រុស្ស៊ី-ជប៉ុន

ក្រុង​តូក្យូ​​សំដែង​ការ​តវ៉ា​មក​ម៉ូស្គូ​

ផែន​ទី​បញ្ជាក់​ពី​ទីតាំង​ប្រជុំ​កោះ គួរីល
ផែន​ទី​បញ្ជាក់​ពី​ទីតាំង​ប្រជុំ​កោះ គួរីល Montage RFI

តវ៉ានេះ គឺ ចំពោះ​ទស្សនកិច្ច​ធ្វើ​ដោយ​គណៈប្រតិភូ​រដ្ឋាភិបាល​រុស្ស៊ី នៅ​កោះ​មួយ​ ពីក្នុង ”ចំណោម​កោះ​៤​នៃ​ជួរ​កោះ​គួរីល​ (Kouriles) ខាង​ត្បូង” ជួរ​កោះ​ដែល​ភាគី​ជប៉ុន នៅ​តែ​ចាត់​ទុក​ជា​​ “ដែនដី​ប៉ែក​ខាង​ជើង” របស់​ខ្លួន​ទោះបី​វា​បាន​ឆ្លង មក​នៅ​​ក្រោម​​អធិបតេយ្យ​​រុស្ស៊ី ​ពេល​​ដែល​​ជប៉ុន​​ចាញ់​​សង្គ្រាម​​លោក​​លើក​​ទី​​២​ តាំងពី​​ក្នុង​​ឆ្នាំ​​១៩៤៥​​ក្តី។

ផ្សាយពាណិជ្ជកម្ម

ព្រឹក​ថ្ងៃ​ចន្ទ​១៦​ឧសភា​នេះ រដ្ឋមន្ត្រី​ការបរទេស​ជប៉ុន លោក Takeaki Matsumoto​បាន​ថ្លែង​តវ៉ា​ទៅ​ឯកអគ្គរដ្ឋ​ទូត​រុស្ស៊ី ដែល​ប្រចាំ​នៅ​ក្រុង​តូក្យូ​លោក Mikhail Belyi ថា ៖
ទស្សនកិច្ច​ចាប់ផ្តើម​ម្សិលមិញ ដោយ​ឧបនាយក​រដ្ឋមន្ត្រី​រុស្ស៊ី​លោក Serguei Ivanov នៅ កោះ​គួរីល​ខាង​ត្បូង គឺ “នាំ​ឲ្យ​របួស​ដល់​ទឹក​ចិត្ត​ប្រជាជន​ជប៉ុន ហើយ​ញ៉ាំង​ឲ្យ​មាន​ការ​សោក​ស្តាយ”។

គួរ​និយាយ​ថា រដ្ឋាភិបាល​ជប៉ុន​តែង​ប្រតិកម្ម យ៉ាង​ក្តួល​ក្តៅ ចំពោះ​ទស្សនកិច្ច​អ្នក​មុខ​អ្នក​ការ​រុស្ស៊ី ទៅកាន់​កោះ​គួរីល​ខាងត្បូង ដោយ​ពោល​អះ​អាង​ថា ការ​នេះ​ពិត​ជា​ជះ​ចំហាយ​អាក្រក់​មក​លើ​បរិយាកាស​នៃ​កិច្ចចរចា ស្តី​អំពី​វាសនា​នៃ​កោះ​ជាប់​វិវាទ កោះ​ដែល​ទីក្រុង​តូក្យូ នៅ​តែ បន្ត​ចាត់ទុក​ជា​ដែន​ដី​ជប៉ុន។ ប្រតិកម្ម​ខ្លាំង​មែន​ទែន គឺ​ពេល​ដែល​ប្រធានាធិបតី​រុស្ស៊ី លោក Medvedev បាន​អញ្ជើញ​ទៅ​កាន់​កោះ​នោះ កាលពី​ថ្ងៃ​១​វិច្ឆិកា​ឆ្នាំ​ទៅ​មិញ។ កាលណោះ ទីក្រុង​ម៉ូស្គូ បាន​ថ្លែង​តប​ទៅ​វិញ​ ថា​ប្រមុខ​រដ្ឋ​រុស្ស៊ី មាន​សិទ្ធិ​ធ្វើ​ដំណើរ​ទៅ​កាន់​ច្រក​ល្ហក​ណា​ក៏​ដោយ ដែល​ជា​ដែនដី ប្រទេស​រុស្ស៊ី ដោយ​មិន​បាច់​សួរ​យោបល់​អ្នក​ដទៃ​ឡើយ។

ហើយ​តាំងពី​ពេល​នោះ​មក ចេះ​តែ​មាន​ពួក​អ្នក​ធំ​រុស្ស៊ី ធ្វើ​ដំណើរ​ទៅ​កាន់​កោះ​ឆ្ងាយ​ដាច់​ស្រយាល​​នោះ។ លើក​នេះ លោក​ឧបនាយក​រដ្ឋមន្ត្រី​រុស្ស៊ី Serguei Ivanov អម​ដំណើរ​ដោយ​រដ្ឋមន្ត្រី​ថ្នាក់​សហព័ន្ធ ដល់​ទៅ​៤​រូប​ ព្រម​ទាំង​អភិបាល​ខេត្ត Sakhalin នៅ​ចុង​បូព៌ា​រុស្ស៊ី ខេត្ត​ដែល​រួម​ក្តោប​ទាំង​កោះ​គួរីល​ខាង​ត្បូង​ទៅ​ផង។ គោលដៅ​គឺ តាម​ដាន​មើល តើ “កម្មវិធី​រដ្ឋ​សម្រាប់​ឆ្នាំ ២០០៧-២០១៥ ខាង​អភិវឌ្ឍន៍​កោះ​នោះ ”មាន​វិស័យ​សង្គម-​សេដ្ឋកិច្ច និង​ហេដ្ឋារចនា​សម្ព័ន្ធ ជាដើម​បច្ចុប្បន្ន​បំពេញ​បាន​ដល់​កំរិត​ណា​ហើយ។

លោក​ឧបនាយក​រដ្ឋមន្ត្រី​រុស្ស៊ី Serguei Ivanov ផ្ទាល់​បាន​សំដែង​ការ​ងឿង​ឆ្ងល់ ចំពោះ​ប្រតិកម្ម​ពី​ខាង​ជប៉ុន ដោយ​គាត់​មាន​ប្រសាសន៍​ថា ក្នុង​ក្របខ័ណ្ឌ​កម្មវិធី​នេះ គាត់​ទៅ​កាន់​កោះ​នេះ គឺ​ជា​លើក​ទី​៤​ហើយ រួច​គាត់​គ្មាន​ចេតនា ផ្លុំ​បញ្ឆេះ​កំហឹង​ភាគី​ជប៉ុន​ឡើយ។

ជប៉ុន រហូត​មក​ទល់​ឥឡូវ នៅ​តែ​មិន​ព្រម​ទទួល​ស្គាល់ អធិបតេយ្យ​រុស្ស៊ី លើ​កោះ​គួរីល​ខាង​ត្បូង​ចំនួន​៤ នោះ​ទេ កោះ​ដែល​មាន​ផ្ទៃ​ក្រឡា​សរុប គឺ ៥.០០០គ.ម រស់​នៅ​ដោយ​បណ្តាជន​ប្រមាណ ២​ម៉ឺន​នាក់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI