អានតួអត្ថបទ
APEC

ចិន​និង​អាមេរិក​ប្រជែង​គ្នា​​​ក្នុង​វេទិកា​សេដ្ឋកិច្ច​អាស៊ី​ប៉ាស៊ីហ្វិក

លោក បារ៉ាក់ អូបាម៉ា ថ្លែង​សុន្ទរកថា ក្នុង​វេទិកា​សេដ្ឋកិច្ច​អាស៊ី​ប៉ាស៊ីហ្វិក នៅ​ប្រទេស​ជប៉ុន
លោក បារ៉ាក់ អូបាម៉ា ថ្លែង​សុន្ទរកថា ក្នុង​វេទិកា​សេដ្ឋកិច្ច​អាស៊ី​ប៉ាស៊ីហ្វិក នៅ​ប្រទេស​ជប៉ុន © Reuters
ដោយ៖ អៀង សុខម៉ិញ
1 នាទី

ពី​ថ្ងៃ​សៅរ៍​ទី ១៣ វិច្ឆិកា​នេះ ​ដល់​ថ្ងៃអាទិត្យ​​ស្អែក មាន​រៀប​ចំ​​វេទិកាសេដ្ឋកិច្ច​អាស៊ី​ប៉ាស៊ីហ្វិក ហៅ​កាត់​ថា APEC នៅ​ទីក្រុង​Yokohama ប្រទេស​ជប៉ុន។ ជំនួបនេះ​​គ្រប​ដណ្តប់​​ទៅ​ដោយ​ប្រធានបទ​ពីរ​សំខាន់ៗ គឺ​ជម្លោះ​​ការទូត​រ៉ាំ​រ៉ែ​ រវាង​ជប៉ុន​ជាមួយ​ប្រទេស​ជិតខាង និង​ ពិសេស​សំណុំ​រឿងសេដ្ឋកិច្ច​។ ប្រមុខ​រដ្ឋ​និង​រដ្ឋាភិបាល​ទាំង​២១​ប្រទេស​ នឹង​​ពិភាក្សា​អំពី​បញ្ហា​រូបិយវត្ថុ​ បន្ត​ពី​ជំនួប​កំពូល​G20 នៅ​ទីក្រុង​សេអ៊ូល និង​ការ​បង្កើត​តំបន់​ផ្តោះ​ប្តូរ​ពាណិជ្ជកម្មដោយ​​សេរី​ ក្រោម​ការ​ប្រកួត​ប្រជែង​គ្នា​រវាង​​ចិន​និង​សហរដ្ឋ​អាមេរិក។

ផ្សាយពាណិជ្ជកម្ម

សេចក្តី​រាយការណ៍​របស់ អៀង សុខម៉ិញ

ដូច​​​ក្នុង​ជំនួប​G20 នៅ​ទីក្រុង​សេអ៊ូលដែរ លោក ប្រធានាធិបតី​​អាមេរិក​ ​បារ៉ាក់​ អូបាម៉ា ដែល​កំពុង​​មានមុខ​នៅ​​​​វេទិកាសេដ្ឋកិច្ច​​អាស៊ីប៉ាស៊ីហ្វិក នាទីក្រុង​កំពង់​ផែ យ៉ូកូហាម៉ា ប្រទេស​ជប៉ុន ​ជាមួយ​នឹង​សមភាគី​ចិន រុស្ស៊ី និង​ប្រមុខ​រដ្ឋ​-រដ្ឋាភិបាល សរុប​ទាំង​អស់​២១​ប្រទេស​ បាន​ប្រកាស​​ការពារ​ជាថ្មី​​ នយោបាយ​ផ្តល់​កំណើន​សេដ្ឋកិច្ច ​ដោយ​ធ្វើ​ឲ្យ​ប្រាក់​ដុល្លារ​មាន​តម្លៃ​ថោក។

ជាង​នេះ​ទៅ​ទៀត លោក អូបាម៉ា ​បាន​ប្រកាស​ពី​ចេតនា​របស់​អាមេរិក​ ចង់​លូក​ដៃ​​ចូល​កាន់តែ​ជ្រៅ ទៅ​ក្នុង​តំបន់​អាស៊ី​ប៉ាស៊ីហ្វិក តាម​រយៈ​ការ​បង្កើត​ឲ្យ​មាន​តំបន់​ផ្តោះ​ប្តូរ​ដោយសេរី កាន់​តែ​ធំ​ទូលាយ ដល់​ត្រើយ​ម្ខាង​ទៀត​នៃ​ "មហា​សមុទ្ទ​ប៉ាស៊ីហ្វិក”។ តំបន់ផ្តោះ​ប្តូរ​ដោយ​សេរី​ ​អាស៊ី​-ប៉ាស៊ីហ្វិក​ដ៏​ធំ​ទូលាយ​នេះ នឹង​ត្រូវ​កំណត់​ឲ្យ​កាន់​តែ​ច្បាស់​​ នា​ឱកាស​ជំនួប​កំពូល​APEC ​នៅ​ឆ្នាំ​២០១១ ដែលមាន​​អាមេរិក​ជា​ម្ចាស់​ផ្ទះ។

សំណើ​របស់​សហរដ្ឋ​អាមេរិក​នេះ​ វា​ផ្ទុយ​ស្រឡះ​ពី​ការ​ផ្តួច​ផ្តើម​​របស់​ចិន ដែល​ចង់​បង្កើត​តំបន់​ផ្តោះ​ប្តូរ​​ពាណិជ្ជកម្ម​ដោយ​​សេរី​ សម្រាប់​តែ​​ “តំបន់​អាស៊ី​” មួយ​ដាច់​មុខ ព្រោះ​ក្រុង​ប៉េកាំង​​ធុញ​​​ទ្រាន់​​នឹង​គំនាប​របស់​សហរដ្ឋ​​អាមេរិក​កាន់​តែ​ខ្លាំង​ឡើងៗ និង​យល់​ថា​នយោបាយ​រូបិយវត្ថុ​អាមេរិក​បច្ចុប្បន្ន​នេះ​ ជា​គ្រោះ​ថ្នាក់​មួយ​សម្រាប់​តំបន់​អាស៊ី។

សម្ពាធ​ភូមិសាស្ត្រ​នយោបាយ​ ​ក៏​ជា​ប្រធាន​រឿង​សំខាន់​មួយ​​ក្នុង​របៀបវារៈ​នៃ​​វេទិកា​APECនេះ​ដែរ។ ជាអាទិ៍​​វិបត្តិ​ជប៉ុន​-រុស្ស៊ី ក្នុង​សំណុំ​រឿង​ប្រជុំ​កោះ​គួរីល ដែល​បាន​ផ្ទុះ​ឡើង​ជា​ថ្មី ដោយ​ជប៉ុន​មិន​ពេញ​ចិត្ត​នឹង​ដំណើរ​ទស្សនកិច្ច​របស់​​ប្រធានាធិបតី​រុស្ស៊ី​មេដវេដេវ​ នៅ​លើ​ប្រជុំកោះ​គួរីល​ កាលពី​ពេល​ថ្មីៗ​នេះ។ ដើម្បី​បន្ធូរ​បន្ថយ​សម្ពាធ​ការទូត​រវាង​គ្នា ប្រមុខ​រដ្ឋរុស្ស៊ី  និង​ប្រមុខ​រដ្ឋាភិបាលជប៉ុន ​បាន​​​ជួប​ពិភាក្សា​គ្នា​ ស្តីពី​បញ្ហា​នេះ នៅ​ក្រៅ​ក្រប​ខ័ណ្ឌ​ APEC។ ចំពោះ​វិបត្តិការទូត ចិន-ជប៉ុន​វិញ ជំនួប​ទេ្វ​ភាគី រវាង​នាយក​រដ្ឋមន្ត្រី​ជប៉ុន ណាអូតូ កាន់ និង​ប្រធានាធិបតី​ចិន ហ៊ូជិនតាវ ​ក៏​នឹង​ត្រូវ​រៀប​ចំ​ធ្វើ ក្រៅ​ក្រប​ខ័ណ្ឌAPEC ដែរ នៅ​ល្ងាច​ថ្ងៃ​សៅរ៍​​នេះ។ នេះ​បើ​​​យោង​តាម​អ្នក​នាំ​ពាក្យ​ក្រសួង​ការបរទេសជប៉ុន៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ