អានតួអត្ថបទ
កម្ពុជា​

អាមេរិក បារម្ភ​ពី​សេចក្តី​ព្រាង​ច្បាប់​អង្គការ នៅ​កម្ពុជា

អង្គការ​ក្រៅ​រដ្ឋាភិបាល​មួយ​នៅ​កម្ពុជា
អង្គការ​ក្រៅ​រដ្ឋាភិបាល​មួយ​នៅ​កម្ពុជា ©សុវណ្ណារ៉ា
ដោយ៖ លី ម៉េងហួរ
២១ នាទី

​ក្រសួងការបរទេស​អាមេរិក បាន​សម្តែង​ការព្រួយ​បារម្ភ ចំពោះ​សេចក្តី​ព្រាង ស្តីពី សមាគម និង​អង្គការ​មិនមែន​រដ្ឋាភិបាល នៅក្នុង​ប្រទេស​កម្ពុជា។ ក្រសួង​ការបរទេស​អាមេរិក បាន​ជំរុញ​ដល់​រដ្ឋាភិបាល​កម្ពុជា​ឲ្យ​ធានា​នូវ​សេរីភាព​សម្រាប់​សង្គម​ស៊ីវិល ព្រោះ​អាមេរិក​យល់ថា សេចក្តី​ព្រាង​ច្បាប់​ថ្មី​នោះ នឹង​ដាក់​កំហិត​លើ​សកម្មភាព​របស់​សមាគម និង​អង្គការ​ក្រៅ​រដ្ឋាភិបាល​ នៅ​កម្ពុជា។

ផ្សាយពាណិជ្ជកម្ម

 

សេចក្តី​រាយការណ៍​របស់ លី ម៉េងហួរ ពីទីក្រុង​ភ្នំពេញ

សហរដ្ឋ​អាមេរិក មាន​​ការ​ព្រួយ​បារម្ភ​យ៉ាង​ខ្លាំង​អំពី​សេចក្តី​ព្រាង​ច្បាប់ ស្តី​ពី សមាគម និង​អង្គការ​មិនមែន​រដ្ឋាភិបាល​ នៅ​កម្ពុជា។ សហរដ្ឋ​អាមេរិក នឹង​ជំទាស់​យ៉ាង​ខ្លាំង​ចំពោះ​ការអនុម័ត​ច្បាប់​ណា​មួយ ដែល​មាន​លក្ខណៈ​បង្ខិតបង្ខំ និង​កំហិត​សកម្មភាព​ស្រប​ច្បាប់​របស់​អង្គការ​ សមាគម។​ នេះ​បើ​តាម​​សេចក្តី​ថ្លែងការណ៍ ចុះ​ថ្ងៃ​១២​មករា របស់​ការិយាល័យ​អ្នក​នាំពាក្យ​​ក្រសួង​ការបរទេស​អាមេរិក។

​ក្រសួង​ការបរទេស​អាមេរិក ក៏​បាន​អំពាវនាវ ដោយ​ជម្រុញ​ដល់​រដ្ឋាភិបាល​កម្ពុជា ឲ្យ​ធ្វើ​ការ​ប្រឹក្សា​យោបល់​យ៉ាង​ដិត​ដល់​ជាមួយ​អង្គការ​សមាគម និង​ដៃគូ​ដទៃ​ទៀត​លើ​ពង្រាង​ច្បាប់​ថ្មី​នោះ ដើម្បី​ពិចារណា ថា​តើ​វិធានការ​ដូច្នេះ វា​ចាំ​បាច់​ឬទេ​ ?​​

​សេចក្តី​ព្រាង​ច្បាប់​ដំបូង របស់​រដ្ឋាភិបាល ស្តីពី សមាគម និង​អង្គការ​មិនមែន​រដ្ឋាភិបាល មាន ១១ ជំពូក និង ៥៨ មាត្រា ត្រូវបាន​លើក​យក​ទៅ​ពិគ្រោះ​យោបល់​លើក​ដំបូង​រវាង​ក្រសួង​មហាផ្ទៃ ក្រសួង​ការបរទេស អង្គការ​ជាតិ និង​អន្តរជាតិ កាលពី​ថ្ងៃ​១០​មករា។
​ក្រុម​អង្គការ​សង្គម​ស៊ីវិល បាន​ចូលរួម​ផ្តល់​មតិ​យោបល់ ដើម្បី​កែប្រែ​មាត្រា​មួយ​ចំនួន ក្នុង​សេចក្តី​ព្រាង​ច្បាប់​ដ៏​ចម្រូងចម្រាស់។ តាម​ក្រុម​អង្គការ​សង្គម​ស៊ីវិល ខ្លឹមសារ​នៃ​សេចក្តី​ព្រាង​ច្បាប់​អង្គការ បាន​កំណត់​ពី​ការ​រឹតបន្តឹង​ដល់​ការងារ​របស់​អង្គការ​មិនមែន​រដ្ឋាភិបាល​ទាំងអស់ ពីព្រោះ ច្បាប់​នោះ បាន​បង្កើត​ជា​ឧបសគ្គ​ចំបង នៅ​ក្នុង​ការ​ចុះ​បញ្ជី និង​ការអនុវត្តន៍​​សកម្មភាព។ ផលវិបាក ដែល​កើតចេញ​ពី​ច្បាប់​ថ្មី​នេះ បាន​ធ្វើ​ឱ្យ​ថយ​ចុះ​នូវ​ការ​ផ្តល់​មូលនិធិ សម្រាប់​ការអភិវឌ្ឍន៍​គម្រោង​សំខាន់ៗ​ជាច្រើន ដែល​បាន​និង​កំពុង​អនុវត្ត​ដោយ​សហការ​ជាមួយ​រាជរដ្ឋាភិបាល​នៅពេល​បច្ចុប្បន្ន ហើយ​កាត់បន្ថយ​ប្រភព​មូលនិធិ ដែល​គ្រោង​នឹង​ផ្តល់​ឱ្យ​ថ្មី​ទៀត សម្រាប់​ការអភិវឌ្ឍន៍​រយៈពេល​យូរ​អង្វែង​ផង​ដែរ។

យ៉ាងណាក៏​ដោយ ចំពោះ​ការ​លើក​ឡើង​របស់​ក្រសួង​ការបរទេស​អាមេរិក​ខាង​លើ មិន​ត្រូវ​បាន​លោក កុយ គួង អ្នក​នាំ​ពាក្យ​ក្រសួង​ការបរទេស​កម្ពុជា​បញ្ចេញ​ប្រតិកម្ម​តបត​បែប​ណា​ឡើយ នៅ​ថ្ងៃ​ព្រហស្បតិ៍​នេះ ដោយ​លោក​អះអាង​ថា ជំហរ​របស់​ក្រសួង​ការបរទេស​កម្ពុជា មិន​ខុស​ពី​ជំហរ​របស់​ក្រសួង​មហាផ្ទៃ ចំពោះ​ការ​តាក់តែង​សេចក្តី​ព្រាង​ច្បាប់ ស្តីពី សមាគម និង​អង្គការ​មិនមែន​រដ្ឋាភិបាល​នោះឡើយ។

​ក្នុង​វេទិកា​ពិគ្រោះ​យោបល់ កាលពី​ថ្ងៃ​១០​មករា លោក​ឧបនាយក​រដ្ឋមន្ត្រី ស ខេង បាន​លើក​ឡើង​ថា ការ​បង្កើត​ច្បាប់​អង្គការ​ថ្មី​នេះ មិនមែន​ដើម្បី​គំរាម​កំហែង និង​រឹតត្បិត​សិទ្ធិសេរីភាព ក៏​ដូចជា ការ​កំហិត​សកម្មភាព​របស់​អង្គការ​សមាគម​នៅ​កម្ពុជា​ឡើយ។ តាម​លោក ស ខេង ច្បាប់​អង្គការ ត្រូវបាន​តាក់តែង​ឡើង ដើម្បី​ការពារ​កុំឲ្យ​កើតមាន​អំពើ​ភេរវកម្ម​នៅ​កម្ពុជា ជ្រក​ក្រោម​ស្លាក​អង្គការ​សមាគម ដូច​ករណី ចលនា CFF និង​មេភេរវករ ហាំ បាលី ជាដើម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ