កម្ពុជា

ភាព​ជា​ប្រធាន​អាស៊ាន​របស់​កម្ពុជា​នៅ​ឆ្នាំ​២០១២ ត្រូវ​បាន​ពិភាក្សា

លោក ស៊ូរិន ពិត​សុវណ្ណ អគ្គលេខាធិការ​អាស៊ាន និងលោក​រដ្ឋម​ន្ត្រីការ​បរទេស ហោ ណាំហុង
លោក ស៊ូរិន ពិត​សុវណ្ណ អគ្គលេខាធិការ​អាស៊ាន និងលោក​រដ្ឋម​ន្ត្រីការ​បរទេស ហោ ណាំហុង RFI/Channa Siv

​កិច្ច​ពិភាក្សា​ដោយ​បិទទ្វារ ស្តីពី ភាព​ជា​ប្រធាន​អាស៊ាន​របស់​កម្ពុជា នៅ​ឆ្នាំ​២០១២ ត្រូវបាន​ធ្វើឡើង កាលពី​ព្រឹក​ថ្ងៃ​ព្រហស្បតិ៍ ទី​២២​ធ្នូ រវាង​អគ្គលេខាធិការ​អាស៊ាន លោក ស៊ូរិន ពិត​សុវណ្ណ (Surin Pitsuwan) និង​លោក​ឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស​កម្ពុជា ព្រមទាំង​មន្ត្រីជាន់ខ្ពស់​រាជរដ្ឋាភិបាល​កម្ពុជា​ជាច្រើន​រូប​ផ្សេងទៀត​។ បន្ទាប់ពី​កិច្ចប្រជុំ លោក​អគ្គលេខាធិការ​អា​ស៊ាន បាន​បញ្ជាក់​ពី​ការគាំទ្រ និង​ប្រឹងប្រែង​ជួយ​ដល់​កម្ពុជា ក្នុង​តួនាទី​ជា​ប្រធាន​អាស៊ាន​នៅ​ឆ្នាំក្រោយ ដើម្បី​ឈាន​ទៅរក​ការកសាង​សហគមន៍​អាស៊ាន នៅ​ឆ្នាំ​២០១៥។​

ផ្សាយពាណិជ្ជកម្ម

បន្ទាប់ពី​កិច្ចប្រជុំ ដែល​មិន​អនុញ្ញាត​ឲ្យ​អ្នកកាសែត​ចូល​យក​ព័ត៌មាន នៅ​ក្រសួងការបរទេស​កម្ពុ​ជា ព្រឹក​មិញ លោក​រដ្ឋមន្ត្រី​ការបរទេស ហោ ណាំហុង បាន​មានប្រសាសន៍​យ៉ាងខ្លី ទៅ​កាន់​​ក្រុមអ្នកកាសែត​ថា លោក និង​លោក​អគ្គលេខាធិការ​អាស៊ាន បាន​និយាយ​តែ​ពី​បញ្ហា​អាស៊ាន​។ នោះ​គឺ​ធ្វើយ៉ាងណា ដើម្បី​ធ្វើ​សមាហរ័ណកម្ម​អាស៊ានឲ្យបាន និង​ដើម្បី​កសាង​សហគមន៍​អាស៊ាន​នៅ​ឆ្នាំ​២០១៥​។

តាម​លោក​ប្រមុខ​ការទូត កិច្ចប្រជុំ​នោះ ក៏បាន​លើកឡើង​ពី​ការតភ្ជាប់​ប្រទេស​ទាំង​១០ ជា​សមាជិក​អាស៊ាន លើ​គ្រប់​វិស័យ ទាំង​ហេដ្ឋារចនាសម្ព័ន្ធ ទាំង​ស្ថាប័ន និង​ទាំង​ការផ្លាស់ប្តូរ​ប្រជាជន​ឲ្យ​ជោគជ័យ ដើម្បី​ឈាន​ទៅ​កសាង​សហគមន៍​អាស៊ាន ក្នុង​ឆ្នាំ​២០១៥​។​

​ចំណែក​លោក ស៊ូរិន ពិត​សុវណ្ណ ( Surin Pitsuwan ) អគ្គលេខាធិកា​រអាស៊ាន បាន​លើកឡើង​ថា លោក​មក​កម្ពុជា​រយៈពេល ៣​ថ្ងៃនេះ ចាប់ពីថ្ងៃ២១ធ្នូ ដើម្បី​សម្តែង​នូវ​ការគាំទ្រ​យ៉ាង​ពេញ​ទំហឹង ចំពោះ​កម្ពុជា ក្នុងការ​ធ្វើ​ជា​ប្រធាន​អាស៊ាន នៅ​ឆ្នាំ​២០១២ ព្រមទាំង​ពិភាក្សា ដើម្បី​ធ្វើ​យ៉ាងណា​ឲ្យ​ឆ្នាំ​២០១២ ដែល​កម្ពុជា​ធ្វើជា​ប្រធាន​អាស៊ាន បាន​ទទួល​នូវ​ជោគជ័យ​ដ៏​ធំធេង​បំផុត​។​

​លោក​អគ្គលេខាធិការ​អា​ស៊ាន បាន​បន្តថា មាន​ការរំពឹងទុក​យ៉ាងខ្ពស់​បំផុត ពី​សហគមន៍​អន្តរជាតិ ចំពោះ​កម្ពុជា ដែល​ធ្វើ​ជា​ប្រធាន​អាស៊ាន ដើម្បី​ឈាន​ទៅ​សម្រេច​ឲ្យបាន​នូវ​ការ​បង្កើត​សហគម​ន៍​អាស៊ាន​នៅ​ឆ្នាំ​២០១៥​។ ដូច្នេះ​តាម​លោក​អគ្គលេខាធិការ អាស៊ាន​ត្រូវតែ​ខិតខំ​ធ្វើការ​ដោយ​ជិតស្និទ្ធ​បំផុត ដើម្បី​ឈាន​ទៅ​សម្រេច​នូវ​ការបង្កើត​សហគមន៍​អាស៊ាន ឲ្យបាន​ជោគជ័យ ដូច​ការគ្រោងទុក នៅពេល ៣ ឆ្នាំ​ខាង​មុខ។​

​លោក ស៊ូរិន ពិត​សុវណ្ណ ដែល​ជា​ជនជាតិ​ថៃ បានបញ្ជាក់​ថា សមាជិក​អាស៊ាន និង​ប្រទេស​ដៃគូ​សន្ទនា​របស់​អាស៊ាន នឹង​ខិតខំ​ប្រឹងប្រែង​ជួយ និង​គាំទ្រ​យ៉ាង​ពេញទំហឹង ចំពោះ​កម្ពុជា ក្នុងការ​ធ្វើ​ជា​ប្រធាន​អាស៊ាន​នៅ​ឆ្នាំ​២០១២​។​

​ក្រៅពី​ជួបប្រជុំ​ជាមួយ​រដ្ឋមន្ត្រី​ការបរទេស និង​រដ្ឋមន្ត្រី​ពាណិជ្ជកម្ម លោក​អគ្គលេខាធិការ​អា​ស៊ាន ក៏​ត្រូវ​ចូល​ក្រាប​បង្គំ​គាល់​ព្រះមហាក្សត្រ និង​ជួប​លោក​នាយករដ្ឋមន្ត្រី​ហ៊ុន​សែន​។​

កាល​​ពី​ឆ្នាំ​២០០២ កម្ពុជា​បាន​ធ្វើ​ជា​ប្រធាន​អាស៊ាន​ផ្លាស់​វេន បន្ទាប់​ពី​ក្លាយខ្លួន​ជា​សមាជិកសមាគម​សហប្រជាជាតិ​អាស៊ីអាគ្នេយ៍ ហៅ​កាត់​ថា អាស៊ាន នៅ​ឆ្នាំ​១៩៩៩៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI