កម្ពុជា

មន្រ្តី​រដ្ឋ​ពីរនាក់​ទៀត​ត្រូវ​ចាប់ខ្លួន​ពី​បទប្រព្រឹត្ត​អំពើ​ពុករលួយ

លោកទេសរដ្ឋមន្រ្តី ឱម យិនទៀង ប្រធាន​អង្គភាព​ប្រឆាំង​អំពើ​ពុករលួយ
លោកទេសរដ្ឋមន្រ្តី ឱម យិនទៀង ប្រធាន​អង្គភាព​ប្រឆាំង​អំពើ​ពុករលួយ © សុវណ្ណារ៉ា

អង្គភាព​ប្រឆាំង​អំពើពុករលួយ នៅថ្ងៃចន្ទ​នេះ​បាន​ប្រកាស​ឲ្យ​ដឹង​ពី​ការចាប់ខ្លួន មន្ត្រី​សាធារណៈ​របស់​រដ្ឋ​ចំនួន​ពីរនាក់​ពី​បទ​ឆបោក​យក​លុយប្រជាពលរដ្ឋ ដោយ​ជនសង្ស័យ​ទាំងពីរ​នាក់​បាន​យក ឈ្មោះ​របស់​មន្ត្រីដែល​បំរើ​ការងារ នៅ​អង្គភាព​ប្រឆាំង​អំពើ​ពុករលួយ ទៅ​ប្រើប្រាស់ ដើម្បី​គំរាម និង​ឆបោក​យកលុយ​ពី​ប្រជាពលរដ្ឋ​ស្លូតត្រង់។ បច្ចុប្បន្ន​ជនសង្ស័យ​ទាំងពីរ​នាក់​ត្រូវ​បានឃុំខ្លួន​បណ្តោះ​អាសន្ន នៅ​មន្ទីរ​ឃុំឃាំង​គុកព្រៃ​ស រងចាំ​ការស៊ើបអង្កេត​បើក​សវនាការ​ជំនុំជម្រះទោស។

ផ្សាយពាណិជ្ជកម្ម

ថ្លែង​នៅក្នុង​សន្និសីទ​សារព័ត៌មាន​ដែល​រៀបចំ​ធ្វើឡើង នៅ​អង្គភាព​ប្រឆាំង​អំពើ​ពុករលួយ ក្នុង​រាជធានី​ភ្នំពេញ នៅ​រសៀល​ថ្ងៃចន្ទ​នេះ ក្រុមមន្ត្រី​អង្គភាព​ប្រឆាំង​អំពើ​ពុករលួយ​បាន​ប្រកាស​ឲ្យ​ដឹង​ថា ខ្លួន​ចាប់​បាន​ជនសង្ស័យ​ចំនួន​ពីរនាក់ ជា​មន្ត្រី​តូចតាច បំរើ​ការនៅ​សា្ថប័ន​រដ្ឋ​ចំនួន​ពីរ មួយ​ឈ្មោះ នួន សារ៉ាត ជា​មន្ត្រី​នៃ​នាយកដ្ឋាន​រដ្ឋប្បវេណី​ក្រសួង​យុត្តិធម៌ និង​ម្នាក់​ទៀត​ឈ្មោះ កែវ សុផល ជា​មន្ត្រី​នគរបាល​នាយកដ្ឋាន​ការពារ​បេតិកភ័ណ្ឌ ក្រសួង​មហាផ្ទៃ។ ជនសង្ស័យ​ទាំងពីរ​ត្រូវបាន​ចាប់ខ្លួន​បាន កាល​ពី​ថ្ងៃទី ១ មិថុនា និង​​ត្រូវបាន​បញ្ជូនខ្លួន​ទៅកាន់​សាលាដំបូង​រាជធានី​ភ្នំពេញ កាល​ពី​ថ្ងៃទី២ ខែមិថុនា ម្សិលមិញ​ពាក់ព័ន្ធ​នឹង​ករណី​ឆបោក​យក​ប្រាក់​ចំនួន ២៥០០​ដុល្លារ ពី​ប្រជាពលរដ្ឋ​ដោយ​ប្រើប្រាស់​ឈ្មោះ​របស់​អង្គភាព​ប្រឆាំង​អំពើ​ពុករលួយ។

ការចាប់ខ្លួន​ជនសង្ស័យ​ទាំងពីរ​នាក់ ដែលជា​អតីត​មន្ត្រី​បំរើ​ការងារ​រដ្ឋ​ខាងលើ គឺធ្វើឡើង​ដោយ​យោង​តាមពាក្យ​បណ្តឹង​ចំនួន​៣ ដែល​អង្គភាព​ប្រឆាំង​អំពើ​ពុករលួយ​ទទួល​បាន​ពី​ប្រជាពលរដ្ឋ។ ពាក្យ​បណ្តឹង​ទាំងអស់​នោះ​ពាក់ព័ន្ធ​នឹង​បទ​ឆបោក​តែមួយ ដែល​ជនសង្ស័យ​ប្រើ​ឈ្មោះ​របស់​អង្គភាព​ប្រឆាំង​អំពើពុករលួយ ដើម្បី​ជំរិត​ឆបោក​យកលុយ ពី​ប្រជាពលរដ្ឋ​រងគ្រោះ​ដើមបណ្តឹង​ទាំងអស់​នោះ ដែល​រស់នៅ​ក្នុង​ខេត្តកំពត​ និង​នៅ​តំបន់​បុរី​កីឡា ក្រុង​ភ្នំពេញ។

ជា​ការចាត់​វិធានការ​ទប់ស្កាត់ និង​កសាង​សេចក្តីទុកចិត្ត​ដល់​ប្រជាពលរដ្ឋ ក៏​ដូចជា​ការពារ​កេរ្តិ៍ឈ្មោះ​របស់​អង្គភាព​ប្រឆាំង​អំពើ​ពុកលួយ ដែល​ត្រូវ​បាន​ជនខិលខូច​មួយ​ចំនួន​យក​ឈ្មោះអង្គភាព​ទៅប្រើប្រាស់ ដើម្បី​ជំរិត​ទារប្រាក់ និង​ប្រព្រឹត្ត​អំពើ​ទុច្ចរិត​ផ្សេងៗ ដើម្បី​បំរើ​ផល​ប្រយោជន៍​​របស់ខ្លួន។ នេះ​ជា​ការលើក​ឡើង​របស់ លោក នួន សុធិមន្ត ប្រធាន​នាយកដ្ឋាន កិច្ចការ​គតិយុត្ត​ពាក្យបណ្តឹង និង អន្តរជាតិ នៃ​អង្គភាព​ប្រឆាំង អំពើ​ពុករលួយ ដែល​បាន​ថ្លែង នៅក្នុង​សន្និសីទ​កាសែត។ ដោយ​លោក​បាន​បញ្ជាក់​ថា អង្គភាព​នឹង​បន្ត​តាមដាន និង​ចាត់វិធានការ​តាមផ្លូវច្បាប់​ទៅ​លើ​ពាក្យបណ្តឹង​ដែល​អង្គភាព​ទទួល​បាន​ពី​សាធារណៈជន។ ប៉ុន្តែ លោក​មិនបាន​ចាំទេថា រហូត​មកដល់​ពេលនេះ អង្គភាព​ប្រឆាំង​អំពើ​ពុករលួយ​ទទួល​បាន​ពាក្យបណ្តឹង​ចំនួន​ប៉ុន្មាន និង​ចាត់ការ​ទៅ​លើ​ពាក្យបណ្តឹង​បាន​ប៉ុន្មាន​នៅឡើយនោះទេ។

ប៉ុន្តែ គេនៅ​ចាំបាន​ថា ក្រោយ​ការបង្កើត​អង្គភាព​ប្រឆាំង​អំពើ​ពុករលួយ តាំងពី​ឆ្នាំ ២០១០មក រហូត​មកដល់​ពេលនេះ មាន​ព្រះរាជអាជ្ញា ចៅក្រម មន្ត្រីតុលាការ ប៉ូលីស ទាហាន និងមន្ត្រីរាជ នៅ​តាម​ក្រសួងរដ្ឋមួយ​ចំនួន ត្រូវបាន​អង្គភាព​ប្រឆាំងអំពើពុកលួយ​ចាប់ខ្លួន និង​ចាត់វិធានការ ពាក់ព័ន្ធ​នឹង​ការប្រព្រឹត្ត​អំពើ​ពុករលួយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI