អានតួអត្ថបទ
កម្ពុជា

ស្ថានទូត​អាមេរិក​ត្រៀម​ធ្វើការ​ជាមួយ​កម្ពុជា​លើ​សំណុំរឿង​Wikileaks

​ឯកសារ​សំងាត់​របស់​អាមេរិកផ្សាយ​​ដោយ​​​វិបសៃត៍​Wikileaks មាន​ពាក់ព័ន្ធ​នឹង​កម្ពុជា​
​ឯកសារ​សំងាត់​របស់​អាមេរិកផ្សាយ​​ដោយ​​​វិបសៃត៍​Wikileaks មាន​ពាក់ព័ន្ធ​នឹង​កម្ពុជា​ ©រក្សាសិទ្ធិ
ដោយ៖ លាង ដឺលុច
១៩ នាទី

ឯក​អគ្គរដ្ឋទូត​សហរដ្ឋអាមេរិក​ប្រចាំ​កម្ពុជា លោកស្រីCarole Rodley បាន​ជួប​ជាមួយ​អ្នកនាំពាក្យ​រដ្ឋាភិបាល​កម្ពុជា លោកខៀវ កាញារីទ្ធ ដើម្បី​ពិភាក្សា​អំពី​ការធានា​ទំនាក់ទំនង​ការទូត​អាមេរិក​កម្ពុជា ដោយ​មិន​អោយ​មាន​ការរំខាន​ពី​រឿងអាស្រូវ Wikileaks។ វិបសៃត៍Wikileaks បាន​ចុះផ្សាយ​ឯកសារ​កំណត់ហេតុ​ជាច្រើន​ម៉ឺនទំព័រ ដែល​សុទ្ធសឹង​ជា​ឯកសារ​សម្ងាត់​របស់​រដ្ឋាភិបាល​អាមេរិក នៅក្នុង​ក្របខ័ណ្ឌ​នៃ​ទំនាក់ទំនង​ជាមួយ​បរទេស គោល​នយោបាយ និង​សកម្មភាពរបស់​រដ្ឋាភិបាល​អាមេរិក​ដូចជា សង្គ្រាម នៅ អាហ្វហ្កានីស្តង់ និង​ការសន្ទនា​គ្នា​រវាង​ថ្នាក់ដឹកនាំ​អាមេរិក​ជាមួយ​រដ្ឋាភិបាល​ សម្ព័ន្ធមិត្ត​របស់គេ​មួយចំនួន។

ផ្សាយពាណិជ្ជកម្ម

សេចក្តី​រាយការណ៍​របស់​លាង ដឺលុច​ពី​ទីក្រុង​ភ្នំពេញ

ការសម្ងាត់​យោធា​របស់​ក្រសួង​ការពារ​ជាតិ​អាមេរិក ការសម្ងាត់​ការទូត​របស់​រដ្ឋាភិបាល​អាមេរិក​ជាច្រើន​ម៉ឺនទំព័រ ដែល​បង្ហាញ​ឡើង​ក្នុង​ការឆ្លងឆ្លើយ​គ្នា​រវាង​មន្ត្រី​ទូតអាមេរិក ជាមួយ​ក្រសួង​ការបរទេស​អាមេរិក ស្រាប់តែ​បាន​លេចធ្លាយ​ទៅដល់​វិបសៃត៍​Wikileaks ហើយ​ដែល​ម្ចាស់​វែបសៃត៍​នេះ បាន​ផ្សព្វផ្សាយ​ក្នុង​រយៈពេល​ចុងក្រោយ​នេះ។ រឿង​សម្ងាត់​ទាក់ទង​នឹង​ការធ្វើ​សង្គ្រាម​នៅ​អាហ្វហ្កានីស្តង់​ក៏​បាន​ស្ថិតនៅ​ក្នុង​ការទម្លាយ និង​ផ្សព្វផ្សាយ​ឯកសារ​នោះដែរ។

ប៉ុន្មាន​ថ្ងៃ​ចុងក្រោយ​នេះ កាសែត​ក្នុងស្រុក​មួយ​ចំនួន​ក៏​បាន​ផ្សព្វផ្សាយ​អោយដឹងថា ការ​ទម្លាយ​ឯកសារ​សម្ងាត់​របស់​រដ្ឋាភិបាល​អាមេរិក ដោយWikileaksនោះ ក៏​មាន​ផ្នែក​ខ្លះ​និយាយ​ពាក់ព័ន្ធ​ដល់​កម្ពុជា​ផងដែរ ដែល​របាយការណ៍ ត្រូវ​បាន​ធ្វើឡើង​ដោយ​ស្ថានទូត​អាមេរិក​នៅកម្ពុជា។ ក្រោយ​មាន​ការផ្សព្វផ្សាយ​យ៉ាងដូច្នេះ ជំនួប​រវាង​ឯកអគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា លោកស្រី​Carole Rodley និង​អ្នកនាំពាក្យ​រដ្ឋាភិបាលកម្ពុជា លោកខៀវ កាញារីទ្ធ ដែលជា​រដ្ឋមន្ត្រី​​ក្រសួង​ព័ត៌មាន​ផងដែរ​នោះ ត្រូវ​បាន​រៀបចំ​ឡើង នៅព្រឹក​ថ្ងៃ​ទី៣ធ្នូ​នេះ។ ការពិភាក្សា​រវាងមន្ត្រី​ជាន់ខ្ពស់​ទាំងពីរ​បាន​ផ្តោត​ទៅលើ​ការធានា​រក្សាជំហរ​ទំនាក់ទំនង​ល្អ​រវាង​ប្រទេស​ទាំងពីរ ប្រឈមនឹង​ការគំរាមកំហែង​នៃ​ការទម្លាយ​ឯកសារ​សម្ងាត់​របស់​វិបសៃត៍ Wikileaks។

លោក​ខៀវ កាញារីទ្ធ​បាន​ថ្លែង​ប្រាប់​វិទ្យុបារាំង​អន្តរជាតិ​ថា រដ្ឋាភិបាលអាមេរិក​បាន​ចាត់ទុក អំពើ​ទម្លាយ​ឯកសារ​សម្ងាត់​នេះ ថា​ជា​ករណី​ឧក្រិដ្ឋ​មួយ ហើយ​ដែល​រដ្ឋាភិបាល​អាមេរិក​កំពុង​កសាង​សំណុំរឿង​ទៅ​តុលាការ។ បើតាម​ការបញ្ជាក់​របស់​លោក​ខៀវ កាញារីទ្ធ​ដដែល លោកស្រី​ឯកអគ្គរដ្ឋទូត​អាមេរិក​បាន​ជម្រាប​លោក​ថា អាមេរិក​ត្រៀមខ្លួន​ធ្វើការ​ជាមួយ​មន្ត្រី​កម្ពុជា​ជានិច្ច ក្នុង​ករណី​ដែលមាន​ការផ្សព្វផ្សាយ​ណា​ទាក់ទង​នឹង​កម្ពុជា នៅក្នុង​ការទម្លាយ​ឯកសារ​សម្ងាត់​នៅក្នុង​វិបសៃត៍ Wikileaks​នោះ។ លោកខៀវ កាញារីទ្ធ​ថ្លែង​ថា លោក​ស្វាគមន៍​ការត្រៀមខ្លួន​របស់​អាមេរិក​បែបនេះ ចំពោះ​ការទម្លាយ​ឯកសារ​ដែល​អាច​ធ្វើ​អោយ​ប៉ះពាល់​ដល់​ទំនាក់ទំនង​រវាង​វ៉ាស៊ីនតោន និង​ភ្នំពេញ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ