ថៃ

យុទ្ធនាការ​ឃោសនា​បោះឆ្នោត​ផ្តើម​ហើយ​នៅ​ថៃ

គណបក្ស​នយោបាយ​​ថៃ​ផ្តើម​ធ្វើ​យុទ្ធនាការ​ឃោសនា​បោះឆ្នោត
គណបក្ស​នយោបាយ​​ថៃ​ផ្តើម​ធ្វើ​យុទ្ធនាការ​ឃោសនា​បោះឆ្នោត © Reuters

ថ្ងៃ​ព្រហស្បតិ៍​ទី​១៩​ឧសភា​នេះ ជា​ថ្ងៃ​ផ្តើម​ឡើង​ជា​ផ្លូវការ​នៃ​យុទ្ធនាការ​ឃោសនា​បោះ​ឆ្នោត នៅ​ប្រទេស​ថៃ។ យុទ្ធនាការ​បោះ​ឆ្នោត​នេះ​ប្រព្រឹត្ត​ទៅ​ជួន​ចំ​ថ្ងៃ​ខួប​គម្រប់​មួយ​ឆ្នាំ​គត់​នៃ​ប្រតិបត្តិការ​វាយ​បង្ក្រាប​ទៅ​លើ​ពួក​អាវ​ក្រហម​នៅ​ទីក្រុង​បាងកក។ ការ​បោះ​ឆ្នោត​នា​ពេល​ខាង​មុខ​នេះ គឺ​ជា​ការ​ប្រជែង​ជើង​គ្នា​រវាង​គណបក្ស​លោក​នាយក​រដ្ឋមន្រ្តី​អាភីស៊ីត​(Abhisit) និង​គណបក្ស​របស់​ក្រុម​លោក​អតីត​នាយករដ្ឋមន្ត្រី ថាក់ ស៊ីន(Thaksin)។ 

ផ្សាយពាណិជ្ជកម្ម

ការ​បោះឆ្នោត​នៅ​ថ្ងៃ​ទី​៣​កក្កដា​ខាង​មុខ គឺ​ជា​ការ​ប្រកួត​ប្រជែង​គ្នា​រវាង​បក្ស​ប្រជាធិបតេយ្យ​របស់​បច្ចុប្បន្ន​នាយក​រដ្ឋមន្ត្រី​អាភីស៊ីតនិង​បក្ស​ភឿ​ថៃ​នៃ​ក្រុម​របស់​លោក​ថាក់ ស៊ីន​ដែល​រស់​នៅ​បរទេស តាំង​ពី​ឆ្នាំ​២០០៦​មក​ម្ល៉េះ។

ទោះ​បី​ជា​បក្ស​ភឿ​ថៃ​បាន​តែងតាំង​ប្អូន​ស្រី​របស់​លោក​ថាក់ស៊ីន ឈ្មោះ​យីង ឡាក់ (Yingluck)ឲ្យ​ធ្វើ​ជា​បេក្ខជន​នាយក​រដ្ឋមន្ត្រី​ក្តី ក៏​យុទ្ធនាការ​បោះ​ឆ្នោត​ដែល​ផ្តើម​ឡើង​នៅ​ថ្ងៃ​នេះ គឺ​ជា​ការ​ប្រឈម​មុខ​ដាក់​គ្នា​រវាង​លោក​អាភីស៊ីត​និង​លោក​ថាក់ ស៊ីន។ ជាក់ស្តែង បក្ស​ប្រជាធិបតេយ្យ​បាន​ចាត់​ទុក​លោក​ស្រី​យីង ឡាក់​ថា ជា​អាយ៉ង​របស់​លោក​ថាក់​ ស៊ីន​រួច​ស្រេច​បាត់​ទៅ​ហើយ។ មិន​តែ​ប៉ុណ្ណោះ ទោះ​ជា​គ្មាន​វត្តមាន​នៅ​ក្នុង​ប្រទេស​ក្តី ក៏​លោក​ថាក់ ស៊ីន​នៅ​តែ​មាន​ប្រជាប្រិយភាព​ខ្ពស់ នៅ​តាម​ជនបទ​និង​នៅ​ក្នុង​មជ្ឈដ្ឋាន​អ្នក​ក្រីក្រ។ ម្ល៉ោះ​ហើយ បាន​ជា​ក្រុម​អ្នក​សង្កេតការណ៍​អះអាង​ពី​ឥឡូវ​ទៅ​ហើយ​ថា សន្លឹក​ឆ្នោត​ដែល​គេ​បោះ​ឲ្យ​ប្អូន​ស្រី​ថាក់ ស៊ីន គឺ​ជា​សន្លឹក​ឆ្នោត​សម្រាប់​ថាក់ ស៊ីន​ផ្ទាល់​តែ​ម្តង។

ចំពោះ​លោក​អាភីស៊ីត​វិញ ការ​បោះឆ្នោត​លើក​នេះ គឺ​ជា​ឱកាស​មួយ​សម្រាប់​កសាង​កេរ្តិ៍​ឈ្មោះ ពីព្រោះ​អាភីស៊ីត​បាន​ក្លាយ​ជា​នាយករដ្ឋមន្ត្រី​នៅ​ឆ្នាំ​២០០៨ មិនមែន​ដោយសារ​តែ​ការ​ឈ្នះ​ឆ្នោត​ទេ គឺ​ដោយសារ​តែ​ការ​ចង​សម្ព័ន្ធភាព​រវាង​ពួក​អ្នក​តំណាងរាស្ត្រ​នៅ​ក្នុង​សភា​ទេ​តើ។ ម្ល៉ោះ​ហើយ មហិច្ឆតា​របស់​លោក​អាភីស៊ីត គឺ​ដឹកនាំ​បក្ស​ប្រជាធិបតេយ្យ​ដែល​មិន​ធ្លាប់​ឈ្នះ​ឆ្នោត​២០​ឆ្នាំ​កន្លង​មក​ហើយ ទៅ​រក​ជ័យជំនះ​ជា​លើក​ទី​មួយ។ ក៏​ប៉ុន្តែ មក​ទល់​ពេល​នេះ លោក​អាភីស៊ីត​នៅ​តែ​គ្មាន​លទ្ធភាព​កេណ្ឌ​ប្រមូល​ប្រជាពលរដ្ឋ​ម្ចាស់ឆ្នោត ដ្បិត​អ្នក​ក្រ​និង​អ្នក​ស្រុក​ស្រែ​ចំការ​នៅ​តែ​ចាត់​ទុក​អាភីស៊ីត​ថា​ជា​អ្នក​បម្រើ​តែ​ប្រយោជន៍​អ្នក​មាន​អ្នក​មាន​អំណាច​នៅ​បាងកក​និង​កងទ័ព។

អ៊ីចឹង​ហើយ បាន​ជា​លោក​អាភីស៊ីត ខ្នះខ្នែង​ផ្ចាញ់ផ្ចាល​លោកស្រី​យីង ឡាក់ នៅ​លើ​វិស័យ​នយោបាយ ដោយ​បាន​ប្រកាស​ថា«អ្នក​ណា​ក៏​ដោយ​ដែល​ចង់​ក្លាយ​ជា​នាយករដ្ឋមន្ត្រី ត្រូវ​តែ​លាត​ត្រដាង​នូវ​ចក្ខុនិមិត្ត​នយោបាយ​របស់​ខ្លួន សម្រាប់​ប្រទេស​ជាតិ»៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI