ភូមា

ប្រធានាធិបតី​​ ថេន សេន ជាប់ឆ្នោត​ជាប្រធានបក្ស​កាន់​អំណាច

លោក ប្រធានាធិបតី​ភូមា Thein Sein
លោក ប្រធានាធិបតី​ភូមា Thein Sein www.bloomberg.com
ដោយ៖ អៀង សុខម៉ិញ
១៣ នាទី

លោក ថេន សេន ជា​ប្រធានាធិបតីផង និង​ជា​ប្រធាន​បក្ស​​​កាន់​អំណាច​ « គណបក្ស​ សាមគ្គី និង​អភិវឌ្ឍ​សហភាព USDP” ​! ជា​លទ្ធផល​ដ៏​ភ្ញាក់​ផ្អើល​ ព្រោះ​នៅ​មុន​ពេល​បើក​សមាជបក្ស អ្នក​ដែល​គេ​ប្រមើល​ឃើញ​ថា​សក្តិសម​ មាន​ប្រជាប្រិយភាព​ខ្លាំង​​អាច​នឹង​ជាប់​ឆ្នោត​ជា​ប្រធាន​បក្ស​ គឺ​លោក ស្វេ ម៉ាន់ (Shwe Mann)។ ក្រោយ​សមាជ លោក​ ស្វេ ម៉ាន់ បាន​​ជាប់​ឆ្នោត​ជា​អនុប្រធានបក្ស ប៉ុន្តែ​កាន់​តួនាទី​ជា​​ប្រធានបក្ស​ស្តីទី។

ផ្សាយពាណិជ្ជកម្ម

គណបក្ស​សាមគ្គី​និង​អភិវឌ្ឍ​សហភាព (USDP) ដែល​មាន​អាយុ​ទើប​ជាង​ពីរ​ឆ្នាំប៉ុណ្ណោះ ពោល​គឺទើប​​ត្រូវ​បង្កើត​ឡើង​ នៅ​ពេល​ក្រុម​​អ្នក​កាន់​អំណាច​យោធា​បានសម្រេច​​ដោះ​ឯកសណ្ឋាន​ទ័ព​ចេញ មក​ដឹកនាំ​ប្រទេស​ជាលក្ខណៈ​ស៊ីវិល​ ចាំបាច់​ត្រូវ​ធ្វើ​សមាជ​ជា​លើក​ដំបូង​នេះ ដើម្បី​ផ្តល់​កម្លាំង​ និង​រក​យុទ្ធសាស្ត្រ​ថ្មី​ឱ្យ​បក្ស​ដែល​កំពុង​បាត់​បង់​ប្រជាប្រិយភាព​​ជា​លំដាប់។

កាលពី​សម័យ​បោះឆ្នោត​សភា​មួយ​ភាគ នៅ​ខែ​មេសា​ឆ្នាំ​២០១២​កន្លង​ទៅ​នេះ គណបក្ស​សម្ព័ន្ធ​ជាតិ​ដើម្បី​លទ្ធិប្រជាធិបតេយ្យ ដឹក​នាំ​ដោយ​លោក​ស្រី​ អ៊ុង សានស៊ូជី ដែល​ជា​គណបក្ស​ប្រឆាំង​ បាន​ក្រសោប​យក​ជ័យ​ជំនះ​ស្ទើរ​តែ​ទាំង​ស្រុង​ ដោយ​ដណ្តើម​អាសនៈ​សភា​បាន​៤៣​កៅអី​ក្នុង​ចំណោម​៤៤​កៅអី។ បរាជ័យ​ដ៏​ធ្ងន់ធ្ងរ​នេះ បាន​ធ្វើ​ឱ្យ​គណបក្ស​កាន់​អំណាច USDP ដែល​បាន​និង​កំពុង​​ជួប​វិបត្តិ​ស្រេច​ទៅ​ហើយ​នោះ ត្រូវ​រិះរក​ និង​កែ​ខែ​​រក​យុទ្ធសាស្ត្រ​ថ្មី​ត្រៀម​ស្តារ​កិត្តិយស​ឡើង​វិញ​ទៅ​ក្នុង​សម័យ​បោះឆ្នោត​ជាតិ​ ឆ្នាំ​២០១៥។

ជ្រើសរើស​លោក​ប្រធានាធិបតី​ ថេន សេន ជា​ប្រធាន​បក្ស និង តួនាទី​អនុប្រធាន​គណបក្ស​ដល់ លោក ស្វេ ម៉ាន់​ប្រធាន​រដ្ឋសភា​​ គូ​ប្រជែង ​ដូច្នេះ​ បញ្ជាក់​យ៉ាង​ច្បាស់​អំពី​គោល​ជំហរ​ របស់​សមាជិក​ជាន់ខ្ពស់​បក្ស​ ក្នុង​ការ​​បន្ធូរ​បន្ថយ​សម្ពាធ​នយោបាយ​ផង និង​ដើម្បី​រក្សា​ទំនាក់ទំនង​ល្អ​រវាង​អំណាច​ប្រតិបត្តិ​និង​គណបក្ស​​ USDP ផង។

ប្រឈម​នឹង​​​ប្រជាប្រិយភាព​គ្មាន​ប្រៀប​របស់​លោកស្រី អ៊ុង សានស៊ូជី នៅ​ពេល​បោះឆ្នោត​​ប្រធានាធិបតី ឆ្នាំ​២០១៥ គណបក្ស​សាមគ្គី​​និង​អភិវឌ្ឍ​សហភាព​ ត្រូវ​តែ​បញ្ចេញ​ទេពកោសល្យ​នយោបាយ ភាព​ប៉ិន​ប្រសប់​​និង​យុទ្ធសាស្ត្រថ្មី​ពិតៗ​​ ​ដើម្បី​រក្សា​អំណាច​ ​ដោយ​​មិនងាក​ទៅ​​ប្រើ​យុទ្ធសាស្ត្រ​​ចាស់ ដូច​ជា​​​ចំណាយ​ថវិកា ហិរញ្ញវត្ថុ​យ៉ាង​សម្បើម​ ឬ​បង្ក​បង្កើត​ភាព​​មិន​​ប្រក្រតី​ លួច​បន្លំ​សន្លឹក​ឆ្នោត ឬ​ប្រើ​ការ​គំរាម​កំហែង​ ដូច​កាលពី​ពីរ​ឆ្នាំ​មុន​ទៀត៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI