ថៃ

ទឹកជន់​លិច​ក្រុង​បាងកកក​ភាគ​ខាង​ជើង

សកម្មភាព​​ប្រជាជនភៀស​ខ្លួន​​ ពីទឹក​ជំនន់ នៅ​ជាយ​ក្រុង​បាងកក
សកម្មភាព​​ប្រជាជនភៀស​ខ្លួន​​ ពីទឹក​ជំនន់ នៅ​ជាយ​ក្រុង​បាងកក © Reuters

ដោយ​​​មិនប្រាកដ​ថា​ ​ អាច​ទប់​​​ឈ្នះ​កម្លាំង​ទឹក​ជំនន់​ និង​ការពារ​រាជធានី​ទាំង​មូលពី​គ្រោះ​មហន្តរាយ​បាន​ នៅ​ថ្ងៃ​ព្រហស្បតិ៍​ម្សិលមិញ រដ្ឋាភិបាល​ថៃ​បានបញ្ហា​ឲ្យ​បើ​ក​​ទ្វារ​​ទំនប់​ទឹក​ទាំង​ ២០០ ដើម្បី​​បង្ហូរ​ទឹក​ទៅ​សមុទ្ទ​បាន​លឿន ប៉ុន្តែ​ធ្វើ​របៀប​នេះ សង្កាត់​ខ្លះ​អាច​នឹង​ត្រូវ​លិច​លង់​។ ​​ប្រជាជន​រស់​នៅ​ក្នុង​សង្កាត់​ភាគ​ខាង​ជើង​ក្រុង​បាងកក​ បាន​ទទួល​សេចក្តី​ណែនាំ​ឲ្យ​ជញ្ជូន​ទ្រព្យ​សម្បត្តិ​ដាក់​ទីទួល​សុវត្ថិភាព និង​​​ត្រូវ​បាន​ជម្លៀស​ចេញ​ជា​បន្ទាន់ ដោយ​រថយន្ត​យោធា។​ ប៉ុន្តែ​ចំណាត់​ការ​​នេះ បាន​ទទួល​រង​ការ​រិះគន់​យ៉ាង​ខ្លាំង ពី​សំណាក់​ប្រជាពលរដ្ឋ។

ផ្សាយពាណិជ្ជកម្ម

 

ជា​ច្រើន​សប្តាហ៍​មក​ហើយ ដែល​អ្នក​ជំនាញ​ បាន​ផ្តល់​អនុសាសន៍​ដល់​រដ្ឋាភិបាល​ថៃ ឲ្យ​បើក​ទ្វារ​​ទំនប់​ទឹក​ ដើម្បី​កុំ​ឲ្យ​សម្ពាធ​​ និង​កម្ពស់​ទឹក​ឡើង​ខ្លាំង​ ​បុកទៅ​​លើ​ទំនប់​ការពារ​ក្រុង​បាងកក​ពេក។ ប៉ុន្តែ​លោកស្រី​​នាយករដ្ឋមន្ត្រី​ យីងឡាក់ រារែក មិន​ព្រម​សម្រេច​ចិត្ត​ភ្លាមៗ​ទេ។ បទ​បញ្ជា​ឲ្យ​បើក​បង្ហូរ​ទឹក​រាប់​ពាន់​ម៉ឺន​ម៉ែត្រ​គូប តាម​​ទន្លេ​ចៅប្រាយ៉ា និង​ប្រឡាយជីក​​​កាត់​ក្រុង​ ទើប​តែត្រូវ​អនុម័ត​ ​​នៅ​ថ្ងៃ​​ព្រហស្បតិ៍​ម្សិលមិញ​ប៉ុណ្ណោះ។

ជា​ហេតុ​ធ្វើ​ឲ្យ​ប្រជាជន​ថៃ​ជិត​៩០% បាត់​បង់​ទំនុក​លើ​រដ្ឋាភិបាល របស់​លោកស្រី ក្នុង​ការ​ចាត់​ចែង​ដំណោះស្រាយ​ប្រឈម​នឹង​គ្រោះ​ទឹក​ជំនន់​នេះ។ ប៉ុន្តែ​អ្នក​នាំពាក្យ​មជ្ឈមណ្ឌល​សង្គ្រោះ ចាត់​ទុក​ការ​រិះគន់​របស់​ពលរដ្ឋថា​ ធ្វើ​ឡើង​ដោយ​គ្មាន​ឈរ​លើ​​​មូលដ្ឋាន​ច្បាស់​លាស់។ តាម​ការពិត បើតាម​អ្នក​នាំ​ពាក្យ​រូប​នេះ “លោកស្រី​ យីងឡាក់ មាន​សមត្ថភាព និង​​យល់​ដឹង​គ្រប់​គ្រាន់ អំពី​មធ្យោបាយ​ទប់​ទល់​នឹង​ទឹក​ជំនន់​ដ៏​ធ្ងន់ធ្ងរ​ប្រចាំ​កន្លះ​សតវត្សនេះ និង​ធ្វើ​សេចក្តី​​សម្រេច​ចិត្ត​ទៅ​តាម​ស្ថានភាព​ជាក់ស្តែង​ ពី​មួយ​ថ្ងៃ​ទៅ​មួយ​ថ្ងៃ ល្អ​ជាង​ចំណាត់ការ​របស់​អតីត​នាយក​រដ្ឋមន្ត្រី​អាភិស៊ីតទៅ​ទៀត"។ 

​ទ្វារទឹក​​បើក -ទឹក​រាប់​ពាន់​ម៉ែត្រ​គូប នឹង​បុក​ហូរ​ចុះ​ ទៅ​សមុទ្ទ តាម​ទន្លេ​ចៅប្រាយ៉ា កាត់​ត្រង់​កណ្តាល​រាជធានី ដែល​នេះ​អាច​បង្ក​ឲ្យ​សង្កាត់​មួយ​ចំនួន​​ត្រូវ​លិច​លង់។ ព្រឹកថ្ងៃ​សុក្រ​ទី ២១​តុលា​នេះ ទឹក​បាន​លិច​សង្កាត់​ឡាក់ស៊ី ​និង​ដនមឿន ក្នុង​កម្ពស់​កន្លះ​ម៉ែត្រ។ អ្នក​ជំនាញ​ជនជាតិ​ហូឡង់ កំពុង​សហការ​ជាមួយ​នឹង​រដ្ឋាភិបាល​ថៃ ដើម្បី​វាយ​តម្លៃ​កម្លាំង​ ​ទឹក​ជន់ជោរ​លិច​ក្រុង​ ដែល​កើត​ឡើង​ជា​យថាហេតុ។ ប៉ុន្តែ​នៅ​ក្រៅ​ផ្លូវការវិញ​ អាជ្ញាធរ​ថៃ​បាន​សារភាព​ថា គេ​មិនអាច​បាន់​ប្រមាណ​ អំពី​ទំហំ​នៃ​ការ​ខូចខាត​ ដោយ​ទឹក​ជំនន់​នៅ​ក្នុង​ក្រុង​បាងកក​បាន​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI