ក្រុមប្រឹក្សាជាតិស៊ីរីគ្មានជំនឿលើបេសកកម្មរបស់សម្ព័ន្ធអារ៉ាប់
ចុះផ្សាយនៅថ្ងៃ៖
ក្រុមអ្នកសង្កេតការណ៍នៃសម្ព័ន្ធអារ៉ាប់គ្រោងនឹងទៅដល់ទីក្រុងដាម៉ាស់នាយប់ថ្ងៃច័ន្ទ ទី២៦ ធ្នូនេះ ដើម្បីបំពេញបេសកកម្មសង្កេតការណ៍អំពីស្ថានការណ៍ជាក់ស្តែងនៅក្នុងប្រទេសស៊ីរី។ ប៉ុន្តែនៅប៉ុន្មានម៉ោងមុនការទៅដល់របស់ក្រុមអ្នកសង្កេតការណ៍នៃសម្ព័ន្ធអារ៉ាប់ កងកម្លំាងរបស់រដ្ឋាភិបាលស៊ីរីបានបើកការវាយប្រហារដណ្តើមកាន់កាប់តំបន់ Barba Amro ក្នុងទីក្រុង Homs ដោយបានផ្តាច់ជីវិតមនុស្សយ៉ាងតិច ១៥នាក់។ ទីក្រុង Homs ដែលបច្ចុប្បន្នកំពុងកាន់កាប់ដោយក្រុមអ្នកប្រឆំាងនឹងរដ្ឋាភិបាលស៊ីរី។
ក្រុមអ្នកសង្កេតការណ៍នៃសម្ព័ន្ធអារ៉ាប់លើកទីមួយមានគ្នាប្រមាណជា ៥០នាក់ ដែលមានជំនាញខុសគ្នា រួមមានផ្នែកស៊ីវិល នយោបាយ យោធា និងសិទ្ធិមនុស្ស។ បេសកកម្មរបស់ក្រុមអ្នកជំនាញអារ៉ាប់នេះបានធ្វើឡើង នៅក្នុងក្របខ័ណ្ឌនៃកិច្ចព្រមព្រៀងបិទបញ្ចប់វិបត្តិស៊ីរីដែលទើបបានចុះហត្ថលេខារវាងទីក្រុងដាម៉ាស់ និងសម្ព័ន្ធអារ៉ាប់។ វិបត្តិនៅស៊ីរីដែលបានបណ្តាលឲ្យស្លាប់មនុស្សរាប់ពាន់នាក់គិតតំាងពីពាក់កណ្តាលខែមីនាមក។
អ្វីជាការកត់សម្គាល់ នៅប៉ុន្មានម៉ោងមុនការទៅដល់របស់ក្រុមអ្នកសង្កេតការណ៍នៃសម្ព័ន្ធអារ៉ាប់ កងកម្លំាងរបស់រដ្ឋាភិបាលស៊ីរីបានបើកយុទ្ធនាការវាយប្រហារដណ្តើមកាន់កាប់តំបន់ Barba Amro ក្នុងទីក្រុង Homs ដែលជាជង្រុករបស់ក្រុមអ្នកប្រឆំាងរដ្ឋាភិបាល។ អ៊ីចឹងហើយបានជាក្នុងខណៈនេះ អង្គការឃ្លំាមើលសិទ្ធិមនុស្សនៅស៊ីរីដែលមានទីស្នាក់ការក្នុងទីក្រុងឡុងដ៍ និងក្រុមប្រឹក្សាជាតិស៊ីរីបានអំពាវនាវឲ្យក្រុមអ្នកសង្កេតការណ៍នៃសម្ព័ន្ធអារ៉ាប់ធ្វើដំណើរទៅកាន់តំបន់ Barba Amro ជាបន្ទាន់ ដើម្បីធ្វើជាសាក្សីដែលបញ្ជាក់ពីបទឧក្រិដ្ឋរបស់ទីក្រុងដាម៉ាស់ និងក៏ដើម្បីដាក់សម្ពាធលើទីក្រុងដាម៉ាស់ឲ្យបញ្ឈប់ការវាយប្រហារលើជនស៊ីវិលស្លូតត្រង់។
គួររម្លឹកជូនថា ផែនការបិទបញ្ចប់វិបត្តិនៅស៊ីរីដែលចុះហត្ថលេខាដោយទីក្រុងដាម៉ាស់ និងសម្ព័ន្ធអារ៉ាប់ បានចែងពីគម្រោងបិទបញ្ចប់អំពើហិង្សា ការដោះលែងអ្នកទោស ការដកកម្លំាងទ័ពរដ្ឋាភិបាលចេញពីទីក្រុងមួយចំនួន និងការធ្វើចរាចរណ៍ដោយសេរីនៅទូទំាងប្រទេសស៊ីរីរបស់ក្រុមអ្នកសង្កេតការណ៍នៃសម្ព័ន្ធអារ៉ាប់។ តែយ៉ាងណាក៏ដោយ ក្រុមប្រឹក្សាជាតិស៊ីរី និងអង្គការឃ្លំាមើលសិទ្ធិមនុស្សនៅស៊ីរីហាក់ដូចជាមានជំនឿតិចតួច ឬក៏ថាគ្មានជំនឿបន្តិចណាសោះលើឆន្ទៈរបស់ទីក្រុងដាម៉ាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ