ៉ូ​)​ ប៉ុណ្ណោះ​ជិតដូច​​កូរ៉េ​ខាងជើង​ដោយហេតុ​សេដ្ឋកិច្ច​សង្គមនិយម​បិទជិត​របស់​ខ្លួន​និង​កាលមុន​ឋិត​នៅឯកា​លើ​ឆាក​អន្តរជាតិ”។

សហគមន៍​អន្តរជាតិ​ព្រួយ​បារម្ភ​ក្នុង​ប៉ុន្មានឆ្នាំ​ចុងក្រោយនេះ​អំពី​ទំនាក់​ទំនង​រវាង​ណៃពីដោ​និង​ព្យុងយ៉ាង​ជាពិសេស​ស្តីពី​លទ្ធភាព​អាចមាន​កម្មវិធី​នុយក្លេអ៊ែរ។

ប៉ុន្តែ​របប​ភូមាថ្មី​បាន​ប៉ុនប៉ង​ធ្វើឲ្យ​ប្រទេស​លោកខាងលិច​កក់ក្តៅ​ក្នុងចិត្ត​ដោយ​នៅខែ​វិច្ឆិកា​ឆ្នាំទៅ​អ្នកទទួល​ខុសត្រូវ​ជាន់ខ្ពស់​អាមេរិកាំង​ម្នាក់​បាន​បញ្ជាក់​ប្រាប់​ថា​ សរអា​ពុំបាន​ឃើញ​មាន​សញ្ញា​អ្វីមួយ​នៃ​កម្មវិធី​នុយក្លេអ៊ែរ​ជា​ដុំកំភួន​នៅ​ភូមាទេ។

ទស្សនកិច្ច​របស់​លោក​ លី​ ម្យ៉ុង​ បាក់​នៅភូមា​កាលពី​ពាក់​កណ្តាល​ខែ​ឧសភាមុន​គឺជា​ទស្សនកិច្ច​លើកទី១​របស់​​ប្រមុខរដ្ឋ​កូរ៉េ​ខាងត្បូង​មួយរូប​ចាប់តាំង​ពីមាន​អំពើ​ភេរវកម្ម​ខកខាន​ពុំបាន​សម្រេច​នៅក្នុង​ប្រទេសនេះ​នៅឆ្នាំ​១៩៨៣​ធ្វើ​ទៅលើ​រូបលោក​ប្រធានាធិបតី​ជំនាន់​នោះ​ឈុន​ដូវ៉ាន់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI