ថៃ

លោក​ថាក់ស៊ីន​ច្រាន​ចោល​​មហិច្ឆតា​ចង់​ធ្វើ​នាយក​រដ្ឋមន្ត្រី

ការ​ឃោសនា​បោះឆ្នោត​របស់​បក្ស​ភឿ​ថៃ ថ្ងៃ​ទី ២៨​ ឧសភា ២០១១
ការ​ឃោសនា​បោះឆ្នោត​របស់​បក្ស​ភឿ​ថៃ ថ្ងៃ​ទី ២៨​ ឧសភា ២០១១ © Reuters

អតីត​នាយក​រដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ដែល​កំពុង​និរទេស​ខ្លួន​នៅ​បរទេស​​បាន​ប្រកាស​បដិសេធ​នៅ​ល្ងាច​ថ្ងៃ​ចន្ទ​ម្សិលមិញ ថា​គ្មាន​ចេតនា​វិល​ត្រឡប់​មក​កាន់​អំណាច​ជា​នាយករ​ដ្ឋមន្ត្រី​​​ថៃ​វិញ​​ឡើយ ហើយ​បាន​ធានា​អះអាង​ថា លោកស្រី យីងឡាក់ ស៊ីណាវ៉ាត់ ដែល​ជា​បេក្ខជន​​នាយករដ្ឋមន្ត្រី​​របស់​គណបក្សប្រឆាំង​ភឿ​ថៃ សម្រាប់​ការ​បោះឆ្នោត​សភា ខែ​កក្កដា​ខាង​មុខ​នេះ មិន​មែន​ជា​អាយ៉ង​របស់​លោក​ឡើយ។

ផ្សាយពាណិជ្ជកម្ម

“ខ្ញុំ​អាចមាន​ឥទ្ធិពល​លើ​ប្អូន​ ក្នុង​ផ្នែក​​​គំនិត-យោបល់ ព្រោះ​ខ្ញុំ​ចាស់ និង​មាន​បទ​ពិសោធន៍​ជាង​ប្អូន។ ខ្ញុំ​ចង់​ឃើញ​ប្អូន​បាន​ទទួល​ជោគជ័យ!”​ នេះ​ជា​ការ​អះអាង​ទទួល​ស្គាល់​​ឥទ្ធិពល​របស់​លោក ថាក់ស៊ីន ចំពោះ​ប្អូន​ស្រី ដែល​ជា​បេក្ខជន​នាយក​រដ្ឋមន្ត្រី​​របស់​បក្ស​​ភឿ​ថៃ តាម​រយៈ​បទ​សម្ភាសន៍​មួយ​របស់​ទូរទស្សន៍​អូស្រ្តាលី ពីទីក្រុង​ ឌូបៃ ចាក់​ផ្សាយ​នៅ​យប់​ថ្ងៃ​ចន្ទ​​ទី ៣០ ឧសភា​នេះ។ ប៉ុន្តែ​លោក បាន​បដិសេធ​ថា​ មិនបាន​​ប្រើ​ប្រាស់​ប្អូន​ស្រី ជា​ឈ្នាន់​​សម្រាប់​វិល​មក​កាន់​អំណាច​នៅ​ក្នុង​ប្រទេស​វិញទេ !

លោកស្រី យីងឡាក់ ស៊ីណាវ៉ាត់ ដែល​កំពុង​ដឹក​នាំ​យុទ្ធនាការ​​ឃោសនា​បោះឆ្នោត និង​ដែល​​មាន​ប្រជា​ប្រិយភាព​ខ្លាំង​ជាង​គេ ក្នុង​ការ​ស្ទង់​មតិ ត្រូវ​បាន​បក្ស​កាន់​អំណាច​របស់​លោក​នាយក​រដ្ឋមន្ត្រី​ អាភីស៊ីត ចាត់​ទុក​ថា​គ្មាន​បទ​ពិសោធន៍​ផ្នែក​នយោបាយ​ និង​ដឹក​នាំ​ទេ។ ហេតុ​ដូច្នេះ​ហើយ​បាន​ជា​លោក​ ថាក់ស៊ីន ឆ្លៀត​អះអាង​បញ្ជាក់​ថា ប្អូន​ស្រី យីងឡាក់ ​បាន​ចូល​រួម​ចំណែក​យ៉ាង​សកម្ម​​ជា​មួយ​លោក​តាំង​ពី​ដើម​រៀង​មក។ លោក​ បាន​អប់​រំ​ បំពាក់​បំប៉ន និង​បង្រៀន​ឲ្យ​ចេះធ្វើការ ចេះ​ចាត់​ចែង​-គិត​គូរ និង​ឲ្យ​មាន​ឥរិយាបថដូច​​បង​ប្រុស។​

លោក​មាន​ទំនុកទុក​ចិត្ត​​យ៉ាង​ខ្លាំង​ទៅ​លើ​​ប្អូន​ស្រី ក្នុង​ការ​បោះឆ្នោត​លើក​នេះ ប៉ុន្តែ​លោក​បាន​ច្រាន​ចោល​គំនិត​ដែល​ថា​ នឹង​មាន​ការ​លើក​លែង​ទោស​ដល់​លោក ក្នុង​ករណី​​គណបក្ស​​ភឿថៃ​របស់​ប្អូនស្រី​ឈ្នះ​ឆ្នោត​។ អាទិភាព​ចំបង​របស់​លោក និង​បក្ស គឺ​ការ​ផ្សះផ្សា​ជាតិ មិន​មែន​ការ​លើក​លែង​ទោស​ទេ។​​ លោក​​​រីករាយ​នឹង​បន្ត​រស់​នៅ​បរទេស។

ប៉ុន្តែ​ទោះ​ជា​យ៉ាង​ណា​ក៏​ដោយ​ ក៏​ការ​ស្រោច​ស្រង់​ជាតិ​ឲ្យ​រួប​រួម​គ្នាឡើង​វិញ អាច​ជា​បច្ច័យ​មួយ​ដ៏​ល្អ​សម្រាប់​លោក​ថាក់ស៊ីន។ លោកថាក់ស៊ីនដែល​មាន​ចេតនា​ចង់​ត្រឡប់​មក​ប្រទេស​កំណើត​​ក្នុង​ឱកាស​​​ខួប​កំណើត ៨៤ឆ្នាំ ​របស់ព្រះ​មហាក្សត្រ​ ភូមិបុល អាឌុលយ៉ាដេ នៅ​ដំណាច់​ឆ្នាំ​នេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI