ចិន-ជប៉ុន

ប៉េកំាង និង​តូក្យូ​សម្រេចចិត្ត​ឈប់​ប្រើ​លុយ​ដុល្លារ​អាមេរិក​ក្នុង​ការ​ទូទាត់​ពាណិជ្ជកម្ម​រវាង​គ្នា

ប៉េកំាង និង​តូក្យូ​សម្រេចចិត្ត​ឈប់​ប្រើ​លុយ​ដុល្លារ​អាមេរិក​ក្នុង​ការ​ទូទាត់​ពាណិជ្ជកម្ម​រវាង​គ្នា
ប៉េកំាង និង​តូក្យូ​សម្រេចចិត្ត​ឈប់​ប្រើ​លុយ​ដុល្លារ​អាមេរិក​ក្នុង​ការ​ទូទាត់​ពាណិជ្ជកម្ម​រវាង​គ្នា REUTERS/Sheng Li/Files

ថ្ងៃ​អង្គារ ទី២៩ ឧសភា​នេះ ចិន និង​ជប៉ុន​បាន​ប្រកាស​ឲ្យ​ដឹង​ថា ចាប់​ពី​ថ្ងៃ​សុក្រ ទី១ មិថុនា​ចុង​សប្តាហ៍​នេះ​ទៅ ការ​ទូទាត់​ពាណិជ្ជកម្ម​រវាង​ប្រទេស​ទំាង​ពីរ​នឹង​ត្រូវ​ធ្វើ​ឡើង​ដោយ​ប្រើ​លុយយ័ន​ចិន និង​លុយយេន​ជប៉ុន មាន​ន័យ​ថា លែង​ប្រើ​លុយ​ដុល្លារ​ទៀត​ឡើយ។ គោលដៅ គឺ​ដើម្បី​ជួយសម្រួល និង​ផ្តល់​សន្ទុះ​បន្ថែម​ទៀត​ឲ្យ​ដល់​ការ​ដោះដូរ​ពាណិជ្ជកម្ម​រវាង​គ្នា។

ផ្សាយពាណិជ្ជកម្ម

ការ​សម្រេចចិត្ត​​របស់​ចិន និង​ជប៉ុន​ពេល​នេះ គឺ​ជា​កិច្ចព្រមព្រៀង​មួយ​នៅ​ក្នុង​ចំណោម​កិច្ចព្រមព្រៀង​ផ្សេងៗ​ទៀត​ដែល​ប្រទេស​មហាអំណាច​សេដ្ឋកិច្ច​ទំាង​ពីរ​នៅ​អាស៊ី​បាន​ព្រមពៀង​គ្នា​កាល​ពី​ដំណាច់​ខែ​ធ្នូ ឆ្នំា ២០១១។ កិច្ចព្រមព្រៀង​ជា​ឧភតោភាគី​ដែល​មាន​គោលដៅ​ជួយសម្រួល និង​ពង្រឹង​បន្ថែម​ទៀត​នៅ​ក្នុង​ការ​ដោះដូរ​ពាណិជ្ជកម្ម និង​វិនិយោគ​រវាង​គ្នា។ គួរ​ជម្រាប​ជូន​ថា រហូត​មក​ដល់​ពេល​នេះ ការ​ដោះដូរ​ពាណិជ្ជកម្ម​រវាង​ចិន និង​ជប៉ុន​ត្រូវ​បាន​ទូទាត់​ជា​លុយដុល្លារ មាន​ន័យ​ថា ចិន និង​ជប៉ុន​ត្រូវ​តែ​យក​លុយ​របស់​ខ្លួន​ទៅ​ដូរ​ជា​លុយដុល្លារ ដើម្បី​ទូទាត់​គ្នា។ តែ​ចាប់​ពី​ថ្ងៃទី១ មិថុនា​ខាង​មុខ​នេះ​ទៅ ការ​ទូទាត់​ពាណិជ្ជកម្ម​រវាង​ជប៉ុន និង​ចិន​នឹង​ត្រូវ​ធ្វើ​ឡើង​ដោយ​ប្រើ​លុយយ័ន និង​លុយយេន។ ឧទាហរណ៍ បើ​ចិន​ចង់​លក់​របស់​មួយ​តម្លៃ ១០០០យ័ន​ទៅ​ឲ្យ​ជប៉ុន ជប៉ុន​ត្រូវ​គិត​តម្លៃ​ប្តូរ​ពី​លុយយេន ទៅ​លុយយ័ន គឺ​មិន​ចំា​បាច់​ប្តូរ​ពី​លុយយេន ទៅ​ដុល្លារ​អាមេរិក រួច​ពី​ដុល្លារ​អាមេរិក ទៅ​លុយយ័ន​ដូច​មុន​ទេ។ ការ​ធ្វើ​យ៉ាង​របៀប​នេះ​នឹង​ធ្វើ​ឲ្យ​ចំណេញ​ទំាង​អស់​គ្នា ទីមួយ៖ កាត់​បន្ថយ​ហានិភ័យ​ក្នុង​តម្លៃ​អត្រា​ប្តូរប្រាក់​នៅ​លើ​ទីផ្សារ ពី​លុយយ័ន ទៅ​ដុល្លារ ពី​លុយយេន ទៅ​ដុល្លារ ពី​ដុល្លារ​ទៅ​លុយយ័ន និង​ទៅ​លុយយេន ទីពីរ៖ មិន​ចំា​បាច់​បង់​ថ្លៃ Commission ទោះ​បី​តិច ឬ​ច្រើន។

ចិន​ចង់​ឲ្យ​លុយយ័ន​ក្លាយ​ជា​រូបិយប័ណ្ណអន្តរជាតិ

មហិច្ឆតា​របស់​ចិន​ដែល​ចង់​ឃើញ​លុយយ័ន​របស់​ខ្លួន​ក្លាយ​ជា​រូបិយប័ណ្ណ​អន្តរជាតិ គឺ​មាន​តំាង​ពី ១៥ឆ្នំា​មក​ហើយ។ កាល​ពី​ខែ​មីនា ឆ្នំា ២០១២ កន្លង​ទៅ ក្រុម​ប្រទេស Brics ដែល​មាន​ចិន​ជា​សមាជិក​ម្នាក់​បាន​ចុះ​ហត្ថលេខា​លើ​កិច្ចព្រមព្រៀង​មួយ​ដោយ​បាន​អនុញ្ញាត​ឲ្យ​ប្រទេស​សមាជិក​ធ្វើ​ការ​ដោះដូរ​ពាណិជ្ជកម្ម​រវាង​គ្នា​ដោយ​ប្រើ​រូបិយវត្ថុជាតិ គឺ​មិន​បាច់​ឆ្លង​កាត់​លុយដុល្លារ​ទេ។ ដូច្នេះ​ឃើញ​ថា ការ​ដែល​ចិន​បាន​ព្រមព្រៀង​ជាមួយ​ជប៉ុន​ពេល​នេះ គឺ​ជា​ភស្តុតាង​ជាក់ស្តែង​មួយ​ដែល​បញ្ជាក់​ពី​មហិច្ឆតា​របស់​ចិន​ដែល​ចង់​ឲ្យ​លុយយ័ន​ក្លាយ​ជា​មធ្យោបាយ​ដោះដូរ​ពាណិជ្ជកម្ម​អន្តរជាតិ ប្រឈម​នឹង​លុយដុល្លារ​អាមេរិក។

ជាមួយ​គ្នា​នេះ ទង្វើ​របស់​ចិន​ពេល​នេះ​ក៏​ជា​ការ​វាយប្រហារ​លើ​អាមេរិក​ដែល​តែងតែ​ចោទ​ចិន​ថា បាន​លូកដៃ​ជ្រៀតជ្រែក​ចូល​ក្នុង​ទីផ្សារ ដើម្បី​ទប់​លុយយ័ន​មិន​ឲ្យ​ឡើង​ថ្លៃ ធៀប​នឹង​លុយដុល្លារ។ ទីក្រុង​វ៉ាស៊ីនតោន​បាន​អះអាង​ថា ទង្វើ​របៀប​នេះ​របស់​ចិន​នឹង​ធ្វើ​ឲ្យ​​ទំនិញ​ចិន​មាន​តម្លៃ​ថោក នៅ​លើ​ទីផ្សារ​អន្តរជាតិ ដែល​ជា​ការ​ប្រកួតប្រជែង​មិន​យុត្តិធម៌។ យ៉ាង​ណា​ក៏​ដោយ សម្រាប់​ពេល​នេះ មហិច្ឆតា​របស់​ចិន​ដែល​ចង់​ឃើញ​លុយយ័ន​របស់​ខ្លួន​ក្លាយ​ជា​រូបិយប័ណ្ណ​អន្តរជាតិ​នៅ​ក្នុង​ការ​ដោះដូរ​ពាណិជ្ជកម្ម​អន្តរជាតិ ហាក់​ដូច​ជា​នៅ​ឆ្ងាយ​នៅ​ឡើយ ព្រោះ​ថា រូបិយប័ណ្ណ​បម្រុង​ដែល​មាន​នៅ​ក្នុង​ពិភពលោក​បច្ចុប្បន្ន មាន​ជាង ៨០% ជា​លុយដុល្លារ​អាមេរិក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI