អាភិស៊ីតវេចាជីវ៉ាឆ្លើយបំភ្លឺអំពីអភិបាលកិច្ចរបស់ខ្លួននៅមុខនគរបាលនៅក្នុងវិបត្តិឆ្នាំ២០១០
ចុះផ្សាយនៅថ្ងៃ៖ កែប្រែថ្ងៃទី៖
អតីតនាយករដ្ឋមន្រ្តីថៃ អាភិស៊ីតវេចាជីវ៉ា នៅថ្ងៃសុក្រ៩ធ្នូ ២០១១នេះ បានចូលខ្លួននៅមុខនគរបាលដើម្បីឆ្លើយបំភ្លឺអំពីតួនាទីរបស់លោកនៅក្នុង “ការវាយបង្ក្រាបហិង្សាទៅលើពួកបាតុករអាវក្រហមចំនួន ១០ម៉ឺននាក់នៅទីក្រុងបាងកកដែលបានកាន់កាប់អស់រយៈពេល២ខែ ដើម្បីទាមទារឲ្យរដ្ឋាភិបាលលោកអាភិស៊ីត ចុះចេញពីមុខតំណែងនៅនិទាឃរដូវឆ្នាំមុននេះ”។ នេះជាការកត់សម្គាល់របស់អ្នកកាសែតម្នាក់នៃទីភ្នាក់ងារព័ត៌មានបារាំង AFP ។
លោក អាភិស៊ីតវេចាជីវ៉ា ដែលបានទទួលបរាជ័យនៅក្នុងការបោះឆ្នោតកាលពីខែកក្កដាឆ្នាំ២០១០និងឥឡូវនេះ ក្លាយជាមេដឹកនាំនៃគណបក្សប្រឆាំងវិញ នៅពេលធ្វើដំណើរមកដល់ទីស្នាក់ការនគរបាលក្រុងបាងកក មានទឹកមុខសើចរីករាយជាធម្មតា តែលោកពុំបានធ្វើអត្ថាធិប្បាយអ្វីទេ ទៅកាន់ពួកអ្នកកាសែតជាច្រើននាក់ដែលកំពុងរង់ចាំលោក។
នៅទីស្នាក់ការនគរបាល លោកអាភិស៊ីតក្នុងនាមជាសាក្សី ត្រូវជូនព័ត៌មាន បំភ្លឺអំពីចំណាត់ការរបស់លោកនៅក្នុងការគ្រប់គ្រងវិបត្តិដ៏ហិង្សាមួយដែលបណ្តាលឲ្យមានមនុស្សស្លាប់៩០នាក់និងត្រូវរបួសជិត១៩០០នាក់ ក្នុងចំណោមនោះមួយភាគធំគឺជាជនស៊ីវិល។
នៅខាងក្រៅទីស្នាក់ការនគរបាលវិញ គេឃើញប្រជាជនស៊ីវិលចំនួនជាង១០នាក់ ដែលជាក្រុមអ្នកប្រឆាំងនឹងលោកអភិស៊ីត បានលើកបដាមានសរសេរថា “ឃាតករ” និងថា “ បើអ្នកណាបញ្ជាឲ្យសម្លាប់គេ អ្នកនោះត្រូវតែទទួលកម្មពៀរវេរាជាមិនខាន"។
នៅថ្ងៃព្រហស្បតិ៍៨ធ្នូម្សិលមិញ អតីតឧបនាយករដ្ឋមន្រ្តីថៃលោក Suthep Thaugsuban ដែលទទួលបន្ទុកផ្នែកសន្តិសុខជាតិ នៅខណៈមានចលនាបាតុកម្មរបស់ពួកអាវក្រហមនោះ ក៏ត្រូវបាននគរបាលកោះហៅមកសាកសួរចម្លើយដូចលោកអាភិស៊ីតដែរ។
គួររំលឹកថា កាលពីខែ “វិច្ឆិកាមុននេះ មន្ត្រីជាន់ខ្ពស់ម្នាក់ផ្នែក កងអង្គភាពកម្ចាត់ឧក្រិដ្ឋកម្ម” លោកឧត្តមសេនីយទោ Vina Thongsong ធ្លាប់បានបញ្ជាក់ប្រាប់ដល់ទីភ្នាក់ងារព័ត៌មានបារាំង AFP ដែរថា “ក្រុមអ្នកស៊ើបអង្កេតរបស់លោក បានកោះអញ្ជើញលោក អាភិស៊ីតនិងលោក ស៊ូថេប ឲ្យចូលមកធ្វើជាសាក្សីដើម្បីជូនព័ត៌មានឲ្យបានជ្រៅជ្រះនៅក្នុងការស៊ើបអង្កេតមួយស្តីពីមរណភាពរបស់ជនចំនួន ១៣ នាក់នៅឱកាសបាតុកម្ម «កាលពីឆ្នាំ២០១០ » ដែលជានីតិវិធីមួយនៃការស៊ើបអង្កេតរបស់នគរបាល ។
គឺជាលើកដំបូងហើយ ដែលសមាជិកកំពូលនៃរដ្ឋាភិបាលជំនាន់មុន ត្រូវបាន នគរបាលកោះហៅដើម្បីមកឆ្លើយបញ្ជាក់ ពីតួនាទីរបស់ពួកគេ នៅក្នុង វិបត្តិ មួយដែលបានបិទបញ្ចប់ដោយការវាយបង្ក្រាបយ៉ាងហិង្សាបំផុតរបស់ពួកទាហានថៃទៅលើពួកបាតុករនៅចំកណ្តាលទីក្រុងបាងកក ដែលមានប្រជាជន ១២ លាននាក់រស់នៅ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ