ចិន

មនុស្ស​ស្លាប់​១០​នាក់​នៅ​ប៉េកាំង​នៅ​ចុង​សប្តាហ៍​នេះ​ដោយ​ព្យុះ​ភ្លៀង​

ស្ត្រី​ម្នាក់​​កំពុង​​ដើរ​កាត់​​ទី​អគារ​បាក់​បែក​​​និងរថយន្តតាក់ស៊ីដែលត្រូវ​អន្តរាយដោយទឹកជំនន់ក្រោយពីភ្លៀង​បានធ្លាក់យ៉ាងខ្លាំងនៅMentougou ក្នុងទីក្រុងប៉េកាំងថ្ងៃ២២កក្កដា២០១២
ស្ត្រី​ម្នាក់​​កំពុង​​ដើរ​កាត់​​ទី​អគារ​បាក់​បែក​​​និងរថយន្តតាក់ស៊ីដែលត្រូវ​អន្តរាយដោយទឹកជំនន់ក្រោយពីភ្លៀង​បានធ្លាក់យ៉ាងខ្លាំងនៅMentougou ក្នុងទីក្រុងប៉េកាំងថ្ងៃ២២កក្កដា២០១២ REUTERS/Stringer

ទីក្រុង​​​ប៉េកាំង​​ បាន​​រង​​គ្រោះ​​ធម្មជាតិ​​ដ៏​​ខ្លាំង​ក្លា​​បំផុត​​ពុំ​ធ្លាប់​​មា​​នឡើយ​​នៅ​​អំ​ឡុង​​៦១​​ឆ្នាំ​​ចុង​​ក្រោយ​​នេះ​​ដោយព្យុះភ្លៀង​​បាន​​​​ធ្លាក់​​យ៉ាង​​​ខ្លាំង​ឥត​​ឈប់ឈរ​​នៅ​​ថ្ងៃ​សៅរ៍​​ម្សិលមិញ​​។គ្រោះថ្នាក់ធម្មជាតិនេះ​ បាន​​បណ្តាល​​​ឲ្យ​​មនុស្ស​ស្លាប់​យ៉ាង​តិច​១០​នាក់​និង​​រថយន្ត​​មួយ​​ចំនួន​​ធំ​​ត្រូវ​​លិច​​​ក្នុង​ទឹក​។​​ ប្រជាជន​ប្រមាណ​ជា​៣​ម៉ឺន​នាក់​​​ បាន​​ជម្លៀស​​ចេញ​​ពី​​ទីក្រុង​ប៉េកាំង -នេះ​​បើ​យោង​តាម​ការ​អះអាង​​របស់​​ទីភ្នាក់ងារព័ត៌មាន​​​ចិន​ Xinhua​ ​នៅ​​ថ្ងៃ​​អាទិត្យ​​នេះ ​ដែល​​បាន​​បញ្ជាក់​​​​ទៀត​​ថា” ភាគ​​​​ឥសាន​និង​​​ភាគ​​​និរតី​​នៃ​​ប្រទេស​​ក៏​​ត្រូវ​​ទទួល​​រង​​គ្រោះ​​ដោយ​​ព្យុះភ្លៀង​​នៅ​ថ្ងៃ​​នេះ​​និង​​នៅ​​ថ្ងៃ​​ចន្ទ​​ស្អែក។

ផ្សាយពាណិជ្ជកម្ម

នៅ​យប់​ថ្ងៃ​សៅរ៍២១កក្កដា​ម្សិលមិញ ដើម​ឈើ​ធំៗ​ជា​ច្រើន​នៅ​ទីក្រុង​ប៉េកាំង​ បាន​បាក់​ដួល​រលំ​​ ​​រំលើងឬស​គល់គ្មានសល់​​ ដោយសារព្យុះភ្លៀង ​​បានបោកបក់​​វាយ​លុក​​យ៉ាងខ្លាំងក្លា​​ឥត​ត្រា​ប្រណី​ពេញមួយថ្ងៃ។​ នៅ​ប៉ែក​ខាង​កើត​នៃ​រដ្ឋធានី​ចិន​វិញ នៅស្រុក Tongzhou ជន​ពីរ​នាក់ បាន​ស្លាប់​ដោយត្រូវ​​ដំបូល​ផ្ទះ​ ​ធ្លាក់​សង្កត់។ ជន​​ទី​៣ បាន​បាត់​បង់​ជីវិត ​ដោយ​រន្ទះ​បាញ់ រីឯ​អ្នក​ទី​៤វិញ​​ដែល​ជា​ស្ត្រី​ភេទ បាន​ស្លាប់​ដោយ​ឆក់​ខ្សែ​ភ្លើង​ដែល​ធ្លាក់រាយ​ប៉ាយនៅ​លើ​​ដី-នេះ​ជា​ការ​រៀបរាប់​របស់​ទីភ្នាក់ងារព័ត៌មានផ្លូវការចិន Xunhua។

ចំណែក កាសែត​ Beijing News ​វិញ បានបញ្ជាក់​ប្រាប់ថា “នៅជិតកណ្តាលទីក្រុងប៉េកាំង​បុរស​​ម្នាក់​ត្រូវ​ស្លាប់​ដោយ​ជាប់​កុន​ក្នុង​រថយន្ត​របស់ខ្លួន​ដែល​ទឹកហូរ​ចូល​ពេញ”។

នៅ​ថ្ងៃ​អាទិត្យ​នេះ រដ្ឋាភិបាល​ចិន បាន​រំលឹក​ប្រាប់​ប្រជាជន​ខ្លួន​​ជា​មុន​ថា នឹង​មាន​ព្យុះភ្លៀង​​ផ្សេង​​ទៀត នៅ​ភាគ​ឥសាន្ត​ប្រទេស​នៅ​អំឡុង​២៤​ម៉ោង​ខាង​មុខ​នេះ។ ការ​ព្រមាន​ខាង​លើ​នេះ ​ត្រូវ​ធ្វើ​ឡើង​ដែរ​នៅតាមក្រុង​ជាប់មាត់​សមុទ្រ Tianjin  ​ប៉ែក​ខាង​កើត​ទីក្រុង​ប៉េកាំង​,នៅ​តំបន់​ Mongoli ​ខាង​ក្នុង​ នៅប៉ែក​ខាងជើង​ នៅខេត្ត​ Sichuan និង Yunnan នៅ​ប៉ែក​និរតី​​​ ក៏​ព្រម​​ទាំង​នៅ​​​ខេត្ត Guangdong និង​Hainan​ ប៉ែក​អគ្នេយ៍នៃប្រទេសចិន។

នៅ​​រដូវ​ក្តៅម្តងៗព្យុះភ្លៀងរដូវ ​បាន​បង្កជា​គ្រោះ​ទឹក​ជំនន់គួរឲ្យព្រួយបារម្ភ​និងបាន​បណ្តាល​​​​ឲ្យ​មនុស្ស​ស្លាប់រាប់​សិប​នាក់​នៅ​​ប្រទេស​ចិន។ ទោះ​ជា​យ៉ាង​ណា​ក្តី ភ្លៀង​ធ្លាក់​​យ៉ាង​​ខ្លាំង​​​​ដែល​បាន​​​​​​​​វាយប្រហារ​នៅ​ទីក្រុង​ប៉េកាំងបច្ចុប្បន្ននេះ កម្រ​សូវ​មាន​ណាស់។

នៅ​ឯ​ព្រលាន​យន្តហោះ​ទីក្រុង​ប៉េកាំង​វិញ ជើង​ហោះ​ហើរ​ក្នុង​ប្រទស​ចំនួន​២២៩ ​និង​ជើង​ហោះ​ហើរ​​ក្រៅ​ប្រទេសចំនួន​១៤ ត្រូវ​ លុប​ចោល-នេះ​ជាការជូនដំណឹង​របស់​អាជ្ញាធរ​នៅ​ព្រលាន​យន្តហោះ។ យោងតាម Beijing ​News វិញ ​ អ្នកដំណើរ ប្រមាណជា​៨ម៉ឺននាក់​ ត្រូវ​ជាប់​កុន​នៅព្រលាន​យន្ត​ហោះ​​​​ កាលពី​ម្សិលមិញ។

ចំណែកប្រជាជន​ចំនួន​ ១ម៉ឺន​៤​៥​០០​នាក់​ដែលរស់នៅ​ក្នុងសង្កាត់​ផ្សេងៗ​​នៃទីក្រុងប៉េកាំង ត្រូវ​បានជម្លៀសចេញដែរ-នេះជាការជូនដំណឹង​របស់ទីភ្នាក់ងារព័ត៌មានចិន  Xinhua៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI